Ũndũ ũmwe wa ma wa gũtũũmĩrĩria nĩ atĩ, Ngai nĩ onaga mĩnyamaro ĩrĩa ĩrĩ thĩinĩ wa thĩ ũmũthĩ, na nĩ abangĩte kuoya ikinya. (Thaburi 72:13, 14) Thĩinĩ wa Kiugo gĩake Bibilia, Ngai eranĩire atĩ ‘arĩa matũire manyariragwo, arĩmarĩha na ũhurũko.’ Ageka ũguo rĩ? “Hĩndĩ ĩrĩa Mwathani witũ Jesu akaguũranĩrio oimĩte Igũrũ, me hamwe na araika ake arĩa me na ũhoti . . . . Nake nĩakerĩhĩria kũrĩ andũ arĩa matoĩ Ngai, o na arĩa mataathĩkaga nĩ Ũhoro-ũrĩa-Mwega wa Mwathani witũ Jesu.” (2 Athesalonike 1:7, 8) Kũguũranĩrio kũu kwa Jesu gũgeekĩka hĩndĩ yũkĩte thĩinĩ wa kĩrĩa Bibilia ĩtaga “mbaara ya mũthenya ũrĩa mũnene wa Ngai, Mwene-Hinya-Wothe,” na noyo ĩtagwo Hari–Magedoni.—Kũguũrĩrio 16:14, 16.

Mbaara-inĩ ĩyo ya ihinda rĩũkĩte, Ngai ndakaahũthĩra andũ, no akaahũthĩra Mũrũ wake, Jesu Kristo, marĩ hamwe na ciũmbe ingĩ irĩ hinya cia roho nĩguo aniine andũ arĩa oru. Mbũtũ ĩyo ya igũrũ nĩ ikaaniina ũhinyanĩrĩria wothe.—Isaia 11:4; Kũguũrĩrio 19:11-16.

Mawoni ma Ngai megiĩ mbaara matirĩ magarũrũka. O na ũmũthĩ no onaga mbaara ĩrĩ njĩra ĩtĩkĩrĩkĩte ya kũniina maũndũ ma kũhinyanĩrĩria o na waganu. No o ta ũrĩa gũkoretwo kuuma tene, no Ngai wiki ũkoragwo na kĩhooto gĩa kuuga rĩrĩa mbaara ta icio ikũrũo na nũ ũkũrũa. Ta ũrĩa tuona, Ngai nĩ atuĩte itua atĩ mbaara ya kũniina waganu na kũrĩhĩria andũ arĩa marahinyĩrĩrio ĩkaarũo hĩndĩ yũkĩte na ĩkaarũo nĩ Mũrũ wake, Jesu Kristo. Ũguo nĩ kuuga  atĩ mbaara iria irarũo thĩinĩ wa thĩ ũmũthĩ itikoragwo ciĩtĩkĩrĩkĩte harĩ Ngai, o na kũngĩoneka ta kũrĩ na gĩtũmi kĩega gĩa kũrũa.

Ngerekano: Ta hũũra mbica tũhĩĩ twĩrĩ twa nyina ũmwe twambĩrĩirie kũrũa, na ithe ndarĩ kuo. Tũkamba gũtiga kũrũa tũkahũũrĩra ithe thimũ. Kahĩĩ kamwe gakoiga atĩ karĩa kangĩ nĩko kambĩrĩirie kũrũa, nako kau kangĩ gakoiga atĩ kau kangĩ nĩko gegũgacogothete. Twerĩ tũgathaitha ithe, o kahĩĩ gagĩciragia atĩ ithe nĩ egũkanyita mbaru. No thutha wa gũthikĩrĩria tũhĩĩ tũu twerĩ, ithe agatwĩra tũtige kũrũa tũmweterere acoke mũciĩ nĩguo marĩrĩrie ũhoro ũcio. Tũhĩĩ tũu tũgeterera kwa ihinda. No tũgacoka tũkambĩrĩria kũrũa rĩngĩ. Ithe acoka mũciĩ, akarakara nĩ ũndũ wa tũhĩĩ tũu na agatũhũũra twerĩ nĩ ũndũ wa kwaga kũmwathĩkĩra.

