Genesis 21:1-34
21 Jehova okwa li a dimbuluka Sara, ngaashi a li a popya. Onghee Sara okwa wanifilwa po osho Jehova e mu udanekela.
2 Sara okwa li a ninga oufimba, ndele ta dalele Abraham okaana okamati pefimbo olo Kalunga a li e mu udanekela. Pefimbo opo, Abraham okwa li a kulupa.
3 Abraham okwa luka omonamati waye, oo opo a li a dalelwa kuSara, Isak.
4 Abraham okwa kengha omonamati waye, Isak, eshi a li e na omafiku ahetatu, ngaashi naanaa Kalunga a li e mu lombwela.
5 Abraham okwa li e na eedula 100, eshi omonamati waye Isak a dalwa.
6 Opo nee Sara okwa ti: “Kalunga okwa etela nge ehafo. Keshe ou te ke shi uda ota ka hafa pamwe naame.”*
7 Sara okwa weda ko, a ti: “Olyelye ngeno a li ta dulu okulombwela Abraham kutya, ‘Sara ota ka nyamifa shili okaana’? Ashike onde mu dalela okaana okamati moukulupe waye.”
8 Okaana oka kula, ndele ta ka tovo, na Abraham okwa li a ninga oshivilo shinene mefiku olo Isak a tova.
9 Sara okwa kala e wete nghee omonamati waHagar Omuegipiti, oo Hagar a dalela Abraham, ta sheke Isak.
10 Onghee Sara okwa lombwela Abraham, a ti: “Lekela omupika ou omukainhu nomonamati waye, molwaashi omonamati womukainhu oo omupika ita ka kala omufyuululi pamwe nomonamati wange, Isak.”
11 Ashike osho Sara a popya kombinga yomonamati waAbraham osha li sha udifa nai Abraham.
12 Opo nee Kalunga okwa tya kuAbraham: “Ino uda nai kwaasho Sara a popya kombinga yokamati noyomupika woye okakadona. Pwilikina kuye,* molwaashi muIsak omo tamu ka dja oludalo loye.
13 Ashike omonamati womupika woye okakadona, ohandi ka ninga oludalo laye oshiwana, molwaashi oku li omona woye.”
14 Abraham okwa penduka ongula inene, ndele ta kufa omungome nombao yomeva,* nokwe i pa Hagar. Okwa tula oinima oyo komapepe aHagar, ndele te mu lekele a ye pamwe nomonamati waye. Onghee Hagar okwa ya, nokwa ka kala ta endaenda mombuwa yaBer-seba.
15 Lwanima, eshi omeva a pwa mo mombao, okwa tula omonamati momudile woshixwa.
16 Opo nee Hagar okwa ya, ndele ta ka kala omutumba e likalela kokule oshinano shi fike pokuumbwa kwoshikuti, nokwa popya, a ti: “Inandi hala okumona eshi omonamati wange ta fi.” Onghee okwa kala omutumba kokule, ndele ta hovele okulila mokule.
17 Kalunga okwa uda ondaka yomonamati waHagar, nomweengeli waKalunga okwa ifana Hagar okudja meulu, ndele ta ti kuye: “Hagar, oto kwena shike? Ino kala wa tila, molwaashi Kalunga okwa uda ondaka yomonamati woye.
18 Fikama, kufa po omonamati woye, ndele to mu kwata mokwooko, molwaashi ohandi ke mu ninga oshiwana shinene.”
19 Opo nee Kalunga okwa pashula omesho aHagar, ndele ta mono ondungu yomeva; okwa ya, ndele ta tekele omeva mombao nokwa pa okamati ka nwe.
20 Kalunga okwa kala pamwe nomonamati waHagar eshi ta kulu. Omumati oo okwa li ha kala mombuwa nokwa ninga omukongo.
21 Okwa li ha di mombuwa yaParan, na ina okwa li e mu kongela omukulukadi medu laEgipiti.
22 Pefimbo olo, Abimelek naPikol, omukulunhu wetangakwaita laye, ova lombwela Abraham, tava ti: “Kalunga oku li pamwe naave mukeshe osho to ningi.
23 Ana kuKalunga paife moipafi yange kutya ito ka kengelela nge, ame novana vange noludalo lange nonokutya oto ka ulikila nge ohole i na oudiinini nosho yo ovanhu vomoshitukulwa omo u li, ngaashi ame nde i ku ulikila.”
24 Abraham okwa tya: “Onda ana.”
25 Ashike Abraham okwa ngongota kuAbimelek shi na sha nondungu oyo ovapiya vaAbimelek va nyeka ko.
26 Abimelek okwa nyamukula, a ti: “Kandi shii kutya olyelye a ninga ngaho; kwa li wa lombwela nge kombinga yoshinima osho, opo ashike ndi shi udite nena eli.”
27 Opo nee Abraham okwa kufa eedi neengobe nokwe di pa Abimelek, ndele tava ningi ehangano.
28 Eshi Abraham a tongola mo eedi heyali deenghadi moufita ukwao,
29 Abimelek okwa tya kuye: “Omolwashike we likalekela eedi odo heyali deenghadi?”
30 Opo nee Abraham okwa tya: “Ou na okutambula eedi heyali deenghadi meke lange di li oumbangi kutya aame nda xupa ondungu ei.”
31 Osho osho sha ningifa Abraham a luke onhele oyo Ber-seba,* molwaashi aveshe opo va li va ningila eano.
32 Ova li va ningila ehangano puBer-seba, nolwanima Abimelek okwa fikama pamwe naPikol, omukulunhu wetangakwaita laye, nova li va shuna kedu lOvafilisti.
33 Konima yaasho, okwa twika omiti domitamarisk puBer-seba, naashi a li oko okwa li a ifana edina laKalunga, Jehova, Kalunga kaalushe.
34 Abraham okwa kala ha di* medu lOvafilisti oule wefimbo.*
Eshangelo lopedu
^ Oshitya shOshiheberi osho sha tolokwa ‘ehafo’ nosho yo ‘okuhafa’ movelishe ei otashi ti lelalela ‘omuyolwa’ nosho yo ‘okuyolwa.’
^ Eln., “kondaka yaye.”
^ Okandini ka longwa moipa yoinamwenyo.
^ Tali ti “Ondungu yeano; Ondungu yaheyali.”
^ Ile “omunailongo.”
^ Eln., “omafiku mahapu.”
