Wendi wa Ngai nĩ ũmũmenye wega, ũtuĩke mũrata wake, ũcoke ũmwende na ũmũtungatĩre na ngoro yaku yothe. (Mathayo 22:37, 38; Jakubu 4:8) No wĩrute ũrĩa ũngĩka wendi wa Ngai kuumana na ũtũũro na ũrutani wa Jesu. (Johana 7:16, 17) Jesu to kwaria tu aaragia ũhoro wĩgiĩ wendi wa Ngai, no makĩria ma ũguo, nĩ aawĩkaga. Oigire atĩ muoroto wake harĩ ũtũũro ndwarĩ “gwĩka wendi wakwa niĩ mwene, ĩndĩ nĩ gwĩka wendi wa ũrĩa wandũmire.”—Johana 6:38.

Hihi no mũhaka Ngai anyonie na njĩra ya kĩama, rĩĩtana kana kĩoneki ũrĩa arenda njĩke?

 Aca, tondũ Ngai nĩ atũheete ũhoro wake kũgerera Bibilia. Ĩkoragwo na ũhoro wothe ũrĩa ũrabatara nĩguo ũikare wĩhotorete “biũ nĩ ũndũ wa wĩra wothe mwega.” (2 Timotheo 3:16, 17) Ngai eendaga ũhũthĩre Bibilia hamwe na ‘ũhoti waku wa gwĩciria’ nĩguo wĩrute ũrĩa endaga wĩke.—Aroma 12:1, 2; Aefeso 5:17.

Hihi kũna niĩ no hote gwĩka wendi wa Ngai?

 Ĩĩ, no ũhote, tondũ Bibilia yugaga atĩ, “maathani make ti maritũ.” (1 Johana 5:3, The Holy Bible in Gĩkũyũ Language) Ũguo ti kuuga atĩ hingo ciothe nĩ ũndũ mũhũthũ gwathĩkĩra maathani ma Ngai. No ũguni ũrĩa ũkũgĩa naguo nĩ mũnene mũno ũkĩringithanio na hinya ũrĩa ũkũbatara. Jesu we mwene oigire ũũ: “Gũkena-rĩ, nĩ arĩa maiguaga kiugo kĩa Ngai na magakĩrũmia!”—Luka 11:28.