Bibilia yonanagia atĩ nĩ ũndũ mwagĩrĩru, o na wa bata, mũndũ kwĩyenda na gĩkĩro kĩrĩa kĩagĩrĩire. Kwĩyenda ta kũu kũhutĩtie kwĩrũmbũiya, kwĩhe gĩtĩo, na mũndũ kwĩyona arĩ wa bata na njĩra ĩrĩa yagĩrĩire. (Mathayo 10:31) Handũ ha gũtũũgĩria mwĩyendo, Bibilia yonanagia mawoni marĩa magĩrĩire megiĩ kwĩyenda.

Nũũ twagĩrĩirũo kwenda mbere?

1.   Kwenda Ngai nĩkuo kwagĩrĩire gũkorũo kũrĩ kwa mbere ngoro-inĩ citũ. Bibilia ĩrutanaga atĩ rĩathani rĩrĩa inene nĩ rĩrĩ: “No mũhaka wende Jehova Ngai waku na ngoro yaku yothe.”—Mariko 12:28-30; Gũcokerithia Maathani 6:5.

2.   Rĩathani rĩa kerĩ rĩrĩa inene nĩ rĩrĩ: “No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.”—Mariko 12:31; Maũndũ ma Alawii 19:18.

3.   O na gũtuĩka Bibilia ndĩkoragwo na rĩathani rĩa ĩmwe kwa ĩmwe rĩgiĩ kwĩyenda, rĩathani rĩa ‘kwenda mũndũ ũrĩa mũriganĩtie nake o ta ũrĩa wĩyendete wee mwene’ rĩonanagia atĩ kwĩyenda na kwĩhe gĩtĩo na gĩkĩro kĩrĩa kĩagĩrĩire nĩ ũndũ wa ndũire na nĩ ũrĩ ũguni.

Nũũ Jesu eendete mbere?

 Jesu nĩ oonanirie ũrĩa tũngĩkorũo na ũigananĩru harĩ kwenda Ngai, kwenda mũndũ ũrĩa tũriganĩtie nake, na kwĩyenda, na akĩra arutwo ake marũmagĩrĩre kĩonereria gĩake.—Johana 13:34, 35.

1.   Eendete Jehova Ngai mbere na nĩ eerutĩire harĩ kũhingia wĩra Wake. Ooigire ũũ: “Nĩguo thĩ ĩmenye atĩ nĩ nyendete Awa, ndĩreka o ũrĩa Awa anjathĩte njĩke.”—Johana 14:31.

2.   Jesu nĩ eendete andũ arĩa angĩ, na oonanirie ũguo na njĩra ya kũrũmbũiya mabataro mao nginya akĩruta muoyo wake mwene.—Mathayo 20:28.

3.   Nĩ oonanirie atĩ nĩ eeyendete na gĩkĩro kĩrĩa kĩagĩrĩire tondũ nĩ aagĩaga na ihinda rĩa kũhurũka, kũrĩa, na gũkenanĩra hamwe na arũmĩrĩri ake na arĩa mangĩatuĩkire arutwo ake.—Mariko 6:31, 32; Luka 5:29; Johana 2:1, 2; 12:2.

Hihi kwenda andũ arĩa angĩ mbere ya kwĩyenda nĩ gũkũnyihanyihia gĩkeno gĩaku kana gĩtĩo kĩrĩa wĩheete?

 Aca, tondũ tũmbĩtwo na mũhianĩre wa Ngai, na ngumo yake ĩrĩa nene nĩ wendo ũtarĩ mwĩyendo. (Kĩambĩrĩria 1:27; 1 Johana 4:8) Ũguo nĩ kuuga atĩ tũmbĩtwo nĩguo tuonagie andũ arĩa angĩ wendo. Kwĩyenda ti kũũru, no tũkoragwo na gĩkeno makĩria rĩrĩa twenda Ngai gũkĩra mũndũ kana kĩndũ kĩngĩ o gĩothe na tũkaiga meciria maitũ harĩ gwĩkĩra andũ arĩa angĩ maũndũ mega. O ta ũrĩa Bibilia yugaga, “kũheana nĩ kũrĩ gĩkeno kĩnene gũkĩra kwamũkĩra.”​—Atũmwo 20:35.

 Ũmũthĩ andũ aingĩ moigaga atĩ gĩkeno kiumanaga na mũndũ kũiga maũndũ make mbere. Handũ ha ‘kwenda mũndũ ũrĩa mariganĩtie nake,’ moigaga atĩ mũndũ agĩrĩirũo ‘kwĩyenda.’ O na kũrĩ ũguo, maũndũ marĩa monetwo ihinda-inĩ rĩrĩ monanagia atĩ andũ arĩa makoragwo na ũgima mwega wa mwĩrĩ na gĩkeno nĩ arĩa marũmagĩrĩra ũtaaro ũyũ wa ũũgĩ ũrĩ Bibilia-inĩ: “Mũndũ o wothe nĩ acaragie, ti maũndũ ma kwĩguna we mwene, no marĩa ma kũguna mũndũ ũrĩa ũngĩ.”—1 Akorintho 10:24.