Kala nee wa fa u wete Job e li omutumba, e na oidinda kolutu laye alishe, a fidimika omutwe waye noita dulu okulidenga eedi odo de mu uvila. Okwa li a nyika oluhodi nokwa pongola molwaashi ka li vali ha dulu okulonga sha, kakele ashike kokulinyaya nokakangwa. Okwa li a kanifa shihapu, novanhu ovo va li ve mu fimaneka ova ka kala ve mu tonde. Ookaume kaye, ovashiinda novapambele ova li ve mu liteeka. Ovanhu, nokuli nounona, ova li have mu sheke. Okwa li ta diladila kutya Kalunga kaye, Jehova, naye okwe mu hauluka, ashike osho a li ta diladila osha puka. — Job 2:8; 19:18, 22.

Kalunga okwa popya shi na sha naJob a ti: “Kombada yedu kaku na nande umwe ngaashi ye.” (Job 1:8) Oule womafelemido, Jehova okwa kala a tala ko Job omuyuki e dule ovanhu aveshe ovo va li ovayuki. — Hes. 14:14, 20.

Mbela naave owa taalela omaupyakadi? Ehokololo laJob otali dulu oku ku hekeleka neenghono. Otali dulu yo oku ku kwafela u shiive kutya ovapiya vaKalunga aveshe ovadiinini ova pumbwa oukwatya woudiinini. Ovanhu ohava ulike oudiinini wavo kuKalunga ngeenge ve mu liyandjela filufilu nokutwikila okulonga ehalo laye nokuli nonande ove li meenghalo didjuu. Natu ka taleni osho hatu lihongo mehokololo laJob.

Osha fa shi li ngaha kutya konima yefyo laJob, omulumenhu omudiinini Moses okwa li a shanga ehokololo li na sha nonghalamwenyo yaJob. Moses ka li ashike a nwefwa mo a shange kombinga yoiningwanima yokombada yedu oyo ya li ya kuma Job, ndele okwa li yo a shanga oiningwanima imwe oyo ya ningwa meulu.

Ehokololo li na sha naJob ola popya pehovelo kutya okwa li e na onghalamwenyo ya denga mbada. Okwa li omulumenhu a punapala, a shiivika nawa nokwa fimanekwa muUs, osho shi li kolundume laArabia. Okwa li ha kwafele eehepele nokwa li ha amene ovo ihava dulu okuliamena. Job nosho yo omukulukadi waye ova li va pewa oshali younona omulongo. Komesho yaaishe, okwa li e na ekwatafano liwa naJehova. Ngaashi ovapambele vaye, Abraham, Isak, Jakob nosho yo Josef, naye okwa li ha kendabala okuhafifa Jehova. Ngaashi ooxekulululwa, okwa li a katuka ngaashi omupristeri mokuyandja omayambo pandjikilile pamwe noukwaneumbo waye. — Job 1:1-5; 31:16-22.

Konima eshi omushangi a popya oiningwanima yokombada yedu i na sha naJob, okwa ka popya yo kombinga oiningwanima yomeulu. Otwa nofelwa ko kashona kwaasho sha li tashi ningwa meulu nosho yo osho Job a li ehe shii. Ovaengeli ovadiinini ova li va ongala koshipala shaKalunga, nomweengeli omunashibofa, Satana, okwa li e va waimina opo va li va ongalela. Jehova okwa li e shii kutya Satana oku tonde omulumenhu omuyuki Job, onghee okwa li a popya naSatana shi na sha noudiinini waJob. Satana okwa nyamukula nodino, a ti: “U shii Job ota tila Kalunga ongaho? Ove mwene, ndishi, we mu amena keembinga adishe neumbo laye naaishe e i kwete.” Satana oku tonde ovo hava kanyatele oudiinini wavo. Ngeenge tava longele Jehova Kalunga oye aeke nomutima aushe, ohava nyaneke pomutenya kutya Satana omukengeleledi noku liholemwene. Onghee Satana okwa li ta lundile Job kutya ota longele ashike Kalunga omolwouwa oo he mu ningile. Satana okwa popya kutya ngeenge Job okwa kanifa oinima aishe oyo a li e na, ote ke liteeka po Jehova. — Job 1:6-11

