OMISHANGWA DA YELIFWA

Markus 1:15 — “Ouhamba waKalunga owa ehena popepi”

DANA

“Eufwafimbo ola wanifwa, nOuhamba waKalunga owa ehena popepi. Lidilululeni, nye mu itavele onghundana iwa.” — Markus 1:15. Ombiibeli — Etoloko lOunyuni Mupe lOmishangwa dopaKriste dOshigreka.

“Efimbo ola fika, ouhamba waKalunga wa ehena popepi, lidilululeni nye mu itavele evaengeli.” — Markus 1:15, Ombiibeli yOshikwanyama yomo 2013.

Osho omushangwa waMarkus 1:15 wa hala okutya

Jesus Kristus okwa li a lombwela ovapwilikini vaye kutya Ouhamba waKalunga * owa “ehena popepi,” molwaashi oye a li ta ka kala Ohamba yomonakwiiwa yOuhamba oo.

Jesus ka li a hala kutya Ouhamba owa hovela nale okupangela. Lwanima, okwa ka lombwela ovahongwa vaye kutya Ouhamba otau ka dikwa po monakwiiwa. (Oilonga 1:6, 7) Ashike, okwa li ko pefimbo la wapala, omudo oo Ombiibeli ya li ya xunganeka kutya ote ke uya e li Ohamba yomonakwiiwa. * Omolwetomheno olo, Jesus okwa li a popya kutya: “Eufwafimbo ola wanifwa,” sha hala okutya efimbo laye lokuudifa moipafi evaengeli ile onghundana iwa i na sha nOuhamba ola fika. — Lukas 4:16-21, 43.

Opo ovanhu va mone ouwa monghundana iwa, ove na okulidilulula, sha hala okutya okulivela ombedi omolwomatimba avo omonakudiwa, nove na okukala metwokumwe nomifikamhango daKalunga. Ovo ve lidilulula ova ulika kutya ove na eitavelo monghundana iwa i na sha nOuhamba womonakwiiwa.

Oshikalimo shomushangwa waMarkus 1:15

Jesus okwa li a popya eendjovo odo pehovelo loukalele waye muGalilea. “Okudja opo,” okwa li a udifa kombinga yOuhamba waKalunga ngaashi sha popiwa muMateus 4:17. Ouhamba oo, oo wa li enenediladilo loukalele waJesus. Ouhamba owa popiwa lwoikando i dulife 100 mOmavaengeli * ane, unene tuu meendjovo odo da popiwa kuJesus. MOmbiibeli, Jesus okwa popya unene kombinga yOuhamba waKalunga shi dulife oikundafanwa imwe.

Lesha Markus etukulwa 1 pamwe nomashangelo opedu oo a yelifa, omaulikokwatakanifo, omafano nosho yo okaalita.

^ okat. 6 Ouhamba waKalunga epangelo la dikwa po kuKalunga lomeulu, olo tali ka wanifa po ehalo laye kombada yedu. (Daniel 2:44; Mateus 6:10) Opo u mone ouyelele muhapu, tala oshitukulwa “Ouhamba waKalunga oshike?”

^ okat. 7 Jesus okwa li e na okuninga ohamba opo a wanife po onghandangala yaye imwe e li Messias omuudanekwa, e li omupopikalelipo waKalunga e likalekelwa. Opo u mone ouyelele muhapu u na sha nomaxunganeko Ombiibeli oo a popya kombinga yaJesus e li Messias, tala oshitukulwa “Omaxunganeko opaMessias otaa holola ngoo kutya Jesus oye Messias?”

^ okat. 10 Omavaengeli omambo otete ane Omishangwa dopaKriste dOshigreka, oo haa ifanwa Etestamenti Lipe, oo a hokolola onghalamwenyo yaJesus nosho yo oilonga yaye yokuudifa