Timoteus wotete 6:1-21
6 Ovapiya nava kale va fimaneka neenghono oovene vavo, opo edina laKalunga nomahongo aye aha shekwe.
2 Ovo ve na oovene ve li ovaitaveli inave va dina molwaashi ve li ovamwaxe. Ndele ove na okulonga noudiinini molwaashi ovaitaveli vakwao ovo ve li ovamwaxe ovaholike ovo tava mono ouwa moilonga yavo iwa.
Twikila oku va honga oinima ei noku va kumaida.
3 Ngeenge ope na ou ta tandavelifa omahongo oipupulu noitatu kumwe nomalombwelo a yuka,* oo a dja kOmwene wetu Jesus Kristus nosho yo nomahongo oo e li metwokumwe netilokalunga,
4 ote linenepeke noke na eudeko lasha. Oku hole unene eemhata nosho yo eenhamanana di na sha noitya. Oinima ya tya ngaho ohai ningifa ovanhu va kale ve na ondubo, ve hole omashilafano, hava popile mowii vakwao noinave lineekelafana.
5 Osho osha ningifa ovo ve na omadiladilo mai nova efa po oshili va diladile kutya etilokalunga otali va etele ouwa.
6 Oshoshili kutya etilokalunga otali etele omunhu ouwa muhapu ngeenge okwa wanenwa kwaasho e na.
7 Osheshi mounyuni inatu eta mo sha noitatu di mo na sha.
8 Onghee hano, ngeenge otu na oikulya* noikutu,* natu kale twa wanenwa koinima oyo.
9 Ndele ovo va hala okupunapala otava wile momwiyo notava hangwa komayeleko, komadiladilo nokomahalo mai oo tae va twala mehanauno.
10 Osheshi olwisho loimaliwa olo efina lowii aushe, naavo va hala okupunapala ova efa po eitavelo lavo nove lietela omaudjuu mahapu.
11 U li omupiya waKalunga, inda onhapo oinima oyo. Ndele lalakanena ouyuki, etilokalunga, eitavelo, ohole, elididimiko nomwenyo muwa.
12 Kondja ekondjo liwa leitavelo; diinina omwenyo waalushe oo wa ifanenwa nowa udifa kombinga yao moipafi yovanhu vahapu.
13 Ohandi ku lombwele koshipala shaKalunga ou oinima aishe i na omwenyo omolwaye noshaKristus Jesus ou a yandja oundombwedi koshipala shaPontius Pilatus,
14 u dulike koipango nou kale uhe na oshipo nowa koshoka fiyo opokuhololwa kwOmwene wetu Jesus Kristus,
15 oo e na alushe ehafo noye aeke Omupangeli e na eenghono, oo ta ka holola eenghono daye peufwafimbo. Oku li Ohamba yeehamba adishe nOmwene woovene aveshe.
16 Oye aeke ita dulu okufya,* noha kala mouyelele omo itamu dulu okwiiwa, nokape na oo a mona mo ile ta dulu okumona mo. Oye a wana okufimanekwa nokupewa eenghonopangelo daalushe. Amen.
17 Kunghilila oipuna yomounyuni ou* ihe linenepeke,* iha tule elineekelo layo moinima oyo tai xulu po, ndele nai lineekele Kalunga, oo he tu pe pauyadi oinima aishe oyo hatu hafele.
18 I lombwela i ninge oipuna yoilonga iwa, i kale hai longo ouwa, hai yandje, hai tukulilafana navakwao
19 noi lituvikilile emona li kale ekanghameno liwa lonakwiiwa, opo i diinine omwenyo washili.
20 Timoteus, pashukila osho we lineekelelwa, henuka eendjovo dongaho odo itadi fimanekifa Kalunga notadi di kwaavo ve litala ko ve na eshiivo, ashike eshiivo lavo otali kondjifa oshili.
21 Vamwe ovo have litangele eshiivo la tya ngaho, ova efa po eitavelo.
Efilonghenda laKalunga nali kale pamwe nanye.
Eshangelo lopedu
^ Ile “taa tungu.”
^ Ile “oipalwifa.”
^ Ile “nonhele yokukala.” Eln., “sha shokuliuvika.”
^ Ile “e na oukwatya wokuhafya.”
^ Ile “yomonghalelo ei yoinima.” Tala omafatululo oitya.
^ Ile “lihalele pombada.”
