•  Eendombwedi daJehova ohadi shi mono ngahelipi kutya oshivilo shonhumba osha hokiwa kuKalunga, ile hasho?

•  Eshi Eendombwedi daJehova ihadi dana omafiku amwe omafudo, odi hole ngoo ovapambele vado?

•  Mbela Eendombwedi daJehova ohadi lombwele vamwe vaha dane omafiku amwe omafudo?

 Eendombwedi daJehova ofimbo inadi tokola okukufa ombinga mefiku lonhumba lefudo, ohadi tale tete kutya Ombiibeli otai ti ngahelipi. Omafiku amwe omafudo nosho yo osho sha kwatelwa mo oku li lela omhinge nomafinamhango Ombiibeli. Ngeenge tashi uya poivilo ya tya ngaho, Eendombwedi daJehova ihadi kufa ombinga. Ashike momafiku amwe omafudo, Ondombwedi keshe oi na okuninga ehoololo kuyo vene, nokukendabala okukala “neliudo la yela koshipala shaKalunga noshovanhu.” — Oilonga 24:16.

 Omapulo aa taa shikula oamwe omomapulo oo Eendombwedi daJehova hadi lipula, ngeenge tadi ningi etokolo li na sha nokukufa ombinga mefiku lonhumba lefudo. a

•   Mbela efiku lefudo eli ola kanghamena kehongo lihe li pamishangwa?

   Efinamhango lopaMbiibeli: “Jehova okwa ti: ‘Djeni mo mokati kavo nokuliyoolola mo. Inamu kuma osho sha nyata.’” — 2 Ovakorinto 6:15-17.

   Opo Eendombwedi daJehova di liyoolole ko komahongo inaa koshoka pamhepo, oo itaa tu kumwe naasho Ombiibeli tai ti, ihadi dana omafiku omafudo, oo a kwatela mo oinima tai shikula.

   Omafiku omafudo oo a kanghamena keitavelo lonhumba, ile kokulongela oikalunga. Jesus okwa ti: “Jehova Kalunga koye oye aeke u na okulinyongamena noye aeke u na okulongela oilonga iyapuki.” (Mateus 4:10) Molwaashi Eendombwedi daJehova ohadi shikula elombwelo olo, ihadi dana Okrismesa, Opaasa (o-Easter), ile Efiku lOvanailonga, molwaashi omafiku omafudo oo okwa kanghamena kokulongela oikalunga, ponhele yokulongela Jehova. Shikwao vali, ihadi kufa ombinga momafiku omafudo ngaashi aa taa shikula.

  •  Kwanzaa. Edina Kwanzaa “ola dja koutumbulilo wOshiswahili matunda ya kwanza, tashi ti ‘oshipe.’ Osho otashi ulike kutya efiku olo lefudo ola kanghamena komadano e na sha noshipe, oo a popiwa mondjokonona yaAfrika.” (Encyclopedia of Black Studies) Nonande vamwe ohava tale ko efiku lefudo Kwanzaa lihe fi lopalongelokalunga, o-Encyclopedia of African Religion oye shi yelekanifa noshivilo shomuAfrika, osho hashi ningwa pefimbo leteyo lotete. Oshipe osho “ohashi yandjwa kookalunga nokovakulu vonale shi li onghedi yoku va pandula.” Ola weda ko la ti: “Onghedi oyo oya faafana nayo yokuulika olupandu nehafo omolwomanangeko noupuna okukala nomwenyo omolwovakwamhungu ovo va kwatelwa mefiku lefudo lOvaafrika nOvamerika ledina, Kwanzaa.”

  •  Oshivilo Mid-Autumn. Osho “oshivilo shokufimaneka oshikalunga shomwedi.” (Holidays, Festivals, and Celebrations of the World Dictionary) O-Religions of the World—A Comprehensive Encyclopedia of Beliefs and Practices oya ti kutya osha “kwatela mo onghedi hai ningwa kOvachina, omo ovakulukadi vomeumbo hava tu eengolo va omutwe medu tava fimaneke oshikalunga.”

