Eeindjiniya odo hadi longo omarobota otadi nduluka po omashina oo taa dulu okulongifwa keendokotola momatando oo a kitakana, omunhu ta ningwa ashike okambululu kashona. Ova diladila okunduluka po omashina a tya ngaho konima eshi va konakona okwooko kwoshikwameva osho hashi ifanwa oktopus, oko haku litonyo shimwe to nyengwa.

Didilika: Ooktopus ohai dulu okukwata, okuhumbata, okufina oshinima nokulifininikila poima pa finana, tai longifa omaoko ayo ahetatu oo a kumwifa. Ohai dulu okutonyena omaoko ayo kombinga keshe, nohai dulu yo oku a yukililifa nawanawa poitukulwa yao opo ya hala.

Ovakonakoni ova itavela kutya otaku dulu okulongwa eshina lokutanda olo hali dulu okulitonya noupu ngaashi okwooko kwooktopus nokushitilila noupu poima nopehe na okuteta omunhu oshipute sha kula. Eshina olo otali dulu okulongifwa metando lovanaudu ovo va pumbwa etando la kitakana.

Tala nghee okwooko kwooktopus haku litonyo shimwe to nyengwa

Eshina olo tali hopaenene okwooko kwooktopus ola ndulukwa nale nola hovela okulongifwa metando lomapopifa. Oshitukulwa shimwe sheshina olo, osho shi na eemilimeta 135, ohashi kwata nokuyelula po oilyo yomeni lolutu nopehe na okweeta oshiponga, ofimbo shikwao tashi tande. Omundokotola Tommaso Ranzani, oshilyo shospaana oyo ya nduluka po eshina olo, okwa ti, “eli ehovelo ashike leshina eli; ohatu ende noku li xwepopaleka mokweendela ko kwefimbo.”

Ove oto ti ngahelipi? Mbela okwooko kwooktopus okwe uya po ashike ngahenya? Ile oinima oya shitwa?