Ndaaciarĩirũo itũũra-inĩ rĩa Bilbao, rĩrĩa rĩrĩ mwena wa rũgongo wa Spain. Twaciarĩtwo tũrĩ ana na nĩ niĩ ndaarĩ wa kerĩ. Famĩlĩ itũ nĩ yaarũmĩtie ndini ya Gatoreki mũno, na ndiatĩĩraga Mitha. Ndaatuĩkire mwarimũ ndĩ na mĩaka 23, na nĩ ndendete wĩra ũcio mũno, ũrĩa ndaarutire kwa ihinda rĩa mĩaka 40. Ningĩ nĩ ndakenagĩra kũrutana mathomo ma ndini ya Gatoreki cukuru, na hwaĩ-inĩ ngaruta airĩtu kĩrĩra.

Ndĩ wa mĩaka 33 tu, mũthuri wakwa ũrĩa ndendete mũno na twahikanĩtie nake kwa ihinda rĩa mĩaka 12, nĩ aakuire na akĩndiga na tũirĩtu tũna.Nĩ ndonaga ta wĩtĩkio wa kanitha wakwa ũngĩanjĩkĩrire ngoro, ĩndĩ no ndeeyũragia ciũria nyingĩ. Ndeeyũragia ũũ: ‘Nĩ kĩĩ gũtũmaga andũ makue na Kristo nĩ aamakũũrire? Nĩkĩ gĩtũmaga tũhoe Ũthamaki wa Ngai ũke, angĩkorũo andũ arĩa ega mathiaga igũrũ?’ Kĩũria kĩngĩ ndeeyũragia nĩ gĩkĩ: ‘Angĩkorũo Ngai aciirithagia andũ makua-rĩ, harĩ bata ũrĩkũ akaaruta andũ kũrĩa igũrũ, angĩ pagatorĩ na arĩa angĩ icua-inĩ nĩguo amaciirithie mũthenya wa cira?’

Harĩ ahunjia amwe a kanitha witũ ndooririe ciũria icio. Ũmwe wao aanjokerie ũũ: “Niĩ ndiũĩ. Thiĩ ũrie bishobu. Ũregia nĩkĩ? Na githĩ ndwĩtĩkĩtie Ngai? Tigana na maũndũ macio!” Ĩndĩ, no ndaathire na mbere gwetha macokio. Thutha-inĩ, ngĩambĩrĩria gũthikagĩrĩria gĩthomo kĩa andũ a ndini ya Jesuiti, Pentekosti, na Agnosti. No ndionire macokio mega ma ciũria ciakwa.

Rĩrĩa ndaarĩ na mĩaka 60 na kĩndũ, kairĩtu kamwe ndaathomithagia ka mĩaka 7, nĩ kaanyitire ũgeni ngathikĩrĩrie gĩthomo kĩa Aira a Jehova. Nĩ ndakenirio mũno nĩ maũndũ marĩa ndoonire na ngĩigua, no tondũ ndaakoragwo na mĩhang’o mĩingĩ, tũtiacokire kuonana rĩngĩ na Aira a Jehova. Mĩaka ĩĩrĩ thutha ũcio, Aira erĩ a Jehova Juan na mũtumia wake weetagwo Maite nĩ maanjereire. Na kwa ihinda rĩa mĩeri ta ĩtatũ, nĩ twagĩire na ndeereti cia ciũria na macokio, iria ciatũmire nyambĩrĩrie kwĩruta Bibilia.

Ndaahĩahĩaga mũno tũcemanie nao, ndĩrute Bibilia! Ndathuthuragia na kinyi maũndũ mothe ngĩhũthĩra Bibilia ithatũ cia ataũri ngũrani, nĩguo nyone kana ũrutani wa Aira a Jehova nĩ wa ma. Ndiakarire itamenyete atĩ maũndũ marĩa ndaatũire ndutagwo kanitha-inĩ witũ, maarĩ  mahĩtanu. Nĩ ndaiguire ndatukanĩrũo mũno ndona ngũrani ĩrĩa yarĩ ho gatagatĩ-inĩ ka maũndũ marĩa ndetĩkĩtie, na marĩa nderutaga kuuma Bibilia-inĩ. Ngĩona atĩ nĩ ndaabataraga kũgarũrĩra wĩtĩkio wakwa biũ, ta ũrĩa mũndũ angĩkũũra mũtĩ mũrũmu hamwe na mĩri yaguo.