  •  Oshivilo Nauruz (Nowruz). O-United Nations Educational, Scientific and Cultural Organization oya ti: “Oshivilo osho osha dilila keitavelo lo-Zoroastrianism, noshi li shimwe shomomadano omafiku omokalindeli keitavelo lo-Zoroastrian sha talika ko shiyapuki elela. . . . Oshikwamhepo shokeematango, osho hashi ifanwa Rapithwin, osho kwa itavelwa kutya ohashi telwatelwashi koshi yedu koshikwamhepo shopokufu pefimbo leemwedi doutalala, osha li hashi hambelelwa nokutambulwa ko vali nomadano okomatango mefiku la-Nowruz pamufyululwakalo weitavelo lo-Zoroastrian.”

  •  Efiku lo-Shab-e Yalda. Embo Sufism in the Secret History of Persia ola ti kutya “edano eli lopoutalala oli na ekwatafano nelongelokalunga lo-Mithra,” oshikalunga shouyelele. Osha fa shi li ngaha kutya efiku olo otashi dulika li na ekwatafano nokulongela oikalunga yetango yOvaroma nOvagreka. b

  •  Efiku lOmapandulo. Embo A Great and Godly Adventure—The Pilgrims and the Myth of the First Thanksgiving ola ti: Ngaashi ashike efiku lo-Kwanzaa, efiku eli ola kanghamena kedano lefiku olo la li hali fimaneke oikalunga i lili noku lili. Ashike lwanima, “omadano oo opamufyuululwakalo okwa ka tambulwa ko keengeleka dopaKriste.”

   Omafiku omafudo amwe, oo a kanghamena kokunyanekela, ile komaitavelo e na sha nelao. Ombiibeli oya ti kutya “hamu dikile oshikalunga shelao oshililo” onye “ava tamu efa Omwene. (Jesaja 65:11) Onghee hano, Eendombwedi daJehova ihadi dana omafiku omafudo taa shikula:

  •  Efiku lo-Ivan Kupala. Embo The A to Z of Belarus ola ti: “She likolelela keitavelo olo la shiivika nawa, pefimbo opo [Ivan Kupala] ohapa kala eenghono dimwe dopaumhulile, odo hadi monika ngeenge ou na oupendafule, ile kelao.” Oshivilo osho osha li shoshipaani, nosha li hashi danwa pokwenye (koilongo yaEuropa). O-Encyclopedia of Contemporary Russian CultureOriginally oya ti kutya “lwanima eshi ovapaani va li va tambula ko Oukriste, ola li la mbwangwa mumwe nefiku lefudo lOngeleka [lokudimbuluka “efiku lomuyapuki” Johannes Omuninginifi].”

  •  Efiku lomudo mupe lo-Lunar (Efiku lomudo mupe lOvachina, ile lOmudo Mupe wOvakorea.) O-Mooncakes and Hungry Ghosts—Festivals of China oya ti: “Pefimbo olo, ohaku yandjwa unene elitulemo komaukwaneumbo, kookaume nokovapambele, opo va halelwe omayambeko, va fimaneke ookalunga, eemhepo nosho yo okuhalelafana elao momudo oo mupe.” Sha faafana, pa-Encyclopedia of New Year’s Holidays Worldwide, mefiku omudo mupe wOvakorea “ohamu ilikanwa ovakwamhungu, hamu tewatewa eemhepo dowii, hamu halelwa omudo mupe elao nokukendabala okumona kutya onakwiiwa yomudo oo mupe otai ka kala ngahelipi.”

   Omafiku omafudo, oo a kanghamena kediladilo kutya omwenyo ihau fi. Ombiibeli oya ulika sha yela kutya omwenyo ohau fi. (Hesekiel 18:4) Onghee hano, Eendombwedi daJehova ihadi dana omafiku omafudo taa shikula, molwaashi otaa xumifa komesho eitavelo lomwenyo ihau fi.

  •  Efiku leemwenyo adishe (Efiku loonakufya). O-New Catholic Encyclopedia oya ti: “Mefiku eli ohamu dimbulukwa ovafi aveshe ovo va ya nale. Momukokomoko womido dopokati, okwa kala kwa itavelwa kutya eemwenyo adishe odo di li mekoshokifo, mefiku olo ohadi holoka molupe loilulu, lovalodi, loishitukila nosho tuu, i ye kovanhu ovo ve va ninga nai, eshi va li momwenyo.”

