Embo lotete lOvakorinto 1:1-31
1 Ame Paulus, oo a hoololwa kuJesus Kristus a ninge omuyapostoli pahalo laKalunga, pamwe nomumwatate Sostenes,
2 ohandi shangele eongalo laKalunga olo li li muKorinto nosho yo aveshe ovo ve li meenhele di lili noku lili, ovo hava ifana edina lOmwene wetu Jesus Kristus, oo e li yo Omwene wavo. Kunye ovo mwa hoololwa mu kale moukumwe naJesus Kristus nomu ninge ovayapuki:
3 Efilonghenda nombili yaKalunga Tate yetu noyOmwene Jesus Kristus nai kale nanye.
4 Ohandi pandula alushe Kalunga omolwefilonghenda olo e mu pa okupitila muKristus Jesus.
5 Ndele molwaashi omu li moukumwe naKristus, omwa pewa oinima aishe mwa kwatelwa okuudifa eendjovo daKalunga nokukala mu di shii nawa
6 ngaashi etumwalaka li na sha naKristus olo la kala la pamenena mokati keni
7 opo muha kale mwa hepa sha,* ofimbo mwa teelela nodjuulufi eshi Omwene wetu Jesus Kristus ta ka holola eenghono daye.
8 Kalunga ote ke mu pameka yo opo paha kale nande oumwe te mu pataneke mefiku lOmwene wetu Jesus Kristus.
9 Kalunga, ou e mu ifana mu kale moukumwe nOmona waye Jesus Kristus Omwene wetu, omudiinini.
10 Ovamwatate, ohandi mu kumaida okupitila medina lOmwene wetu Jesus Kristus mu kale hamu udafana opo mokati keni muha kale etukauko, ndele mu kale mwa hangana, hamu diladila monghedi imwe nomu na etaleko la faafana.
11 Keumbo laKloe okwa dja vamwe va lombwela nge shi na sha nanye ovamwatate kutya mokati keni omu na etukauko.
12 Ohandi popi ngaho molwaashi vamwe vomunye otamu ti: “Ame ondaPaulus,” “Ame ondaApollos,” “Ame ondaKefas,”* “Ame ondaKristus.”
13 Hano Kristus okwa tukauka? Mbela Paulus okwa valelwa komuti omolweni? Ile omwa ninginifwa medina laPaulus?
14 Ohandi pandula Kalunga eshi inandi ninginifa nande oumwe womunye kakele kaKrispus naGaius,
15 opo paha kale nande oumwe ta ti kutya okwa ninginifwa medina lange.
16 Kakele kaasho, onda ninginifa yo ovaneumbo vaStefanas. Okudja opo itandi dimbuluka ngeenge ope na vali ou nda ninginifa.
17 Kristus ina tuma nge ndi ninginife, ndele ondi udife onghundana iwa; ashike hakuudifa ngaashi omuhongwanhu opo omuti womahepeko* waKristus uha kale wongaho.
18 Ehongo li na sha nomuti womahepeko* olo oulai kwaavo tava ka hanaunwa po, ndele kufye ovo hatu ka xupifwa olo eenghono daKalunga.
19 Omishangwa oda ti: “Ounongo wovanaendunge ohandi ke u xulifa po, neendunge dovahongwanhu itandi ke di hokwa.”
20 Ovanaendunge ove li peni? Ovanongo vomishangwa* ove li peni? Ovatwi veemhata vomounyuni ou* ove li peni? Mbela Kalunga ina ulika kutya ounongo wounyuni ou oo oulai?
21 Ovanhu vomounyuni ou inava shiiva Kalunga molwaashi ove lineekela mounongo wavo vene. Ndele Kalunga okwa ulika ounongo waye eshi ta xupifa ovo tave mu itavele okupitila metumwalaka olo hatu udifa, olo ovanhu vomounyuni ve li tala ko li li oulai.
22 Ovajuda otava kongo omadidiliko, nOvagreka ova hala ounongo,
23 ndele fye ohatu udifa kombinga yaKristus oo a valelwa komuti, oo e li emanya lepundukifo kOvajuda noulai koiwana.
24 Ndele kOvajuda nOvagreka ovo va hoololwa, Kristus oye eenghono nounongo waKalunga.
25 Oinima yaKalunga oyo ovanhu va tala ko ihe na eendunge noihe na ekwafo lasha, kuKalunga oi na eendunge noi na ongushu.
26 Ovamwatate, omu shi shii nawa kutya eshi Kalunga e mu hoolola, vahapu vomunye pataleko lopanhu kamwa li ovanaendunge, ovanaenghono noinamu dja momapata a punapala.*
27 Ndele Kalunga okwa hoolola oinima oyo i li oulai pataleko lounyuni opo a fife ohoni ovanaendunge; nokwa hoolola oinima oyo pataleko lounyuni ihe na ekwafo lasha opo a fife ohoni oinima oyo i na eenghono.
28 Kalunga okwa hoolola oinima oyo pataleko lounyuni inai fimana noya dinika; oinima oyo ihe po, opo a xutule oyo i li po,
29 opo paha kale ou* te litange koshipala shaKalunga.
30 Ndele Kalunga okwe mu hanganifa naKristus Jesus, oo a holola ounongo nouyuki waKalunga. Ovanhu otava dulu okumangululwa nokukala ovayuki omolwekuliloyambo laJesus
31 opo shi kale ngaashi omishangwa tadi ti: “Ou te litange, ne litangele Jehova.”
Eshangelo lopedu
^ Ile “muhe na nande oshali.”
^ Oo ha ifanwa yo Petrus.
^ Tala omafatululo oitya.
^ Tala omafatululo oitya.
^ Sha hala okutya, ovo ve shii nawa Omhango.
^ Ile “vomonghalelo yoinima.” Tala omafatululo oitya.
^ Ile “nokamwa li oidale.”
^ Eln., “ombelela.”
