Kũriũkio kwa Jesu nĩ gwatũmire arutwo ake magĩe na ũũma na kĩyo. Kwa ngerekano, mũtũmwo Paulo nĩ aaceerire kũndũ kũingĩ thĩinĩ wa Asia Nini, akĩambagĩrĩria ciũngano na agekagĩra Akristiano hinya nĩguo mahote kũhiũrania na hatĩka iria maacemanagia nacio o hamwe na ũkararia. O na kũrĩ na moritũ ta macio, Akristiano no mathiire na mbere kuongerereka.

Thutha ũcio Paulo nĩ aaikirio korokoro. Ĩndĩ o na arĩ kũu, no aandĩkire marũa ma gwĩkĩra ngoro na gũtaara ciũngano cia Gĩkristiano. Ningĩ nĩ aamaheire mũkaana wĩgiĩ ũregenyũki, ũrĩa warĩ ũgwati mũnene. Agĩtongorio nĩ roho wa Ngai, Paulo nĩ onete kabere atĩ andũ matariĩ ta “njũi ndĩani” maraaria “maũndũ ma ũtũrĩka” nĩ maangĩaingĩrire thĩinĩ wa kĩũngano na “magucagĩrĩrie arutwo mamarũmagĩrĩre.”—Atũmwo 20:29, 30.

Mũthia-inĩ wa karine ya mbere, ũregenyũki ũcio nĩ waambĩrĩirie. Hĩndĩ ĩyo Jesu ũrĩa waariũkĩtio nĩ aaguũrĩirie mũtũmwo Johana, kĩoneki kĩa maũndũ marĩa maarĩ mbere. Ningĩ o ta ũrĩa Johana aandĩkire, akararia kana arutani a maheeni matingĩahotire kũgirĩrĩria Ngai ahingie muoroto wake wa kuuma o kĩambĩrĩria wĩgiĩ thĩ na andũ. “Ndũrĩrĩ ciothe na mĩhĩrĩga yothe na andũ a mĩario yothe na iruka ciothe” nĩ mangĩkaigua ũhoro ũrĩa mwega wa Ũthamaki wa Ngai. (Kũguũrĩrio 14:6) Paradiso nĩ ĩgaacokio gũkũ thĩ na mũndũ o wothe wendaga gwĩka wendi wa Ngai nĩ agatũũra kuo!

Na githĩ ũcio ti ‘ũhoro mwega’? Angĩkorũo nĩguo-rĩ, wĩrute makĩria ndũmĩrĩri ya Ngai kũrĩ andũ ĩrĩa ĩrĩ thĩinĩ wa Bibilia na wone ũrĩa ĩngĩkũguna rĩu na ihinda rĩrĩa rĩũkĩte.

No ũthome Bibilia Intaneti-inĩ thĩinĩ wa www.isa4310.com. Thĩinĩ wa Rĩarĩro rĩu, no ũthome broshua ya Biblia—Ina Ujumbe Gani? na Ũhoro Mwega Kuuma Kũrĩ Ngai! o hamwe na ibuku Bibilia Ĩrutanaga Atĩa Kũna? na mabuku mangĩ maaragĩrĩria kĩrĩa gĩtũmaga twĩhoke Bibilia na ũrĩa tũngĩhũthĩra motaaro mayo thĩinĩ wa famĩlĩ na ũtũũro-inĩ witũ. Kana ũrie Aira a Jehova makũhe ũhoro makĩria.

—Ũhoro ũyũ uumĩte ibuku-inĩ rĩa Atũmwo, Aefeso, Afilipi, Akolosai, Filemona, 1 Johana, Kũguũrĩrio. ▪