Ũmũthĩ, mabũrũri marĩa marũaga nĩ mahoyaga Ngai kaingĩ amanyite mbaru. No Ngai ndanyitaga mbaru mwena o na ũmwe mbaara-inĩ iria irũagwo ũmũthĩ. Ithenya rĩa ũguo, thĩinĩ wa Kiugo gĩake Bibilia, oigĩte wega ũũ: “Menyai gũgathukĩra mũndũ o na ũrĩkũ ũũru nĩ ũndũ wa ũũru ũrĩa amwĩkĩte,” na “Mũtikanerĩhĩrie.” (Aroma 12:17, 19) Makĩria ma ũguo, nĩ amenyithanĩtie atĩ andũ magĩrĩirũo ‘kũmweterera mategũthethũka’ nĩguo oe ikinya, na ageka ũguo hĩndĩ ya Hari–Magedoni. (Thaburi 37:7) Hĩndĩ ĩrĩa mabũrũri maaga gweterera oe ikinya na ithenya rĩa ũguo makeingĩria mbaara-inĩ, Ngai onaga mbaara icio irĩ ũndũ wa mwĩgerero na nĩ arakaraga. Kwoguo hĩndĩ ya Hari–Magedoni, Ngai nĩ akonania marakara make na acirithie ndũrĩrĩ riita rĩmwe rĩa kũigana na njĩra ya kũniina “mbaara nginya o gĩturi gĩa thĩ.” (Thaburi 46:9; Isaia 34:2) Hari–Magedoni ĩgaakorũo ĩrĩ mbaara ya kũniina mbaara ciothe.

Kũniinwo kwa mbaara nĩ kĩmwe kĩa irathimo nyingĩ cia Ũthamaki wa Ngai. Jesu nĩ aaririe ũhoro wa thirikari ĩyo thĩinĩ wa ihoya rĩrĩ rĩũĩkaine mũno: “Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:10) Ũthamaki wa Ngai to mbaara ũkaaniina, no nĩ ũkaaniina kĩhumo kĩa mbaara, na nĩkĩo waganu. * (Thaburi 37:9, 10, 14, 15) Na nĩkĩo arũmĩrĩri a Jesu metagĩrĩra mũno irathimo cia Ũthamaki wa Ngai.—2 Petero 3:13.

No rĩrĩ, tũgweterera ihinda rĩigana atĩa nĩguo Ũthamaki wa Ngai ũniine mĩnyamaro, ũhinyanĩrĩria, na waganu wothe? Kũhinga kwa morathi ma Bibilia kũronania atĩ tũratũũra “matukũ marĩa ma kũrigĩrĩria” ma mahinda maya. (2 Timotheo 3:1-5) * Ica ikuhĩ, Ũthamaki wa Ngai nĩ ũkũniina matukũ maya ma kũrigĩrĩria kũgerera mbaara ya Hari–Magedoni.

O ta ũrĩa tũkuonete, andũ arĩa makaaniinwo thĩinĩ wa mbaara ĩyo ya mũthia nĩ arĩa maregaga gwathĩkĩra “Ũhoro-ũrĩa-Mwega wa Mwathani witũ Jesu.” (2 Athesalonike 1:8) No ririkana atĩ, Ngai ndakenagio nĩ gĩkuũ kĩa mũndũ o na ũrĩkũ, nginya ũrĩa mwaganu. (Ezekieli 33:11) Tondũ “ndendaga mũndũ o na ũmwe” akaaniinwo thĩinĩ wa mbaara ĩyo ya mũthia, ihinda-inĩ rĩrĩ nĩ aratigĩrĩra atĩ ũhoro ũrĩa mwega wĩgiĩ Mwathani witũ Jesu nĩ ũrahunjio “thĩ yothe, ũtuĩke ũira kũrĩ ndũrĩrĩ ciothe” mũthia ũtanakinya. (2 Petero 3:8, 9; Mathayo 24:14; 1 Timotheo 2:3, 4) Nĩ ma, kũgerera wĩra wa kũhunjia thĩinĩ wa thĩ yothe ũrĩa ũrarutwo nĩ Aira a Jehova, ũmũthĩ andũ marĩ na mweke wa kũmenya Ngai, gwathĩkĩra ũhoro ũrĩa mwega wĩgiĩ Jesu, na gũgaatũũra hĩndĩ gũtagaakorũo na mbaara rĩngĩ.