Vahapu ovo hava pula omapulo a tya ngaho otashi dulika va kanifa oinima yavo ihapu neenghono, noitava kongo ashike omanyamukulo omapulo oo, ndele nehekeleko yo. Vamwe ove udite kutya oiponga inyanyalifi ohai holoka omolwowii wovanhu oo wa lunda pombada, naasho oshe shi ningifa shidjuu kuvo okwiitavela muKalunga.

 Omutotolombo: Osha puka okupula kutya omolwashike Kalunga a efa pa holoke oiponga inyanyalifi.

 Oshili: Ovanhu ovo ve na eitavelo la kola muKalunga ova kala hava pula kutya omolwashike Kalunga a efa owii u kale po. Pashihopaenenwa, omuprofeti Habakuk okwa li a pula Kalunga ta ti: “Oshike Ove ho talifa nge osho inashi yuka, ndele ndi nokutala eshunduko?” (Habakuk 1:3) Ponhele yokuhandukila Habakuk, Kalunga okwa shangifa omapulo oo a pulwa kuHabakuk mOmbiibeli, opo keshe umwe e a leshe.

 Omutotolombo: Kalunga ke na ko nasha nokumona oixuna kwovanhu.

 Oshili: Kalunga oku tonde owii nokumona oixuna oko haku etifwa kuo. (Omayeletumbulo 6:16-19) Pefimbo laNoa, Kalunga okwa li a “yehama momutima waye” omolwoukolokoshi oo wa li wa hapupala kombada yedu. (Genesis 6:5, 6) Nopehe na omalimbililo, Kalunga oha kala e uditile nai oiponga inyanyalifi oyo hai ningwa. — Malakia 3:6.

 Omutotolombo: Kalunga okwa li a longifa oiponga inyanyalifi a handukile Ovajuda.

 Oshili: Kalunga okwa li a efa Jerusalem shi hanaunwe po kOvaroma mefelemudo lotete. (Mateus 23:37–24:2) Ashike okudja opo, Kalunga ina kala vali ha yoolola mo oshiwana shonhumba, molwaashi e shi hokwa, ile e shi handukila. Pataleko laKalunga, “kape na eyooloko pokati kOmujuda nOmugreka.” — Ovaroma 10:12.

 Omutotolombo: Ngeno Kalunga omunahole nomunaenghono adishe oko a li shili, ngeno okwa kelela oiponga i nyanyalifi.

 Oshili: Nonande Kalunga haye ha etifa okumona oixuna, omafimbo amwe oha efa ku holoke po pakafimbo. — Jakob 1:13; 5:11.

 Kalunga oha efa oiponga i ningwe netomheno la faafana naalo a efa okumona oixuna kwovanhu ku kale po, opo ku pongololwe po omhata i na sha nelihumbato, oyo ya li ya etwa po okudja nale. Ombiibeli otai ulike kutya paife Kalunga haye ta pangele ounyuni, ndele Ondiaboli. (Lukas 4:1, 2, 6; Johannes 12:31) Ope na eeshili mbali dopaMbiibeli odo tadi tu yelifile kutya omolwashike Kalunga ha pitike oiponga inyanyalifi i ningwe.

1.   Kalunga okwa shita ovanhu ve na emanguluko lokuninga omatokolo. Kalunga okwa li a lombwela ovanhu votete, Adam naEva, osho a teelela va ninge, ashike ine va fininika va dulike. Ova li ve na okuhoolola vo vene pokati kaasho shi li mondjila naasho sha puka. Ova li va hoolola po osho sha puka, ngaashi ashike ovanhu va kala hava hoolola mondjokonona, osho sha etela ovanhu oilanduliko i nyanyalifi. (Genesis 2:17; 3:6; Ovaroma 5:12) Osho osha faafana ashike naasho sha popiwa membo lo-Statement of Principles of Conservative Judaism, olo la ti: “Okumona oixuna kuhapu oko ku li mounyuni okwa etifwa kokulongifa nai emanguluko olo twa pewa.” Ponhele yoku tu kufa emanguluko, Kalunga okwa pa ovanhu efimbo va kale tava ningi oinima kuvo vene va manguluka ko kuye.

2.   Kalunga ota dulu nota ka xulifa po omaupyakadi aeshe oo a etifwa koiponga inyanyalifi. Kalunga okwa udaneka kutya ota ka alulila momwenyo ovanhu omamiliyona ovo va fya, mwa kwatelwa ovo va li va ninga oihakanwa yoiponga inyanyalifi. Ota ka kufa po yo ouyahame noilanduliko yomaliudo mai, oo a etifwa koiponga inyanyalifi aavo va xupa moiponga ya tya ngaho. (Jesaja 65:17; Oilonga 24:15) Ohole yaKalunga yokuhola ovanhu oyo tai shilipaleke kutya ota ka wanifa po omaudaneko oo. — Johannes 3:16.

 Vahapu ovo va li oihakanwa yoiponga inyanyalifi nova xupa, ova dula okutwikila ve na eitavelo muKalunga nove na onghalamwenyo tai ti sha, molwaashi ove udite ko kutya omolwashike Kalunga a pitika owii u kale po, nonghee ta lalakanene oku ka kufa po oilanduliko oyo ya etifwa kuo.