Eendombwedi daJehova ihadi i koita omolwomatomheno taa shikula:

1.   Omolwokudulika kuKalunga. Ombibeli oya ti kutya ovapiya vaKalunga otava ka ‘hambula omaongamukonda omatemo. noitave lihongo vali oukwaita.’—Jesaja 2:4.

2.   Omolwokudulika kuJesus. Omuyapostoli Petrus okwa li a lombwelwa kuJesus kutya: “Shunifa mo eongamukonda loye moshilaleko shalo, osheshi aveshe ava tava kwata keongamukonda, otava fi keongamukonda.” (Mateus 26:52) Kungaho, Jesus okwa ulika kutya ovashikuli vaye kave na okulongifa oilwifo.

    Ovahongwa vaJesus ova li va dulika koshipango shaye shokukala ‘vehe fi vomounyuni,’ mokukala vehe na nandenande ombinga moinima yopapolitika. (Johannes 17:16) Ihava tukulile epangelo oshibofa ngeenge tali tokola okuya koita ile okukelela ovo va hala okuya moukwaita.

3.   Omolwohole yokuhola vamwe. Jesus okwa ladipika ovahongwa vaye va kale ve “holafane.” (Johannes 13:34, 35) Osho osha li tashi ka etifa po oumwainafana womounyuni aushe oo pehe na nande oumwe ta ka lwifa omumwaxe.—1 Johannes 3:10-12.

4.   Omolwoshihopaenenwa shOvakriste vonale. O-Encyclopedia of Religion and War oya ti: “Ovashikuli vaKristus vonale kava li hava yambidida oita noihava i moukwaita.” Ove shii kutya oshinima sha tya ngaho “itashi tu kumwe nohole youmwainafana oyo Jesus a popya nosho yo yokuhola novatondi vetu.” Sha faafana, Omuteologi umwe Omundowishi wedina Peter Meinhold okwa popya shi na sha novahongwa vaJesus a ti: “Osha li sha talika ko kutya omunhu ita dulu okukala Omukriste ngeenge omukwaita.

 Eendombwedi daJehova odi li lela ekwafo linene moulikumwe wovanhu noinadi nyika oshiponga moilongo omo di li. Oda fimaneka eenghonopangelo depangelo, naasho oshi li metwokumwe noshipango shOmbibeli eshi:

•   ‘Dulikeni kovapangeli ava have mu pangele.’—Ovaroma 13:1.

•   “Osho shomukesari, shi peni omukesari, naasho shaKalunga, shi peni Kalunga.”—Mateus 22:21.

 Onghee hano, ohatu dulika komhango, hatu futu oifendela nohatu longele kumwe nokudulika kepangelo eshi tali kendabala okukaleka ovakwashiwana monghalo iwa.