Oita yaArmagedon otai ulike koita yaxuuninwa, oyo tai ka kala pokati komapangelo opanhu naKalunga. Omapangelo a tya ngaho nosho yo ovayambididi vao ohaa pataneke Kalunga nokuli nopaife, nokwaanya okudulika keenghonopangelo daye. (Epsalme 2:2) Oita yaArmagedon otai ka xulifa po omapangelo opanhu. — Daniel 2:44.

 Oshitya “Armagedon” osha holoka mo ashike lumwe mOmbiibeli, mEhololo 16:16. Ehololo ola popya paxunganeko tali ulike kutya konhele “hai ifanwa mOshiheberi Armagedon,” oko ‘eehamba adishe dokombada yedu’ tadi ka ‘ongalekwa opo di ka lwe oita mefiku linene laKalunga Omunaenghono adishe.’ — Ehololo 16:14.

 Oolyelye tava ka lwa puArmagedon? Jesus Kristus ota ka kwatela komesho etangakwaita lomeulu, olo tali ka finda ovatondi vaKalunga. (Ehololo 19:11-16, 19-21) Ovatondi ovo ova kwatela mo ovo ve li omhinge neenghonopangelo daKalunga nohava ungaunga naKalunga nodino. — Hesekiel 39:7.

 Mbela oita yaArmagedon otai ka luwa lelalela kOushilo woPokati? Ahowe. Ponhele yokulwilwa ponhele imwe, oita yaArmagedon otai ka luwa kombada yedu alishe. — Jeremia 25:32-34; Hesekiel 39:17-20.

 Armagedon, osho omafimbo amwe hashi ifanwa “Har–Magedon” (mOshihaberi Har Meghiddohnʹ), otashi ti “Omhunda yaMegido.” Megido osha li oshilando sha li moshitukulwa shaIsrael shonale. Ondjokonona oya popya kombinga yomalwoodi amwe, oo a li haa lwilwa ko, mwa kwatelwa amwe oo a tumbulwa mOmbiibeli. (Ovatokolipangeli 5:19, 20; 2 Eehamba 9:27; 23:29) Ashike Armagedon ita dulu okuyukifwa konhele yonhumba yolela i li moshitukulwa shaMegido shonale. Kaku na omhunda ya kula kwinya, nefilu laJisreel, olo li li ko, itaku ka wana aveshe ovo tava ka lwifa Kalunga. Ponhele yaasho, Armagedon onghalo younyuni omo oiwana tai ke limanga oukuni kumwe, opo i kondjife laxuuninwa eenghonopangelo daKalunga.

 Eenghalo otadi ka kala da tya ngahelipi pefimbo loita yaArmagedon? Molwaashi katu shii lela kutya Kalunga ota ka longifa ngahelipi eenghono daye, oku na okukala ta ka longifa oilwifo yaye oyo a longifile monakudiwa, ngaashi eemhawe, ekakamo ledu, oshikungulu, omundilo nosulfuri, omaluvadi noudu. (Job 38:22, 23; Hesekiel 38:19, 22; Habakuk 3:10, 11; Sakaria 14:12) Ovatondi vaKalunga vamwe otava ka dipaafana omolwengwangwano, ashike otava ka mona kutya mboli oKalunga te va lwifa. — Hesekiel 38:21, 23; Sakaria 14:13.

 Mbela oita yaArmagedon oyo exulilo lounyuni? Osho itashi ka xulifa po opulaneta yetu yedu, molwaashi edu olo olukalwa lovanhu laalushe. (Epsalme 37:29; 96:10; Omuudifi 1:4) Ponhele oita yaArmagedon i hanaune po ovanhu aveshe, vamwe otava ka xupa, molwaashi “ongudu inene” yovapiya vaKalunga otai ka xupifwa. — Ehololo 7:9, 14; Epsalme 37:34.

 Kakele kokupopya shi na sha nedu, oshitya “ounyuni,” osho sha popiwa mOmbiibeli, omafimbo amwe otashi ulike kovanhu, ovo ve li omhinge naKalunga. (1 Johannes 2:15-17) Osho osha hala okutya, Armagedon ota ka eta “exulilo lounyuni.” — Mateus 24:3, Ombiibeli yo-King James Version.

 Armagedon ote ke uya naini? Eshi Jesus a li ta kundafana shi na sha noudjuu munene, oo tau ka twala fiyo opoita yaArmagedon, okwa ti: “Ndele shi na sha nefiku olo novili, kape na nande oumwe e i shii, kutya nee ovaengeli vomeulu ile omona, ndele oTate aeke.” (Mateus 24:21, 36) Ashike Ombiibeli oya ulika kutya Armagedon ote ke uya pefimbo lokukala po kwaJesus ehe wetike, oko kwa hovela mo 1914. — Mateus 24:37-39.