Habakuk 1:1-17
1 Ehepaululo olo omuprofeti Habakuk* a uda okupitila memoniko:
2 Omwene Jehova, fiyo onaini handi kuu ndi mone ekwafo, ndele ito nyamukula?
Fiyo onaini handi pula ekwafo omolwoukolokoshi, ndele ito i mo olunyala?*
3 Omolwashike to talifa nge owii?
Omolwashike wa efa pa kale omafininiko?
Omolwashike ndi na okumona ominyonena noukolokoshi?
Omolwashike okuhaudafana nomalipumomumwe a hapupala?
4 Omhango oya talika ko ihe na oshilonga,Nouyuki ihau longwa nandenande.
Ovanawii otava fininike ovayuki;Nomolwaasho ouyuki ihau longwa nandenande.
5 “Taleni moiwana nokukonenena!
Taleni nonghumwe nokukala mwa kanghwa;Osheshi otapa ka ningwa sha pefimbo leniOsho nande omu shi lombwelwe, itamu shi itavele.
6 Ohandi ka longifa* Ovakaldea,Oshiwana oshikwanyanya noshihe na ko nasha.
Ove lihanena keshe pamwe kombada yeduVa nyeke ko omaumbo oo ehe fi avo.
7 Oshiwana osho oshitilifa, novanhu otava kakama omolwasho.
Ohashi tokola sho vene osho sha yuka nosha pitifa komesho eenghonopangelo* dasho.
8 Eenghambe dasho ohadi endelele di dule eengwe,Osha nyika oshiponga neenghono shi dule eembwa domomufitu, ngeenge tadi nyange oufiku.
Eenghambe dasho doita ohadi tondoka onhapo yoshidudu.Eenghambe dasho ode uya da dja kokulekule.
Ohashi toto meendelelo, ngaashi onhwa tai ponokele oshihakanwa.
9 Oshiwana ashishe oshe uya sha halelela okulwa.
Ovakaldea aveshe ngeenge tava i, ova fa omhepo yokoushilo,Nohava ongele eenghwate dihapu ngaashi ehekedu.
10 Ohava sheke eehambaNohava yolo omalenga.
Ova yemba eenhele adishe odo da dingililwa komakuma.Ohava ongele edu, opo va dule okukwata ko eenhele odo.
11 Opo nee ohava pula komesho ngaashi omhepo, ndele tava piti mo,Nova wana okuhandukilwa omolwoinima ii oyo va ninga,Molwaashi ova tala ko eenghono davo di li kalunga kavo.”*
12 Omwene Jehova, mbela ino kala ko nalenale?
Omwene Kalunga kange, Omuyapuki wange, ove iho fi.*
Omwene Jehova, owe va nangeka po va tokole;Emanya lange, owe va hoolola va yandje outekuduliko.*
13 Omesho oye okwa koshoka, itaa dulu okutala osho shii,Noito lididimikile oukolokoshi.
Omolwashike wa efela pa kale oukengeleledi,Noho kala wa mwena, ngeenge omukolokoshi ta nyono po oo omuyuki e mu dule?
14 Omolwashike wa efela omunhu a ungaungiwe naye ngaashi eeshi domefuta,Ngaashi oinamwenyo yomefuta oyo ihe na omupangeli?
15 Aishe oyo ote* i kwata nondjolo.
Ote i kwata nonete,Note i ongele monete yokukwata eeshi.
Nomolwaashi a hafa neenghono.
16 Osho osho tashi mu ningifa a yambele onete yaye omayambo,Nota yambele* onete yaye yokukwata eeshi;Osheshi oikulya yaye oi na oukolele* omolwadoOikulya yaye oya denga mbada.
17 Mbela ota kala ashike ta kwatifa onete yaye ye te i pimhi?*
Mbela ota kala ashike nokudipaa oiwana nopehe na olukeno?
Eshangelo lopedu
^ Tashi dulika tali ti, “Okulipapatela.”
^ Ile “xupifa.”
^ Eln., “pendula po.”
^ Ile “efimano.”
^ Ile tashi dulika, “eenghono davo odo kalunga kavo.”
^ Ile tashi dulika, “itatu fi.”
^ Ile “epukululo.”
^ Sha hala okutya, ovatondi vOvakaldea.
^ Ile “Nomwifi weyambo.”
^ Eln., “ya ya omaadi a wana.”
^ Ile tashi dulika, “ta kala nokupweya mo eongamukonda laye?”
