Mũrangĩri wa Juni 1, 1912 waugire ũũ: “No kũhoteke athomi aitũ aingĩ nĩ moyaine na andũ arĩa matakoragwo na ũhoti wa kuona. No mamũkĩre indo cia gũthoma hatarĩ marĩhi. . . . Indo icio cia andũ arĩa matakoragwo na ũhoti wa kuona ciandĩkagwo na ndemwa cioetwo igũrũ ũndũ andũ ta acio mangĩhota gũthoma.” Mũrangĩri ũcio wacokire ũkiuga: “Andũ aingĩ arĩa matarĩ na ũhoti wa kuona nĩ makenaga nĩ ndũmĩrĩri ĩgiĩ irathimo njega iria irĩũka thĩinĩ wa thĩ.”

 Rĩrĩa ciugo icio ciaandĩkirũo, mabũrũri matiganĩte marĩa maragia rũthiomi rwa Gĩthũngũ, maarĩ na braille cia mĩthemba ngũrani. No o na hĩndĩ ĩyo, Aira a Jehova nĩ maathondekaga mabuku marĩ na ma cia Bibilia “marĩ na ndemwa njoe na igũrũ” cia braille. Na no mathondekaga nginya ũmũthĩ! Tũkoragwo na mabuku ma braille na makĩria ma thiomi 50. Mathondekagwo atĩa?

 Ikinya rĩa mbere nĩ gũcenjia ciugo ituĩke ndemwa cia braille. Michael Millen, ũrĩa ũrutaga wĩra na Rũhonge rwa Gũtabania Mĩandĩkĩre ya Ciugo rũrĩa rwĩ Patterson, New York aataarĩirie akiuga: “Tene twahũthagĩra mĩtambo ĩthondeketwo nĩ andũ angĩ gũthondeka mabuku ma braille, no mĩtambo ĩyo ndĩahotaga kũruta wĩra harĩ thiomi ciothe iria twendaga. Rĩu tũhũthagĩra mũtambo wa Watchtower Translation System, ũrĩa ũhotaga gũthondeka braille na thiomi nyingĩ iria ihũthĩragwo thĩinĩ wa thĩ. Ndĩ na ma gũtirĩ mũtambo ũngĩ ta ũcio thĩinĩ wa thĩ.”

 Mabuku ma braille makoragwo nginya na ciugo irataarĩria mbica. Kwa ngerekano, mbica ĩrĩa ĩrĩ ngothi-inĩ ya ibuku rĩa Kenera Ũtũũro Tene na Tene! ĩtaarĩirio ũũ: “Mũndũ akĩambĩrĩria kũgerera njĩra ĩrĩ na ithioro ĩthiũrũrũkĩirio nĩ nyeki, mahũa, mĩtĩ, na irĩma.” Jamshed, ũrĩa ũkoragwo arĩ ndungata ya kĩũngano na painia na ndarĩ ũhoti wa kuona, aaugire ũũ: “Ciugo icio cia gũtaarĩria mbica nĩ cindeithagia mũno.”

 Thutha wa gũcenjia ciugo ituĩke ndemwa cia braille, failo icio itũmagwo wabici-inĩ cia honge iria ithondekaga mabuku ma braille. Kũu wabici-inĩ icio, mathondekaga mabuku macio na maratathi mangĩtũũra ihinda iraihu, na matangĩthũka na ihenya hĩndĩ ĩyo marathondekwo, kana thutha wa kũhũthĩrũo kwa ihinda iraihu. Thutha ũcio maratathi macokanagĩrĩrio, makanyitithanio, na magatũmwo hamwe na mabuku ma kĩũngano kana magatũmwo na posta kũgerera “njĩra ĩtarĩ marĩhi nĩ ũndũ wa arĩa matarĩ ũhoti wa kuona,” angĩkorũo nĩ kũrĩ motungata ta macio. Kũngĩbatarania, wabici cia honge nĩ ibangaga ũrĩa mabuku macio megũkinya o na ihenya nĩguo ariũ a Ithe witũ arĩa matarĩ ũhoti wa kuona kana matonaga wega makorũo na mabuku macio hĩndĩ ya mĩcemanio ya kĩũngano.

 Wĩra ũcio wothe nĩ ũbataraga mahinda maingĩ na mbeca nyingĩ. Kwa ngerekano, kũrĩa mabuku maitũ macabagĩrũo Wallkill, New York, ihinda rĩrĩa rĩhũthagĩrũo gũcaba Bibilia 50,000 cia kawainda, no ta rĩo rĩhũthagĩrũo gũthondeka Bibilia 2 tu cia braille. Bibilia ĩmwe ya Gĩthũngũ ya braille ĩkoragwo na mabuku 25, na mbeca iria ihũthagĩrũo kũgũra indo iria ithondekaga mabuku macio, nĩ maita 123 makĩria ma iria ihũthagĩrũo gũthondeka Bibilia ĩmwe ya kawainda. Thogora wa kũgũra ngothi cia mabuku macio 25 ma gũthondeka Bibilia ĩmwe nĩ dola ta 150 cia Amerika!