Job ka li e shi shii, ashike Jehova okwa li e mu pa omhito opo a ulike kutya Satana omunaipupulu. Satana okwa li a pitikwa a kufe po oinima aishe yaJob, kakele koku mu etela oshiponga kolutu. Onghee Satana okwa li a hovela neemhangela daye dikolokoshi. Moule ashike wefiku limwe, Job okwa li a ningilwa oinima inyanyalifi. Okwa li a lombwelwa kutya oimuna yaye, tete eengobe neendongi, nolwanima eedi nosho yo eengamelo, oya dipawa po. Natango, nokuli novapiya ovo va li have i file oshisho navo ova dipawa. Omutumwa okwa li a lombwela Job kutya oimuna nosho yo ovapiya vaye ova dipawa ‘komundilo waKalunga.’ Ofimbo Job a li ta diladila shi na sha nedipao lovanhu aveshe ovo nonokutya paife ye okwa li ohepele, opa li pa ningwa sha vali shimwe shinyikifa oluhodi neenghono. Ofimbo ovana vaye omulongo va li keumbo loshiveli shavo, okwa dja omhepo inene oyo ya denga nokuhanauna po eumbo nova fila mo. — Job 1:12-19.

Oshidjuu okudiladila nghee Job a li e udite. Okwa li a pombaula oshikutu shaye shokombada, a kulula ko eexwiki daye dokomutwe, nokwa wila poshi. Job okwa li a fika pexulifodiladilo kutya Kalunga oye e i mu pele, naKalunga oye e i kufa po. Satana okwa ningifa oiponga oyo i monike ya fa ngeno ya etifwa kuKalunga. Ndele nande ongaho, Job ine liteeka po Kalunga ngaashi Satana a li ta diladila. Ponhele yaasho, okwa ti: “Edina lOmwene nali hambelelwe!” — Job 1:20-22.

Satana okwa li a fula onya, noka li a hala okusholola. Okwa li a holoka natango koshipala shaJehova ofimbo a li a ongala novaengeli. Natango Jehova okwa li a tanga Job omolwoudiinini waye oo a kanyatela nonande okwa li a ponokelwa kuSatana. Satana okwa nyamukula a ti: “Oshipa omoshipa! Omunhu keshe osho e shi na, te shi yandjele omwenyo waye. Ndele shamha to nane eke loye u kume omakipa aye nombelela yaye, ndele ye ote ke ku liteeka shili moipafi yoye!” Satana okwa li a tomhwa kutya ngeenge Job okwa ehama, ote ke liteeka po Kalunga. Jehova okwa li e lineekela Job filufilu; okwa li a efa Satana a etele Job oudu, ashike ine mu dipaa. — Job 2:1-6.

Diva, Job okwa li a kwatwa koudu ngaashi sha popiwa metetekelo. Omukulukadi waye okwa li a nyika oluhodi. Okwa hangwa nale a nyika oluhodi eshi ovana vavo omulongo va fya, paife okwa li e na okutala omushamane waye ta mono oixuna noita dulu okulikwafela. Okwa popya a ti: “Natango tuu to anyene mo mouyuki woye? Efa Kalunga u fye!” Omukulukadi waJob haye ngeno wa teelela oye a popye oinima i fike opo. Job okwa ti osho a li ta popi kashi li pandunge. Ndele nande ongaho, Job ine liteeka Kalunga. Ina popya sha shii nomilungu daye. — Job 2:7-10.

Mbela ou shi shii ngoo kutya ehokololo eli linyikifa oluhodi ole ku kuma pauhandimwe? Satana ka li a ashike a popya shi na sha naJob ndele okwa kwatela mo ovanhu aveshe. Okwa ti: “Omunhu keshe osho e shi na, te shi yandjele omwenyo waye.” Noitya imwe, Satana okwa li a hala okutya itatu dulu e okukala ovadiinini kuJehova filufilu. Okwa ti ku hole Kalunga shili, noto ke mu liteeka po mepakumo leisho opo u xupife omwenyo woye. Paulelalela, Satana ota ti kutya ou liholemwene ngaashi ashike ye! Mbela owa hala oku mu ulikila kutya ye omunaipupulu? Keshe umwe womufye oku na omhito ya tya ngaho. (Omayeletumbulo 27:11) Natu ka taleni kutya Job okwa ka shakeneka vali eshongo lilipi.

Ombiibeli oya ti kutya ovalumenhu ovo vatatu ova li ve shii Job, va li ookaume kaye, va li va uda osho a li a ningilwa nova li ve uya kuye ve mu hekeleke. Kava li ve mu dimbuluka okudja kokule. Olupe laJob ola li la lunduluka filufilu molwaashi oshipa shaye osha li sha laula koudu oo a li e na. Ovalumenhu ovo vatatu, Elifas, Bildad naSofar, ova li tave liningifa va fa va nyika oluhodi mokulila mokule nokuliunda ondwi komitwe davo. Ova li va kala omutumba puJob nokava li va popya sha. Ova kala oule woshivike, omutenya noufiku, va kalela ashike Job noina va makuka. Ovalumenhu ovo kava li va mwena molwaashi va hala okuhekeleka Job, molwaashi kava li ve mu pula sha shi na sha nomaupyakadi aye nonande ova li ve wete kutya oku li mouyahame. — Job 2:11-13; 30:30.