  •  Oshivilo Qingming [Ch’ing Ming] nosho yo Oshivilo shOilulu ya fya Ondjala. Oivilo oyo ivali ohai ningwa, opo ku fimanekwe ovakwamhungu. Embo Celebrating Life Customs Around the World—From Baby Showers to Funerals ola ti kutya pefimbo loshivilo sho-Ch’ing Ming, “oikulya, oikunwa nosho yo oimaliwa yomafo ohai xwikwa, opo ku shilipalekwe kutya ovafi itava fi ondjala, ile enota noinava hepa oimaliwa.” Embo olo ola popya yo kutya “mOmwedi wOshivilo shOilulu ya fya Ondjala, unene moufiku oo ku na omwedi u yadi, [ovadani voshivilo] ova itavela kutya ohapa kala ekwatafano la kula pokati kovanamwenyo novafi shi dulife omaufiku makwao. Onghee hano, osha fimana okuhafifa ovafi nokufimaneka ovakwamhungu.”

  •  Oshivilo sho-Chuseok. O-The Korean Tradition of Religion, Society, and Ethics oya ti kutya oshivilo osho osha kwatela mo “okuyandja oikulya nomaviinyu keemwenyo dovafi.” Okuyandja kwa tya ngaho otaku yambidida “eitavelo olo kutya omwenyo ohau twikile okukala po, konima eshi olutu la fya.”

   Omafiku omafudo, oo e na ekwatafano noumhulile. Ombiibeli oya ti: “Ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi . . . oye oixuna koshipala shOmwene.” (Deuteronomion 18:10-12) Opo Eendombwedi daJehova di henuke oumhulile woludi keshe, mwa kwatelwa okunyanekela (osho shi li oludi lokukendabala okushiiva onakwiiwa), ihadi dana oshivilo osho hashi ifanwa Halloween nosho yo oivilo tai shikula.

  •  Efiku lefudo lo-Sinhala nosho yo Omudo Mupe Tamil. O-Encyclopedia of Sri Lanka oya ti: “Oinima yopamufyuululwakalo, oyo hai ningwa poshivilo osho, . . . oya kwatela mo okuninga oinima pefimbo lonhumba, oyo ovanyanekeli va tala kutya otai ka eta elao.”

  •  Efiku lo-Songkran. O-Food, Feasts, and Faith—An Encyclopedia of Food Culture in World Religions oya popya shi na sha noshivilo osho shokuAsia, ya ti edina loshivilo osho “ola dja koshitya shOshisanskrit . . . tashi ti ‘elinyengo,’ ile ‘okulunduluka.’ Oshivilo osho ohashi ningwa, opo ku didilikwe elinyengo letango mewangadjo, eshi tali piti pongudu yeenyofi yedina Aries.”

   Omadano, oo a pamba Omhango yaMoses, oyo ya xulifwa po keyambo laJesus. Ombiibeli oya ti: “Omhango oya xulifwa po kuKristus.” (Ovaroma 10:4) Ovakriste ohava mono natango ouwa momafinamhango omOmhango yaMoses, oyo ya li ya pewa Ovaisrael vopefimbo lonale. Ashike ihava dana oivilo yOmhango oyo, unene tuu oyo ya li tai faneke Messias, oo Ovakriste va itavela kutya okwe uya nale. Ombiibeli oya ti: “Oinima oyo oi li omudidimbe waayo tai ke uya, ndele olutu lo vene oKristus.” (Ovakolossi 2:17) Kakele kaasho, mopaife oivilo ya tya ngaho oya kwatela mo eenghedindjikilile itadi tu kumwe nOmbiibeli, onghee Eendombwedi daJehova ihadi kufa ombinga muyo, ngaashi ei tai landula:

  •  Oshivilo sho-Hanukkah. Moshivilo osho ohamu dimbulukiwa eyapulo lotembeli yOvajuda yomuJerusalem. Ashike Ombiibeli oya ti kutya Jesus okwa ninga Omupristeri Munene nokwa ya “metwali [ile, motembeli] olo linene noliwa olo inali tungwa kovanhu nokali li kombada yedu.” (Ovaheberi 9:11) KOvakriste, otembeli oyo yopamhepo oya pingena po otembeli yo venevene yomuJerusalem.