Mũthuri ũrĩa wacokire kũũhikia nĩ aarwarire mũno, na agĩkua. Ningĩ hĩndĩ o ĩyo, ngĩtiga wĩra ũrĩa ndaarutaga, na ngĩamba kuuma itũũra rĩa Bilbao gwa kahinda. Juan na Maite magĩthama, na kwoguo ngĩtiga kwĩruta Bibilia. Ĩndĩ, o na kũrĩ ũguo, nĩ ndaamenyete atĩ maũndũ marĩa ndaarutagwo nĩ Aira a Jehova, nĩ ma ma. Matingĩariganĩire.

Mĩaka 20 thutha ũcio, rĩrĩa ndaarĩ na mĩaka 82, Juan na Maite nĩ maacokire Bilbao na magĩũka kũnjerera. Nĩ ndaakenire mũno kũmona! Ngĩmenya atĩ Jehova ndaariganĩirũo nĩ niĩ, na ngĩambĩrĩria rĩngĩ kwĩruta Bibilia. Juan na Maite nĩ maangirĩrĩirie mũno, tondũ kaingĩ ndamooragia ciũria o iria rĩngĩ na rĩngĩ. Ngwĩciria nĩ ndabataraga gũtĩtĩrithĩrio morutani ma Bibilia, nĩguo hote gũteanĩria wĩtĩkio ũrĩa waagĩte mĩri ngoro-inĩ yakwa. Ningĩ nĩ ndaabataraga ũmenyo wa kũigana, nĩguo hote gũtaarĩria arata na andũ a famĩlĩ ma cia Bibilia.

Ndirĩ ndaakorũo na gĩkeno ta kĩrĩa ndaarĩ nakĩo mũthenya ũrĩa ndaabatithirio, ndĩ na ũkũrũ wa mĩaka 87. Ndaabatithirio hĩndĩ ya gĩthomo kĩnene kĩa Aira a Jehova. Mũthuri ũmwe nĩwe waarutire mĩario ya Bibilia ĩrĩa yaarongoreirio arĩa maabatithagio mũthenya ũcio. Mĩario ĩyo yaatũmire njite maithori. Ndaiguaga ta arĩ Jehova waragia na niĩ ĩmwe kwa ĩmwe. Ndabatithio, Aira aingĩ mũno a Jehova nĩ mokire kũngeithia makenete, o na gũtuĩka aingĩ ao matianjũĩ!

Ndecũũrania igũrũ rĩgiĩ kĩyo gĩakwa gĩa gwetha ũhoro ũrĩa wa ma, ndirikanaga ciugo ici cia Jesu: “Hoyai, na nĩmũkũheo; mathai, na nĩmũkuona; ringaringai mũrango, na nĩmũkũhingũrĩrũo.” (Mathayo 7:7) Rĩu tondũ nĩ nyonete macokio marĩa ndeeriragĩria mũno kũmenya, ũndũ ũcio ũndehagĩra gĩkeno kĩnene mũno, makĩria rĩrĩa ndĩrahunjĩria andũ ma icio cia Bibilia.

O na gũtuĩka rĩu ndĩ na mĩaka 90, harĩ o maũndũ maingĩ ndĩrabatara kwĩruta megiĩ Jehova. Nĩ ngenagĩra mũno hĩndĩ ciothe rĩrĩa ngũthiĩ mĩcemanio ya Aira a Jehova, tondũ nĩ ndĩrutaga maũndũ maingĩ ma bata, na ngakenera gũkorũo hamwe na aarĩ na ariũ a Ithe witũ. Nĩ ndĩriragĩria mũno rĩrĩa ngaatuĩka mwarimũ rĩngĩ thĩinĩ wa Paradiso gũkũ thĩ. (Kũguũrĩrio 21:3, 4) Ningĩ nĩ ndĩriragĩria mũno gũkoona andũ a famĩlĩ arĩa maakuire magĩcokio muoyo rĩngĩ, na mweke ũrĩa ngaakorũo naguo wa kũmaruta ma cia Bibilia. (Atũmwo 24:15) Nĩ ngaakena mũno kũmataarĩria ũhoro wa kĩheo gĩa bata kĩrĩa Jehova aaheire ũkũrũ-inĩ!