Hauxuninwa, Job okwa li a hovela okulipopila. Okwa li a popya nghee ta yahama neenghono, nokwa finga efiku a dalelwe. Opo nee okwa popya kutya omolwashike a li e uditile ngaho. Okwa li e shii ngeenge Kalunga oye omweetifi wokumona oixuna kwaye. (Job 3:1, 2, 23) Nonande Job okwa li e na eitavelo muKalunga, okwa li natango a pumbwa ehekeleko. Ashike eshi ookaume kaye va hovela okupopya, Job otashi dulika a li te lipula kutya ngeno oshixwepo va mwenene. — Job 13:5.

Elifas, oo a li omukulunhu nokuli nokuJob, okwa li a hovela okupopya. Mokweendela ko kwefimbo, navakwao vavali osho va hovele okupopya. Ohatu dulu okutya kava li tava tomhafana pandunge ngaashi Elifas. Oinima imwe oyo ya popiwa kovalumenhu ovo otai monika inai nyika oshiponga, ngaashi outumbulilo oo kutya Kalunga oha tokola ovo ihava longo ouyuki nokunangeka noupuna ovo hava longo ouwa. Okudja eshi va hovela okupopya, eendjovo davo oda ulika kutya kava li ve na ko nasha naJob. Elifas okwa li a fika pexulifodiladilo kutya Kalunga ota tokola Job molwaashi tashi dulika e na osho a ninga shapuka. — Job 4:1, 7, 8; 5:3-6.

Job ka li a tambula okudiladila kwa tya ngaho. Okwa li e ku anya filufilu. (Job 6:25) Ashike ookaume kaye vatatu ova li va tomhwa kutya Job oku na osho a ninga nota kendabala oku shi holeka; okwa wana okumona oixuna. Elifas okwa li a ula Job kutya oku na ounhwa, omukolokoshi noke na etilokalunga. (Job 15:4, 7-9, 20-24; 22:6-11) Sofar okwa lombwela Job kutya na efe po okulonga owii nonokutya ina hafela okunyona. (Job 11:2, 3, 14; 20:5, 12, 13) Ofimbo Bildad a popya oshinima shiyahameka neenghono. Okwa ti kutya ovanamati vaJob navo ova nyona, nomolwaasho va fya. — Job 8:4, 13.

Ovalumenhu ovo ova li va ninga vali oshinima shimwe. Ova ti Job ka li omudiinini shili kuKalunga nonokutya itashi kwafa sha okuninga eenghendabala a kale omudiinini kuye. Elifas okwa popya meendjovo daye kutya okwa shakeneka oshishitwa shopamhepo. Nokwa li a fika pexulifodiladilo kutya: Kalunga “ite lineekele ovapiya vaye, nomovaengeli vaye ota mono ombedi.” Ngeenge osho shi li ngaho, osha hala okutya kape na omunhu ta dulu okuhafifa Kalunga. Lwanima, Bildad okwa ti Kalunga ke na ko nasha noudiinini waJob ngaashi ashike ehe na ko nasha noshiyokashi. — Job 4:12-18; 15:15; 22:2, 3; 25:4-6.

Mbela owa kendabala ngoo nale okuhekeleka omunhu oo ta mono oixuna? Kashi fi shipu nandenande. Ashike ohatu lihongo shihapu kookaume kaJob shi na sha naasho tuhe na okupopya. Ovalumenhu ovo inava tumbula nande Job kedina, ova kala ashike tava popi nokutomhafana oinima ihe na xulo nafina! Kava li ve na ko na sha kutya omutima waJob owa li wa tekauka nokava li ve wete sha fimana okupopya naye nonghenda. * Ngeenge umwe oo u hole okwa nyika oluhodi, kendabala okuulika kutya ou na ko nasha naye nokuungaunga naye nonghenda. Kendabala oku mu kwafela a pameke eitavelo laye noku mu ladipika a kale e lineekela muKalunga nonokutya ote ke mu fila onghenda nota ka yukifa oinima. Mbela ngeno ookaume kaJob ovo va li monghalo ya fa oyo, ngeno naye osho ngoo a ungaunga navo ngaho? (Job 16:4, 5) Job okwa li e linyenga ngahelipi nonande ova twikila okuyeleka oudiinini waye?