  •  Oshivilo sho-Rosh Hashanah. Eli efiku lotete lomudo wOshijuda. Pefimbo lonale, poshivilo opo opa li hapa yambelwa Kalunga omayambo e likalekelwa. (Numeri 29:1-6) Ashike Jesus Kristus, oo e li Messias, okwa ‘xulifa po etomenoyambo neendjayambo,’ nokungaho itai ti sha vali momesho aKalunga. — Daniel 9:26, 27.

•   Mbela omafiku omafudo ohaa ningifa ovanhu va mbwange mumwe omaitavelo?

   Efinamhango lopaMbiibeli: “Omwiitaveli oku na ekwatafano lashike naao ehe fi omwiitaveli? Oikalunga itai dulu okukala motembeli yaKalunga.” — 2 Ovakorinto 6:15-17.

   Nonande Eendombwedi daJehova ohadi kendabala okukala nombili novanhu aveshe nokufimaneka oufemba wakeshe umwe wokuhoolola osho a hala okwiitavela, ohadi henuka omadano oo haa xumifa komesho okumbwanga mumwe omaitavelo meenghedi tadi shikula.

   Omadano e na sha noinima yopalongelokalunga, ile noiningwanima oyo hai xumifa komesho okuhanganifa ovanhu nomaitavelo a yoolokafana. Eshi Kalunga a li a twala oshiwana shaye shonale kedu lipe, oko kwa li ku na ovanhu ve na omalongelokalunga amwe e lili, okwa li e va lombwela a ti: “Inamu ninga omahangano ile omaudafano navo ile noikalunga yavo. . . . Osheshi ngeenge to longele oikalunga yavo, otashi ku ningile omwiyo.” (Exodus 23:32, 33) Onghee hano, Eendombwedi daJehova ihadi kufa ombinga momafiku omafudo ngaashi aa taa shikula.

  •  Oshivilo sho-Loy Krathong. O-Encyclopedia of Buddhism oya ti kutya, pefimbo loshivilo eshi shOvathai, “ovanhu ohava ningi ouyaxa vomafo, tava tula mo oulexita, ile outi vokutwimifa edimba liwa, noku i efa i ye momeva. Ova itavela kutya ouyaxa, ovo va fa oumbautu, ohava twaalele omupya. Onghee hano, mefiku olo ohaku dimbulukiwa oshikoti shiyapuki osho sha fiwa po kuBuddha.”

  •  Efiku lOkulidilulula loPashiwana. Omunambelewa umwe okwa popya moshifokundaneki sho-The National, shomoPapua New Guinea, a ti kutya ovo hava kufa ombinga moshiningwanima eshi “ova tambula ko ekanghameno leitavelo lOukriste. Efiku olo oli li odjo yomafinamhango Ovakriste vomoshilongo.”

  •  Efiku lo-Vesak. O-Holidays, Festivals, and Celebrations of the World Dictionary oya ti kutya, “Efiku eli olo efiku liyapuki elela momafiku ovaitaveli vOshibudda, lokudana edalo laBudda, ounongo waye nosho yo efyo laye, ile okulalakanena kwaye ehafo.”

   Omadano oo a kanghamena keenghulunghedi domalongelokalunga, ndele itaa popilwa kOmbiibeli. Jesus okwa li a lombwela ovakwatelikomesho vomalongelokalunga a ti: “Omwa hekula eendjovo daKalunga omolweenghulunghedi deni.” Okwa li yo a popya shi na sha navo kutya okulongela Kalunga kwavo okwongaho, molwaashi “omahongo avo okwa kanghamena koipango yopanhu.” (Mateus 15:6, 9) Molwaashi Eendombwedi daJehova oda tambula ko elondwelo olo, ope na oivilo yopalongelokalunga ihapu oyo ihadi kufa ombinga muyo.

  •  Epiphany (Efiku lEehamba Nhatu, Timkat, ile Los Reyes Magos). O-Encyclopedia of Society and Culture in the Ancient World oya ti kutya ovadani ohava dana tashi dulika tava dimbuluka ovanyanekeli veenyofi ovo va li va talela po Jesus, ile eninginifo laJesus. Oshivilo osha “lundululila oivilo imwe po yoshipaani yopokwenye, oyo hai fimanekifa oikalunga yomakunguluko omeva, omilonga nosho yo eefifiya, i ninge yopaKriste.” (O-The Christmas Encyclopedia) Timkat, oshivilo shimwe sha fela kwaasho, “osha nyama filufilu keenghulunghedi.”

