Ondiaboli oya fa peni?

DANA

Enyamukulo lopaMbiibeli

Ondiaboli oshishitwa shopamhepo osho ihashi dulu okumonika nomesho okomutwe. — Ovaefeso 6:11, 12.

Ovanhu vahapu ovo hava faneke ohava faneke Satana a fa oshikombo, e na eembinga, omushila nefoloko la kula meke laye. Ovanhu vahapu ova itavela kutya efano olo lOndiaboli ola li la fanekwa tete kovafaneki ovo va li ko omido di dulife 1000, ovo va li va nwefwa mo komufyuululwakalo nosho yo komaitavelo onale.

Ombiibeli oya yelifa ngahelipi Ondiaboli?

Ombiibeli oya popya meenghedi dihapu Ondiaboli momufefifo. Osho otashi tu kwafele tu udite ko oukwatya waye, ndele kali fi eholokepo laye. Dimwe domomifefifo ongaashi:

Omweengeli muwa. Ohe liningifa a fa ha etele ovanhu omauwa onhumba opo e va ningife va shikule omahongo aye ponhele yokushikula omahongo aKalunga. — 2 Ovakorinto 11:14.
Onghoshi tai kumbu. Oha ponokele nonyanya ovapiya vaKalunga. — 1 Petrus 5:8.
Ongadu inene. Oha mbadapaleke, omunaenghono nomuhanauni. — Ehololo 12:9.

Eevelishe dOmbiibeli odo da popya kombinga yOndiaboli

2 Ovakorinto 11:14: “Itashi kumwifa eshi Satana naye he lifefa omweengeli muwa.”

Sha hala kutya: Ohe liningifa a fa ha etele ovanhu omauwa onhumba opo e va ningife va shikule omahongo aye ponhele yokushikula omahongo aKalunga.
Ovaefeso 6:11: “Djaleni oilwifo aishe oyo mwa pewa kuKalunga opo mu dule okukondja mwa pama muha yulwe kOndiaboli.”

Sha hala kutya: Ondiaboli ohai kengelele ovanhu vaha dulika kuKalunga.
Jakob 4:7: “Dulikeni kuKalunga; kondjifeni Ondiaboli, ndele tai mu i onhapo.”

Sha hala kutya: Omunhu otaka finda eemwiyo daSatana ngeenge okwa kala ha dulika kuKalunga ponhele yokudulika kOndiaboli.
1 Petrus 5:8: “Osheshi omutondi weni, Ondiaboli, ohe mu dingilile ngaashi onghoshi tai kumbu ya hala okuxwaka po umwe.”

Sha hala kutya: Ondiaboli oi tonde ovo hava dulika kuKalunga noya hala okuteya po oukaume wavo naYe.