Mwaka-inĩ wa 33 Mahinda Maitũ, Jesu nĩ aakuire, akĩriũka, na akĩambata kũrĩa igũrũ. Thutha wa ihinda, nĩ aacokire akĩheo ũnene wa gwathana arĩ Mũthamaki. (Danieli 7:13, 14) Mahinda mokĩte, Jesu arĩ Mũthamaki nĩ akaarehe thayũ thĩinĩ wa thĩ yothe na aniine ũkĩa.—Thoma Thaburi 72:7, 8, 13.

Jesu nĩ ageeka maũndũ ma magegania rĩrĩa agakorũo agĩatha andũ. Nĩ agatũma andũ matuĩke akinyanĩru akĩhũthĩra hinya ũrĩa ahetwo nĩ Ithe. Andũ nĩ magaakenera ũtũũro gũkũ thĩ mategũkũra kana gũkua.—Thoma Johana 5:26-29; 1 Akorintho 15:25, 26.

Ihinda-inĩ rĩrĩ, Jesu aratongoria arũmĩrĩri ake a ma wĩra-inĩ wa kũhunjia thĩinĩ wa thĩ yothe. Maceeragĩra andũ nĩguo mamarute ũrĩa Bibilia yugaga igũrũ rĩgiĩ Ũthamaki wa Ngai. Jesu oigire atĩ, egũthiĩ na mbere gũteithĩrĩria wĩra wa arutwo ake nginya rĩrĩa Ũthamaki wa Ngai ũkaaniina thirikari cia andũ.—Thoma Mathayo 24:14; 28:19, 20.

Kũgerera kĩũngano kĩa Akristiano a ma, Jesu nĩ arateithia andũ magĩe na mũtũũrĩre mwega. Egũthiĩ na mbere kũmateithia nĩguo makaahonoka kũniinwo gwa thĩ ĩno njũru, na maingĩre thĩinĩ wa thĩ njerũ ĩrĩa Ngai eranĩire.—Thoma 2 Petero 3:7, 13; Kũguũrĩrio 7:17.