  •  Oshivilo shi na sha nokakadona Maria ka ya meulu. Oshivilo osho ohashi danwa, molwaashi kwa itavelwa kutya Maria ina yaJesus okwa londa a ya meulu nolutu laye lopambelela. O-Religion and Society—Encyclopedia of Fundamentalism oya ti: “Eitavelo olo kala li li shiivike kOvakriste votete, noinali tumbulwa mo mOmishangwa.”

  •  Oshivilo shokwiitavela kutya Maria okwa li a manguluka ko koulunde, eshi a fimbapala. O-New Catholic Encyclopedia oya ti: “Eitavelo lokuhakala noulunde omolwokufimbapala [kwaMaria] inali tumbulwa mo mOmishangwa. . . .Ongeleka oyo ashike ya tota po oshinima osho.”

  •  Efiku lo-Lent. O-New Catholic Encyclopedia oya ti kutya efimbo lokulidilulula nolokulidilika ola totwa po “mefelemudo etine,” konima yomido 200, eshi Ombiibeli ya pwa okushangwa. O-Encyclopedia oya ti vali kutya, mefiku Etitatu lomute, “ovapristeri ova li hava shange omushiyakano nomute meembaba doipala yoilyo yavo. Osho osha li hashi va dimbulukifa kutya ova pumbwa okulidilulula. Onghedindjikilile oyo oya ka tambulwa ko pambelewa kongeleka yaKatolika mo 1091.””

  •  Oshivilo sho-Meskel (ile, Maskal). O-Encyclopedia of Society and Culture in the Medieval World oya ti kutya oshivilo osho shOvaetiopia ohashi ningwa, “opo ku minikilwe Omushiyakano woLela (oko kwa li kwa valelwa Jesus), mokutema omundilo noku u dingilila tava ndanisha.” Ashike Eendombwedi daJehova ihadi longifa omushiyakano melongelokalunga lado.

•   Mbela efiku lefudo ohali tumbaleke omunhu wonhumba, ehangano, ile edidiliko lonhumba lopashiwana?

   Efinamhango lopaMbiibeli: “Omwene osho ta ti: “Omulumenhu omufingwa oye ou te lineekele ovanhu, nombelela te i ningi okwooko kwaye nomutima waye tau liteeka Omwene.” — Jeremia 17:5.

   Nonande Eendombwedi daJehova ohadi pandula ovanhu vakwao noku va ilikanena, ihadi kufa ombinga moivilo yomaludi ngaashi ei tai shikula.

   Omafiku omafudo, oo taa tumbalekifa omupangeli wonhumba, ile omunhu wonhumba a lengwa. Ombiibeli oya ti: “Tongokeni movanhu ve nomufudo momayulu; oye ota ka yelekwa nashike?” (Jesaja 2:22) Onghee hano, Eendombwedi daJehova ihadi dana edalo, ngaashi pashihopaenenwa laumwe, nonande oku li omunenenhu.

   Omadano e na sha nepandela lopashiwana. Eendombwedi daJehova ihadi dana omafiku omafudo e na sha nepandela lopashiwana. Omolwashike mbela? Omolwaashi Ombiibeli oya ti: “Kaleni kokule noikalunga.” (1 Johannes 5:21) Ovanhu vamwe kunena inava tala ko epandela li li oshihongwafano, oshinima osho hashi tumbalekwa nokwiilikanwa. Ndele omunandjokonona wedina Carlton J. H. Hayes okwa shanga a ti: “Epandela oli li edidiliko linene leitavelo moukwashiwana nola talika ko li li oshinima sha fimanenena osho shi na okwiilikanwa.”

