O mweri nĩ twĩrĩgagĩrĩra mũno programu cia kĩĩroho o hamwe na video iria irutagwo kũgerera JW Broadcasting. O na kũrĩ ũguo, aarĩ na ariũ a Ithe witũ aingĩ thĩinĩ wa Afrika matihotaga kuona programu icio kũgerera Intaneti. Nĩkĩ?

 Ndũkoragwo ũrĩ ũndũ mũhũthũ kuona Intaneti kũndũ kũingĩ thĩinĩ wa Afrika. Na kũrĩa yoneka, maita maingĩ ĩrutaga wĩra kahora na ĩ goro mũno. Kwa ngerekano, mũrori ũmwe wa mũthiũrũrũko bũrũri-inĩ wa Madagascar nĩ aarutire programu ya JW Broadcasting Intaneti-inĩ. Aarĩhire dola 16, na icio nĩ mbeca nyingĩ mũno, makĩria ma iria mũndũ angĩthũkũma harĩ kiumia. a

 O na kũrĩ na mathĩna macio, andũ milioni nyingĩ thĩinĩ wa Afrika nĩ marahota kwĩrorera JW Broadcasting matekũhũthĩra Intaneti. Na njĩra ĩrĩkũ?

 Kuuma 2017, andũ arĩa makoragwo mũhuro wa Sahara nĩ mahotaga kuona JW Broadcasting kũgerera ceceni ya TV ya satellite. Ceceni ĩyo ĩmemerekagio o mũthenya hatarĩ marĩhi na thiomi 16.

 Nĩguo ũndũ ũcio ũhingio, Aira a Jehova marĩhaga ceceni ya motungata ma TV nĩguo ũhoro ũcio ũmemerekio kũgerera satellite. Ũtungata ũcio ũhũthĩkaga mabũrũri-inĩ 35 marĩa marĩ mũhuro wa Sahara. Ũrĩhagĩrũo makĩria ma dola 12,000 o mweri. No rĩmwe na rĩmwe, nĩ kũrĩhagwo mũigana ũngĩ wa mbeca rĩrĩa kũrabatara kũmemerekio ĩmwe kwa ĩmwe ceceni-inĩ ĩngĩ. Ũndũ ũcio nĩ ũhotithagia andũ ngiri nyingĩ gũkenera igomano na programu cia mwanya.

 Andũ aingĩ, nginya arĩa matarĩ Aira a Jehova nĩ meeroragĩra ceceni ya JW satellite marĩ kwao mũciĩ. O na kũrĩ ũguo, ariũ a Ithe witũ aingĩ matingĩhota kwĩgũrĩra indo iria irabatarania nĩguo merorere ceceni ĩyo. Nĩguo mahote kwĩrorera, makĩria ma Nyũmba cia Ũthamaki 3,670 nĩ ciĩkĩrĩtwo indo iria irabatarania nĩguo aarĩ na ariũ a Ithe witũ makerorera JW Broadcasting marĩ kũu. Thogora wa indo icio cia satellite o hamwe na gũcitwara, nĩ ta dola 70 angĩkorũo nyũmba ĩyo ya Ũthamaki nĩ ĩrĩ na TV kana projector. No angĩkorũo ndĩrĩ, indo icio no ciume ta dola 530.

 Aarĩ na ariũ a Ithe witũ nĩ macokagia ngatho mũno nĩ ũndũ wa ceceni ĩyo. Mũthuri ũmwe wa kĩũngano kuuma Cameroon aaugire ũũ: “Nĩ ta famĩlĩ itũ ĩheetwo maana ĩrĩ kũndũ gatagatĩ-inĩ ka werũ.” Nake mũrũ wa Ithe witũ Odebode kuuma Nigeria aaugire: “Twĩroragĩra ceceni ĩyo twĩ famĩlĩ maita matatũ o kiumia. Ciana ciakwa nĩ ciĩrĩgagĩrĩra mũno mahinda macio. O na nĩ ciugaga tũhingũre ceceni ĩyo mahinda mangĩ.” Rose, ũrĩa o nake umĩte Nigeria aaugire ũũ: “Ndĩ na gĩkeno tondũ JW satellite nĩ ĩndeithĩtie gũtiga kwĩrorera mohoro mũno. Rĩrĩa nderoragĩra mohoro, nĩ ndarakaragio nĩ maũndũ marĩa ndoonaga na thakame yakwa ĩkambata. No JW Broadcasting nĩ ĩkĩraga mũndũ ngoro na ĩkamũhooreria! Nĩ ndĩmĩendete mũno. No njuge atĩ nĩ kĩrathimo kĩnene kuuma kwĩ Jehova.”

 Mũrori ũmwe wa mũthiũrũrũko kuuma Mozambique aaugire atĩ, mũthiũrũrũko-inĩ wake Nyũmba cia Ũthamaki nĩ cithondeketwo nĩguo ihote kwamũkĩra ceceni ya JW satellite. Aarĩ na ariũ a Ithe witũ makinyaga mbere ithaa rĩmwe kana makĩria nĩguo merorere JW Broadcasting kũgerera satellite.

 Kĩgomano-inĩ gĩa kĩĩmabũrũri kĩrĩa kĩarĩ Johannesburg, South Africa, mwaka wa 2019, ceceni ĩyo nĩ yahũthĩrirũo kũmemerekia icigo-inĩ kenda mĩario ĩmwe ĩrĩa nĩ hamwe na ĩrĩa yarutirũo nĩ athuri a Kĩama Kĩrĩa Gĩtongoragia. Sphumelele, wa Rũhonge rwa Broadcasting rwa wabici ya rũhonge ya South Africa, aaugire ũũ: “Mahinda mahĩtũku twamemerekagia mĩario kũgerera Intaneti. No Intaneti yabataraga ĩkorũo ĩrĩ njega na nĩ twarĩhagĩra. No ceceni ya JW satellite ndĩrĩ goro na nĩ ya kwĩhokeka.”

 Nĩ ngathoi nĩ mĩhothi yanyu nĩ ũndũ wa wĩra wa thĩ yothe, tondũ rĩu aarĩ na ariũ a Ithe witũ aingĩ thĩinĩ wa Afrika nĩ marahota kwĩrorera JW Broadcasting kũgerera satellite. Nĩ tũrakena nĩ mĩhothi yanyu ĩrĩa mũrutaga na njĩra itiganĩte iria irĩ thĩinĩ wa donate.isa4310.com.