“Andũ nĩ mareka maũndũ maingĩ mũno marĩa ica ikuhĩ megũthũkia thĩ na gĩkĩro kĩnene. Mataũni manene megũkorũo mahumbĩrĩtwo nĩ maĩ, kũgĩe ũrugarĩ ũkĩrĩtie njano, ihuhũkanio cia kũmakania, thĩna mũnene wa kwaga maĩ, na kwanangwo kwa mĩthemba milioni nyingĩ ya mĩmera na nyamũ. Ũyũ ti ũndũ wa gwĩcirĩrio kana ũhoro wongereirũo cumbĩ. Ũguo nĩguo ũthuthuria wa sayansi wonanĩtie gũgũkorũo kũhaana, angĩkorũo thirikari itikũgarũrĩra ũrĩa ihũthagĩra hinya wa thitima.”—Mĩario ya mũtongoria ũmwe wa Ũrũmwe wa Mabũrũri wĩtagwo António Guterres, ĩgiĩ riboti ĩrĩa yarutirũo Ĩpuro 4, 2022 nĩ kĩama gĩa kwarĩrĩria mogarũrũku ma rĩera thĩinĩ wa thĩ (Intergovernmental Panel on Climate Change).

 “Athomi a sayansi nĩ marutĩte mũkaana atĩ ica ikuhĩ, hakuhĩ mĩciĩ yothe 423 ya kũgitĩra nyamũ (national parks) [thĩinĩ wa Amerika, US] nĩ ĩgũthũkangio nĩ ũgarũrũku wa rĩera, makĩria nĩ ũndũ wa kwambatĩra kwa ũrugarĩ. Maũndũ moru marĩa mangĩkĩka nĩ ta marĩa tũngĩthoma thĩinĩ wa Bibilia: mĩaki na mĩiyũro, kũringũka kwa mbarabu, kuongerereka kwa maĩ ma iria na ũrugarĩ.”—“Flooding Chaos in Yellowstone, a Sign of Crises to Come,” The New York Times, Juni 15, 2022.

 Hihi mathĩna marĩa marehetwo nĩ ũgarũrũku wa rĩera thĩinĩ wa thĩ no maniinwo? Angĩkorũo no maniinwo-rĩ, nũũ ũkaamaniina? Ta wĩcirie ũrĩa Bibilia yugaga.

 Bibilia yugĩte atĩ Ngai nĩ “[akaananga] arĩa manangaga thĩ.” (Kũguũrĩrio 11:18) Mũhari ũcio wa Bibilia ũratũruta maũndũ matatũ:

1.  1. Ciĩko cia andũ nĩ igũthũkangia thĩ na gĩkĩro kĩnene.

2.  2. Thĩ nĩ ĩgaatiga kwanangwo.

3.  3. Ngai nĩwe ũgaathondeka kũrĩa thĩ yanangĩtwo, no ti andũ.

 Bibilia yugaga atĩ “thĩ ĩtũũraga tene na tene.” (Kohelethu 1:4) Ĩgũtũũra ĩikaragwo nĩ andũ.

•   “Andũ arĩa athingu nĩ makaagaya thĩ, na magaatũũra thĩinĩ wayo tene na tene.”—Thaburi 37:29.

 Thĩ ĩno itũ nĩ ĩgaathondekwo yagĩre ta ũrĩa yarĩ kĩambĩrĩria-inĩ.

•   “Werũ na bũrũri ũrĩa mũngʼaru nĩ igaakena mũno, werũ ũrĩa mwaraganu nĩ ũgaakena na ũcanũke ta mahũa ma nyeki-inĩ.”—Isaia 35:1.