Job okwa li nale a polimana ofimbo ookaume kaye inave uya kuye. Okudja pehovelo, okwa popya kutya eendjovo daye oda “puka,” nodi li “eendjovo daau ehe nelineekelo.” (Job 6:3, 26) Naasho oshi shii okuudiwa ko. Eendjovo daye otadi ulike kutya okwa nyika oluhodi. Osho otashi ulike yo kutya ka li e shii osho tashi ningwa po. Oinima oyo ya ningilwa Job noukwaneumbo waye oya li tai ningwa ombaadilila notai monika ya fa ihe li paushitwe, nomolwaasho a fika pexulifodiladilo kutya Kalunga oye omweetifi woinima aishe oyo. Okwa li a fika pexulifodiladilo olo la puka molwaashi ka li e shii kutya oshike naanaa sha kwatelwa mo.

Ashike, Job okwa li omulumenhu e na eitavelo linene nola pama. Eitavelo laye ola li liwetikile mwaasho a li a popya nookaume kaye, neendjovo odo otadi tu omukumo kunena. Okwa li a popya oinima i na sha neshito oyo a li ita dulu okushiiva, okuninga Jehova oye e i mu hololela. Pashihopaenenwa, okwa ti Jehova okwa “endjelelifa edu ponhele pehe na sha,” oshinima osho ovanongononi ve ke shi didilika konima yomafelemido. * (Job 26:7) Eshi Job a popya shi na sha nonakwiiwa, okwa ulika kutya naye okwa li e na eteelelo la faafana naalo lovapiya vaKalunga ovadiinini. Okwa li a itavela kutya ngeenge okwa fi, Kalunga ote mu dimbuluka, te mu djuulukwa noku ke mu nyumunina vali momwenyo. — Job 14:13-15; Ovaheberi 11:17-19, 35.

Ongahelipi shi na sha nomhata youdiinini? Elifas nookaume kaye vavali ova li va popya kutya okukala omudiinini kuKalunga itashi kwafa sha. Mbela Job okwa li a tambula ko ediladilo olo la puka? Hasho nandenande! Job okwa li a ulika kutya oudiinini owa fimana kuKalunga. Okwa lombwela Jehova a ti: ‘Kalunga oku shii ouyuki wange.’ (Job 31:6) Shikwao vali, Job okwa li a mona kutya okutomhafana kwa puka kwovahekeleki ovanaipupulu oku li onghedi yokuyeleka oudiinini waye. Osho osha li she linyengifa Job a popye eendjovo diledile odo nokuli da ningifa ovalumenhu ovo va kale ashike va mwena ponhele yokupopya.

Job okwa li e shii kutya oudiinini waye owa kwatela mo osho ha ningi efiku keshe. Okwa li a popya nghee a kala omudiinini mukeshe shimwe osho a li ha ningi. Pashihopaenenwa, ka li ha longele oikalunga; okwa li ha ungaunga navamwe nonghenda nosho yo nefimaneko; okwa li a koshoka paenghedi; okwa li a fimaneka ohombo yaye; naasho sha fimanenena, okwa li omudiinini kuJehova, Kalunga kashili. Nomolwaasho Job a dula okupopya tashi di komutima a ti: “Fiyo handi ka fuda mo omufudo wange, itandi ekeleshi po ouyuki wange.” — Job 27:5; 31:1, 2, 9-11, 16-18, 26-28.

Mbela naave owa tala ko oudiinini wa fimana ngaashi Job? Job okwa li e shii kutya inashi wana ashike okutya fye ovadiinini, ndele otu na yo oku shi ulika moilonga yetu. Ohatu ulike kutya ohatu longele Kalunga nomutima aushe mokudulika kuye nokulonga osho sha yuka monghalamwenyo nonande otwa taalela omaudjuu. Ngeenge otwa kala nonghalamwenyo ya tya ngaho, ohatu ka hafifa Jehova ngaashi Job a li a ninga, nokungaho omutondi waye, Satana, ota ka kala a handuka. Ei oyo onghedi ya denga mbada yokuhopaenena eitavelo laJob!

Ehokololo laJob hapo la xulila opo. Ka li e na ondjele, okwa li ta yandje elitulemo kokuulika kutya ye omuyuki ndele ta dimbwa kutya okwa li e na okupopila edina laKalunga. Okwa li a pumbwa okupukululwa nokutala ko oinima ngaashi Jehova he i tale ko. Okwa li natango ta yahama, a nyika oluhodi nokwa li a pumbwa ehekeleko lashili. Mbela Jehova ota ka ningila shike omulumenhu ou omolwoudiinini waye? Oshitukulwa shimwe shomoitukulwa ei ya pambafana otashi ka nyamukula epulo olo.