Ngai tiwe ũrehaga icanjama cia ndũire iria ciĩkĩkaga ũmũthĩ, no nĩ arũmbũyagia andũ arĩa mahutagio nĩcio. Ũthamaki wa Ngai nĩ ũkeheria maũndũ mothe marĩa matũmaga andũ manyamarĩke, nginya icanjama cia ndũire. Ihinda-inĩ rĩrĩ, Ngai nĩ omagĩrĩria arĩa othe mahutagio nĩ icanjama cia ndũire.—2 Akorintho 1:3.

•  Nĩ kĩĩ kĩngĩtũma twĩtĩkie atĩ Ngai tiwe ũrehaga icanjama cia ndũire nĩguo aherithie andũ?

•  Hihi icanjama cia ndũire ironania atĩ tũratũũra matukũ-inĩ ma kũrigĩrĩria?

•  Ngai ateithagia atĩa andũ arĩa mahutio nĩ icanjama cia ndũire?

•  Hihi Bibilia no ĩtũteithie kwĩhaarĩria nĩ ũndũ wa icanjama cia ndũire?

•  Mĩhari ya Bibilia ĩrĩa ĩngĩũmĩrĩria arĩa mahutĩtio nĩ icanjama cia ndũire

 Bibilia nĩ yonanagia atĩ Ngai anahũthĩra mahinya ma ndũire kũhingia ituĩro, no ũndũ ũcio nĩ ngũrani na ũrĩa icanjama cia ndũire ciĩkĩkaga.

•   Icanjama cia ndũire ciũragaga na igatua andũ cionje gũtekũmakania kana nĩ andũ ega kana nĩ oru. Mũgarũ na ũguo, maita marĩa Ngai anahũthĩra mahinya ma ndũire kũhingia ituĩro, aatigagĩrĩra atĩ no andũ arĩa aganu maniinwo. Kwa ngerekano, rĩrĩa Ngai aanangire matũũra ma tene ma Sodomu na Gomora, nĩ aahonokirie Loti, ũrĩa warĩ mũndũ mwega, o hamwe na airĩtu ake erĩ. (Kĩambĩrĩria 19:29, 30) Ngai nĩ aathomire ngoro cia andũ a ihinda rĩu, na akĩananga o arĩa tu oonire marĩ aganu.—Kĩambĩrĩria 18:23-32; 1 Samueli 16:7.

•   Kaingĩ icanjama cia ndũire ciũkaga andũ matekũmenya. Mũgarũ na ũguo, Ngai nĩ aaheaga andũ aganu mĩkaana atanahũthĩra mahinya ma ndũire kũmerekera. Arĩa maathĩkagĩra mĩkaana ĩyo nĩ maakoragwo na mweke wa kũhonoka matikaniinwo.—Kĩambĩrĩria 7:1-5; Mathayo 24:38, 39.

•   Andũ nĩ matũmĩte kũgĩe na icanjama imwe cia ndũire. Na njĩra ĩrĩkũ? Na njĩra ya gũthũkia rĩera na maũndũ marĩa matũrigicĩirie na gwaka kũndũ kũrĩa kũgĩaga ithingithia, mĩiyũro, na mathĩna mangĩ ma rĩera. (Kũguũrĩrio 11:18) Tũtiagĩrĩirũo gũcokereria Ngai mahĩtia nĩ ũndũ wa mathĩna ta macio marehagwo nĩ andũ.—Thimo 19:3.

 Ĩĩ. Morathi ma Bibilia monanagia atĩ nĩ kũngĩgakorũo na icanjama hĩndĩ ya “ithirĩro rĩa mũtabarĩre wa maũndũ” kana “matukũ-inĩ ma kũrigĩrĩria.” (Mathayo 24:3; 2 Timotheo 3:1) Kwa ngerekano, Jesu ooigire ũũ ũhoro-inĩ wĩgiĩ mahinda maitũ: “Nĩ gũkaagĩa ngʼaragu na ithingithia kũndũ na kũndũ.” (Mathayo 24:7) Ica ikuhĩ, Ngai nĩ ekwehereria andũ maũndũ mothe marĩa marehaga ruo na mĩnyamaro gũkũ thĩ, nginya icanjama cia ndũire.—Kũguũrĩrio 21:3, 4.

•   Ngai nĩ omagĩrĩria andũ arĩa mahutĩtio nĩ icanjama cia ndũire kũgerera Kiugo gĩake, Bibilia. Bibilia ĩtũheaga ũũma atĩ Ngai nĩ atũrũmbũyagia na atĩ nĩ aiguaga ũũru rĩrĩa tũranyamarĩka. (Isaia 63:9; 1 Petero 5:6, 7) Ningĩ nĩ ĩtũguũragĩria ũhoro wa kĩĩranĩro gĩake kĩa ihinda gũtagacoka gũkorũo na icanjama cia ndũire.—Rora gacunjĩ ka “ Mĩhari ya Bibilia ĩrĩa ĩngĩũmĩrĩria arĩa mahutĩtio nĩ icanjama cia ndũire.”

•   Ngai nĩ ahũthagĩra athathaiya ake gũteithia arĩa mahutĩtio nĩ icanjama cia ndũire. Ngai nĩ ahũthagĩra athathaiya ake gũkũ thĩ arĩa megerekanagia na kĩonereria kĩrĩa kĩaigirũo nĩ Jesu. Nĩ kwarathĩtwo atĩ Jesu nĩ angĩkomĩrĩria “arĩa athuthĩku ngoro” na “arĩa othe maracakaya.” (Isaia 61:1, 2) Athathaiya a Ngai nĩ merutanagĩria gwĩka o take.—Johana 13:15.

   Ningĩ Ngai nĩ ahũthagĩra athathaiya ake kũhe andũ arĩa mahutĩtio nĩ icanjama cia ndũire indo iria marabatara cia kĩĩmwĩrĩ.—Atũmwo 11:28-30; Agalatia 6:10.

 Ĩĩ. O na gũtuĩka Bibilia ndĩandĩkirũo nĩguo ĩtũteithie kwĩhaarĩria nĩ ũndũ wa icanjama cia ndũire, nĩ ĩkoragwo na motaaro mangĩtũteithia. Kwa ngerekano:

•   Wĩhaarĩrie kabere nĩ ũndũ wa icanjama iria ingiumĩra. Bibilia yugaga ũũ: “Mũndũ mũũgĩ onaga ũgwati akehitha.” (Thimo 22:3) Nĩ ũndũ wa ũũgĩ kũbanga kabere ũrĩa ũngĩka kũngiumĩra ũgwati. Ũndũ ũcio ũhutĩtie kũhaarĩria mũhuko ũrĩ na indo ũngĩhũthĩra kũngiumĩra ũgwati na kwarĩrĩria na andũ a famĩlĩ yanyu kũrĩa mũngĩcemania kũngiumĩra gĩcanjama.

•   Onaga muoyo ũrĩ wa bata gũkĩra indo. Bibilia yugaga ũũ: “Gũtirĩ kĩndũ twarehire thĩinĩ wa thĩ, na gũtirĩ kĩndũ tũngiuma nakĩo kuo.” (1 Timotheo 6:7, 8) Twagĩrĩirũo gũkorũo twĩhaarĩirie gũtiga mĩciĩ itũ o na indo citũ nĩguo tũũrĩre gĩcanjama. Nĩ wega kũririkanaga atĩ muoyo witũ nĩ wa bata gũkĩra kĩndũ o gĩothe gĩa kĩĩmwĩrĩ.—Mathayo 6:25.