   Omafiku omafudo, ile omadano, oo taa tumbalekifa ovayapuki. Oshike sha li sha ningwa po, eshi omulumenhu umwe omutilikalunga a li a twila eengolo omuyapostoli Petrus? Ombiibeli oya popya ya ti: “Petrus okwa ti: ‘Fikama, ame naame omunhu ashike ngaashi ove.’” (Oilonga 10:25, 26) Molwaashi Petrus nosho yo ovayapostoli vakwao kava li hava tambula ko efimaneko, ile etumbaleko le likalekelwa, Eendombwedi daJehova ihadi kufa ombinga moivilo yokutumbaleka ovo va talika ko ovayapuki, ngaashi hashi ningwa poivilo tai shikula:

  •  Efiku lOvayapuki aveshe. O-New Catholic Encyclopedia oya ti: “Oshivilo eshi ohashi ningwa, opo ku fimanekwe ovayapuki aveshe . . . Oudilo woshivilo osho kau shiivike.”

  •  Efiku lo-Fiesta of Our Lady of Guadalupe. O-The Greenwood Encyclopedia of Latino Literature oya ti kutya, oshivilo eshi ohashi tumbaleke omukainhu “omuyapuki, oo a amene Mexico,” navamwe ova itavela kutya oye Maria, ina yaJesus. Okwa itavelwa kutya okwa li e lihololela pashikumwifilonga omufyoona umwe mo 1531.

  •  Efiku lEdina. Embo Celebrating Life Customs Around the World—From Baby Showers to Funerals ola ti: “Efiku ledina loshivilo osho hashi ningilwa omuyapuki, oo a lukilwa okaana eshi taka shashwa, ile taka kolekwa.” Ola weda ko tali ti kutya “mefiku olo ovanhu ohava ningi oinima i na ekwatafano nelongelokalunga.”

   Omadano a pamba omahangano opolotika, ile oo kondje oufemba womunhu. Ombiibeli oya ti: “Okulineekela Omwene oku dule okulineekela ovanhu.” (Epsalme 118:8, 9) Eendombwedi daJehova ihadi kufa ombinga mEfiku lOvanyasha, ile mEfiku lOomeme, oo haa yambidida omakangha opapolitika noopashiwana, molwaashi odi shii kutya Kalunga oye ta ka kandula po omaupyakadi oo e li mounyuni, ndele havanhu, ovo ve lineekelwa. Omolwetomheno la faafana, ihadi kufa ombinga momafiku omapangelo okuxulifa po oupika, ile makwao a yukila oko. Ponhele yaasho, oda teelela Ouhamba waKalunga oo u uye u kandule po omaupyakadi e na sha noukwamuhoko nosho yo okuhefike pamwe. — Ovaroma 2:11; 8:21.

•   Mbela efiku olo otali tumbaleke oshiwana, ile omuhoko wonhumba shi dulife dikwao?

   Efinamhango lopaMbiibeli: “Kalunga ke na okatongo, ndele oha tambula ko omunhu womoshiwana keshe oo he mu tila noha longo osho sha yuka.” — Oilonga 10:34, 35.

   Nonande Eendombwedi daJehova dihapu odi hole oilongo oko da dja, ohadi henuka omadano oo taa tumbaleke oshiwana, ile omuhoko wonhumba meenghedi tadi shikula.

   Oivilo oyo hai tumbalekifa omatangakwaita. Ponhele yokuyambidida oita, Jesus okwa lombwela ovashikuli vaye a ti: “Kaleni mu hole ovatondi veni nokwiilikanena ovo have mu hepeke.” (Mateus 5:44) Onghee hano, Eendombwedi daJehova ihadi kufa ombinga moivilo oyo tai tumbalekifa ovakwaita, mwa kwatelwa omafiku omafudo ngaashi aa taa shikula:

  •  Efiku lo-Anzac. O-Historical Dictionary of Australia oya ti kutya Anzac oshi lile po “Australian and New Zealand Army Corps, nefiku lefudo lo-Anzac ola enda tali lundulukile mefiku lokudimbuluka ovo va dipaelwa moita.”

  •  Efiku lOonakulwa Vakulu (Efiku lOkudimbuluka, Osoondaxa yEdimbuluko, ile Efiku lEdimbuluko). O-Encyclopædia Britannica oya ti kutya momafiku oo omafudo ohamu dimbulukiwa “oonakulwa vakulu vomatangakwaita a homata naavo va dipaelwa moita yoshilongo.”