 Arĩa mateithagĩrĩria wĩra-inĩ wa gũthondeka mabuku ma braille maiguaga atĩa? Nadia, ũrĩa ũtungataga wabici ya rũhonge ya South Africa, aaugire ũũ: “Aarĩ na ariũ a Ithe witũ arĩa matakoragwo na ũhoti wa kuona kana matonaga wega matikoragwo na ũtũũro mũhũthũ, kwoguo nyonaga arĩ kĩrathimo gwĩka kaũndũ ga kũmateithĩrĩria. Hatarĩ nganja Jehova nĩ amendete mũno.”

 Ĩ angĩkorũo mũndũ ũtarĩ ũhoti wa kuona ndangĩhota gũthoma mabuku ma braille? Mĩaka ĩigana ũna mĩhĩtũku, nĩ twarutire broshua ĩtagwo Learn to Read Braille, ĩrĩa ĩkoragwo na ciugo cia braille na ciugo cia kawainda. Ĩthondeketwo ũndũ mũndũ ũrona na ũtarĩ na ũhoti wa kuona mangĩmĩhũthĩra hamwe. Broshua ĩyo yũkaga hamwe na indo ingĩ mũndũ ũtarĩ na ũhoti wa kuona angĩhũthĩra kwandĩka mwandĩko wa braille nacio. Mũndũ ũrĩa ũreruta gũthoma braille ahũthagĩra indo icio kwĩyandĩkĩra ndemwa cia braille. Rĩrĩa eyandĩkĩra ndemwa icio, ũndũ ũcio nĩ ũmũteithagia kũririkana na gũkũũrana ndemwa icio rĩrĩa acihutia.

 Aarĩ na ariũ a Ithe witũ arĩa matarĩ na ũhoti wa kuona kana matonaga wega magunĩkĩte atĩa nĩ mabuku macio? Ernst, ũrĩa ũikaraga bũrũri-inĩ wa Haiti, nĩ aathiaga mĩcemanio ya Aira a Jehova, no ndaakoragwo na ibuku o na rĩmwe rĩa braille. Nĩ ũndũ ũcio, aabataraga kũririkana maũndũ marĩa eendaga kuuga akĩruta icunjĩ iria agaĩirũo na akĩruta macokio icunjĩ-inĩ cia ciũria na macokio. No rĩu augaga, “No njoe guoko na ndute macokio hĩndĩ o yothe. Njiguaga tũrĩ na ũrũmwe biũ na aarĩ na ariũ a Ithe witũ. Ithuothe twamũkagĩra irio ihaanaine cia kĩĩroho!”

 Jan, mũthuri wa kĩũngano ũtonaga wega kuuma Austria, ũrĩa ũtongoragia Wĩruti wa Mũrangĩri na Wĩruti wa Bibilia wa Kĩũngano, aaugire, “Mabuku maitũ makoragwo marĩ mahũthũ gũtaũkĩrũo gũkĩra mabuku marĩa mothe ndanathoma ma braille. Kwa ngerekano, nĩ makoragwo na namba cia magũrũ-inĩ, tũũhoro twa magũrũ-inĩ tũrĩa tuonekaga na njĩra hũthũ, na ciugo irataarĩria mbica wega.”

 Seon-ok, painia kuuma South Korea, ndakoragwo na ũhoti wa kuona na kũigua. Kĩambĩrĩria-inĩ eetagĩrĩra andũ mamũnyite guoko mamũteithĩrĩrie kwaria na rũthiomi rwa ciĩko arĩ mĩcemanio-inĩ, no rĩu no ahote gwĩthomera mabuku marĩ na ũhoro wa Bibilia na rũthiomi rwa braille. Aaugire, “Mabuku marĩa mangĩ ma braille nĩ maritũ gũthoma tondũ tũkanyakanya tũmwe tũtikoragwo ho, raini cikoragwo irĩ ngʼonyoku, kana karatathi gagakorũo karĩ gaceke mũno. No Aira a Jehova mahũthagĩra maratathi mega biũ, na tũkanyakanya tũgakorũo tuoetwo na igũrũ wega, na ũndũ ũcio nĩ ũndeithagia gũthoma na njĩra hũthũ.” Aacokire akiuga, “Tene, ndathomaga mabuku marĩ na ũhoro wa Bibilia o ngĩteithĩrĩrio nĩ andũ angĩ tu. No rĩu no ndĩthomere niĩ mwene. Nĩ ngenaga nĩ kũhota kũhaarĩria mĩcemanio ya Gĩkristiano ya o kiumia na kũnyitanĩra ndĩ mĩcemanio-inĩ ĩyo. Thomaga mabuku maitũ mothe ma braille. No njuge atĩ nĩ nyendete biũ kũmathoma.”

 O ta mabuku maitũ marĩa mangĩ macabe, mabuku maitũ ma braille nĩ makoragwo na kohoro gaka: “Ibuku rĩrĩ ti rĩa kwendio. Rĩrutĩtwo rĩrĩ gĩcunjĩ kĩa wĩra wa thĩ yothe wa kũruta andũ Bibilia ũrĩa ũtwarithagio na mbere nĩ mĩhothi ya kwĩyendera.” Nĩ ngathoi nĩ kũruta mĩhothi ta ĩyo kũgerera njĩra iria cionanĩtio thĩinĩ wa donate.isa4310.com. Ũtaana wanyu nĩ ũteithagĩrĩria gũtũma irio cia kĩĩroho ikinyĩre andũ othe, nginya arĩa matarĩ na ũhoti wa kuona kana arĩa matonaga wega.