Omalongelokalunga amwe ohaa longifa “Saint Michael,” tava ulike kuMikael, edina olo la pewa Jesus, ofimbo ine uya kombada yedu nokonima eshi a shuna meulu. a Mikael okwa li a twa omhata naSatana eshi Moses a fya nokwa li a kwafela omweengeli a twale etumwalaka laKalunga komuprofeti Daniel. (Daniel 10:13, 21; Judas 9) Mikael oku li metwokumwe nedina laye olo tali ti, “Olyelye a fa Kalunga?,” eshi ha popile ounamapangelo waKalunga nokulwifa ovatondi vaKalunga. — Daniel 12:1; Ehololo 12:7.

 Diladila kutya omolwashike shi li pandunge okufika pexulifodiladilo kutya Jesus oye omweengeli omukulunhu Mikael.

•   Mikael oye “omweengeli omukulunhu.” (Judas 9) Outumbulilo “omweengeli omukulunhu,” owa hala okutya “omukulunhu wovaengeli” nowa holoka ashike meevelishe mbali dOmbiibeli. Meevelishe adishe dopavali, outumbulilo oo owa holoka mo paushimwe, ta ulike kutya ondodo oyo oya nuninwa ashike omweengeli umwe. Imwe yomeevelishe odo oya popya kutya Omwene Jesus omunyumunwa “ota ka ifana okudja meulu nondaka ya kola yomweengeli omukulunhu.” (1 Ovatessaloniki 4:16) Jesus oku na “ondaka ya kola yomweengeli omukulunhu,” molwaashi oye omweengeli omukulunhu, Mikael.

•   Mikael oha wilike etangakwaita lovaengeli. “Mikael novaengeli vaye ova lwifa ongadu,” Satana. (Ehololo 12:7) Mikael oku na eenghonopangelo dinene e dule oishitwa yopamhepo, nomolwaasho ha ifanwa e li “umwe womovaengeli ovakulunhu” nosho yo “omweengeli omukulunhu munene.” (Daniel 10:13, 21; 12:1) Omadinafimaneko oo okwa ningifa Mikael a kale “omuwiliki munene wetangakwaita lovaengeli,” ngaashi Etestamenti Lipe lomuhongwanhu David E. Aune le shi popya.

   Ombiibeli oya popya vali edina limwe laumwe, oo e na eenghonopangelo metangakwaita lovaengeli. Oya popya ya ti: ‘Omwene Jesus ta ka holoka okudja meulu pamwe novaengeli vaye ovanaenghono, e na omundilo wa xwama nokwa handuka.’ (2 Ovatessaloniki 1:7, 8; Mateus 16:27) Jesus ‘okwa ya meulu, onghee ovaengeli, ovapangeli novanaenghono otava dulika kuye.’ (1 Petrus 3:21, 22) Onghee hano, inashi yuka kuKalunga okunangeka po Jesus nosho yo Mikael, va kale tava shilafana ve li ovawiliki vovaengeli vayapuki. Ponhele yaasho, oshi li pandunge okufika pexulifodiladilo kutya omadina aeshe, Jesus nosho yo Mikael, otaa ulike komunhu umwe.

•   Mikael ‘ota ka fikama pefimbo lidjuu’ inali pangelwa. (Daniel 12:1) Membo laDaniel, outumbulilo “holoka,” ile tu tye fikama, luhapu owa longifwa tau ulike kohamba oyo ya holoka i katuke onghatu ye likalekelwa. (Daniel 11:2-4, 21) Jesus Kristus, oo e li “Ondjovo yaKalunga,” ota ka katuka onghatu ye likalekelwa e li “Ohamba yeehamba” a hanaune po ovatondi aveshe vaKalunga noku amena oshiwana shaKalunga. (Ehololo 19:11-16) Osho ote ke shi ninga pefimbo ‘loudjuu munene oo inau kala ko nale okudja pehovelo lounyuni.’ — Mateus 24:21, 42.