   Efiku lokudimbuluka ondjokonona yoshiwana, ile emanguluko. Jesus okwa popya shi na sha novashikuli vaye a ti: “Kave fi oshitukulwa shounyuni, ngaashi ashike ame ndihe fi oshitukulwa shao.” (Johannes 17:16) Nonande Eendombwedi daJehova odi hole okulihonga kombinga yondjokonona yopashiwana, ihadi kufa ombinga moivilo ngaashi ei tai shikula:

  •  Efiku laAustralia. O-Worldmark Encyclopedia of Cultures and Daily Life oya ti kutya mefiku omo ohamu dimbulukiwa “efiku lomo 1788, eshi ovakwaita Ovaingilisha va li va tulika epandela nokushiivifa kutya Australia osha ninga oshipangelwalongo shipe.”

  •  Efiku lo-Guy Fawkes. O-A Dictionary of English Folklore oya ti kutya “mefiku olo ohamu danwa nokudimbulukiwa Guy Fawkes nosho yo Ovakatoolika, ovo va li tave mu yambidida nova dopa eshi va li tava kendabala okudipaa ohamba James Yotete nosho yo oilyo yopaliamende yepangelo [laEngland] mo 1605.”

  •  Efiku lEmanguluko. O-Merriam-Webster’s Unabridged Dictionary oya popya kutya moilonga ihapu efiku eli ohali likalekelwa, opo ku danwe nokudimbuluka efiku omo oshilongo shonhumba sha li sha manguluka.”

•   Mbela mefiku lefudo ovanhu ohave lihumbata monghedi inai koshoka?

   Efinamhango lopaMbiibeli: “Osha wana eshi mwa kala hamu wanifa po omahalo ovanhu vomounyuni mokunyona nopehe na ouxwenge, okuhapangela omahalo eni, okunwa sha pitilila, okukufa ombinga moivilo ihe na elandulafano nomomafiyafano okunwa oikolwifa nosho yo okulongela oikalunga.” — 1 Petrus 4:3.

   Omolwefinamhango olo, Eendombwedi daJehova ohadi henuka omadano oo taa xwaxwameke okunwa sha pitilila nosho yo oivilo ihe na elandulafano. Eendombwedi daJehova ohadi hafele okukala pamwe nookaume kado notashi dulika di hoolole okunwa oikunwa yoalkoholi pandjele, ile okuhanwa. Ohadi kendabala okudulika komayele opaMbiibeli aa taa ti: “Ngeenge tamu li ile tamu nu ile keshe tuu eshi tamu shi ningi, aishe i ningeni okufimanekifa Kalunga.” — 1 Ovakorinto 10:31.

   Onghee hano, Eendombwedi daJehova ihadi kufa ombinga moinima ya yukila oko, oyo hai xumifa komesho elihumbato lii, olo la tokolwa kOmbiibeli. Osho osha kwatela mo oshivilo shOvajuda hashi ifanwa Purim. Nonande oshivilo osho Purim osha kala hashi danwa, opo ku dimbulukiwe okumangululwa kOvajuda mo 50 K.O.P., pambo Essential Judaism, paife “ohashi danwa kOvajuda nohava hopaenene oivilo ngaashi shoMardi Gras.” Ovanhu vahapu “ovo hava dana oshivilo osho ohava djala nai (luhapu ovalumenhu ohava kala va djala oikutu yovakainhu), okulihumbata monghedi inai koshoka, okunwa sha pitilila nokuninga omaweelelo mahapu.”

 Heeno. Ombiibeli otai hongo ovanhu va kale ve hole nokufimaneka ovapambele vavo aveshe, kashi na nee mbudi kutya ova itavela shike. (1 Petrus 3:1, 2, 7) Oshoshili kutya ngeenge umwe womEendombwedi daJehova okwa efa po okukufa ombinga momadano onhumba, ovapambele vaye vamwe otashi dulika va handuke, va ude nai, ile va kale nokuli ve wete va kengelelwa. Onghee hano, Eendombwedi dihapu ohadi katuka eenghatu di shilipaleke ovapambele vavo kutya ove va hole, have va yelifile nelungi omatokolo avo noku va talela po peemhito dimwe.

 Ahowe. Oda itavela kutya omunhu keshe oku na okuninga omatokolo kuye mwene. (Josua 24:15) Eendombwedi daJehova ohadi ‘fimaneke ovanhu vomaludi aeshe,’ kashi na nee mbudi kutya ove li melongelokalunga lilipi. — 1 Petrus 2:17.