Ombiibeli otai ulike kutya osha yuka okukala u lihole mwene, shimha to shi ningi pandjele. Osho osha kwatela mo okulifila oshisho, okulifimaneka nosho yo okukala u udite u na oshilonga. (Mateus 10:31) Ponhele yokutwa omufindo ohole yokulihola mwene, Ombiibeli oya popya kombinga yavamwe ovo tu na okukala tu hole.

Olyelye tu na okukala tu hole tete?

1.   Tetetete, otu na okukala tu hole Kalunga. Ombiibeli oya ti kutya oshipango shotete shinene osho: “Hola Omwene Kalunga koye nomutima woye aushe.” — Markus 12:28-30; Deuteronomion 6:5.

2.   Oshipango oshitivali shinene osho: “Hola mukweni ngaashi u lihole mwene.” — Markus 12:31; Leviticus 19:18

3.   Nonande Ombiibeli inai popya kondadalude kutya natu kale tu lihole fye mwene, oshipango “hola mukweni ngaashi u lihole mwene” otashi ulike kutya oshi li paushitwe okukala u lihole mwene, okulifimaneka, noshi na ouwa.

Jesus okwa li e hole lyelye tete?

 Jesus okwa li a ulika pandjele ohole yokuhola Kalunga, yokuhola vamwe nosho yo ohole yokulihola mwene; okwa li yo a lombwela ovahongwa vaye va shikule oshihopaenenwa shaye. — Johannes 13:34, 35.

1.   Okwa li e hole Jehova Kalunga tete nokwa li e liyandja a wanife po oshilonga osho a pewa kuYe. Okwa ti: “Ounyuni ou opo u shiive nokutya, Ame ondi hole Tate, . . . ohandi ningi ngaashi Tate a lombwela nge.” — Johannes 14:31.

2.   Jesus okwa li e hole ovanhu, nokwe shi ulika e shi a fila oshisho eemhumbwe davo nokuli fiyo oposhitwa shokuyandja omwenyo waye. — Mateus 20:28.

3.   Okwa li a ulika pandjele ohole yokulihola mwene eshi a li a konga efimbo lokufuda po, lokulya nosho yo okuhafela pamwe novashikuli vaye, mwa kwatelwa naavo va li tava ka ninga ovahongwa vaye komongula. — Markus 6:31, 32; Lukas 5:29; Johannes 2:1, 2; 12:2.

Mbela osha hala kutya okukala u hole vamwe komesho yoye mwene otashi nyono po ehafo loye ile okuhakala we lifimaneka?

 Ahawe, fyeni otwa shitwa oshifefa shaKalunga, oo e na oukwatya wokuhelihola mwene. (Genesis 1:27; 1 Johannes 4:8) Osho osha hala kutya otwa shitwa tu ulikile vamwe ohole. Ohatu dulu okukala tu lihole mwene, ashike ohatu kala twa hafa molwaashi otu hole Kalunga komesho yaaishe nokuningila vakwetu ouwa. Ombiibeli oya ti kutya, “okuyandja oku nelao komesho yokutambula.” — Oilonga 20:35.

 Ovanhu vahapu kunena ohava ti kutya opo u kale wa hafa shili, ou na okukala u lihole mwene. Ovanhu va tya ngaho ve lihole vo vene shi dulife vakwao. Ashike ovakonakoni vonghalonawa ova dimina kutya ovo hava shikula nokutula moilonga omayele Ombiibeli oo taa ti, “inapa kala ou ta kongo ouwa waye mwene, ndelenee keshe umwe na konge ouwa wamukwao,” ovo va hafa nove na oukolele. — 1 Ovakorinto 10:24.