Hihi No Wĩhoke Ndini Ũhoro-inĩ Wĩgiĩ Mbaara?

Alberto aatungatire njeshi-inĩ mĩaka ta ikũmi. Oigire ũũ: “Mũhunjia witũ wa njeshi aatũrathimire na agĩtwĩra ũũ: ‘Ngai e hamwe na inyuĩ.’ Ngĩĩyũria atĩrĩ, ‘Ndathiĩ kũũraga, no Bibilia yugaga, “Ndũkanoragane.”’”

Nake Ray aarĩ mũnjeshi wa maĩ-inĩ hĩndĩ ya Mbaara ya Kerĩ ya Thĩ. Rĩmwe nĩ eerire mũhunjia wao wa njeshi ũũ: “Ũũkaga meri-inĩ ũkahoera njeshi na ũkahoya nĩguo tũhootane. Na githĩ thũ ciitũ o nacio to ihoyagĩrũo?” Mũhunjia ũcio agĩcokia akiuga atĩ maũndũ ma Ngai matingĩmenyeka.

Angĩkorũo ndũiganagĩra nĩ macokio ta macio, menya atĩ ndũrĩ wiki.

BIBILIA ĨRUTANAGA ATĨA?

Jesu oigire atĩ rĩathani rĩmwe inene rĩa Ngai nĩ ‘kwenda ũrĩa ũngĩ o ta ũrĩa mũndũ eyendete we mwene.’ (Mariko 12:31) Hihi Jesu nĩ aaigire mĩhaka atĩ twendage arĩa angĩ kũringana na kũrĩa moimĩte kana rũrĩrĩ rwao? Aca. Eerire arutwo ake ũũ: “Nĩ ũguo andũ othe marĩmenyaga mũrĩ arutwo akwa, mwatũũra mwendaine.” (Johana 13:34, 35) Wendo wao harĩ mũndũ na ũrĩa ũngĩ ũngĩarĩ wa mwanya mũno ũũ atĩ ũngĩarĩ ta rũũri rwa kũmakũũranaga. Nĩ kũneana mangĩkaneanaga mĩoyo yao nĩ ũndũ wa arĩa angĩ, no ti kũmaruta mĩoyo.

Akristiano a tene nĩ maarũmagĩrĩra ciugo icio cia Jesu. Ibuku rĩa The Encyclopedia of Religion riugaga ũũ: “Atongoria a tene a kanitha, o hamwe na Tertullian na Origen, nĩ mooigaga atĩ Akristiano nĩ maathĩtwo matikanae kũruta mĩoyo ya andũ arĩa angĩ, na ũndũ ũcio nĩguo waagiragia manyite mbaru njeshi ya Roma.”

Ĩ NAO AIRA A JEHOVA MEKAGA ATĨA?

Tondũ Aira a Jehova makoragwo hakuhĩ mabũrũri-inĩ mothe-rĩ, rĩmwe na rĩmwe nĩ mekoraga magĩikara mabũrũri-inĩ merĩ mararũa. O na kũrĩ ũguo, nĩ mageragia ũrĩa wothe mangĩhota gũtũũria rũũri rwa kũmakũũrana, rwa wendo.

Kwa ngerekano, hĩndĩ ya mbaara cia gĩĩkabira cia 1994 gatagatĩ-inĩ ka Ahutu na Atutsi bũrũri-inĩ wa Rwanda, Aira a Jehova maatianyitire mbaru o na hanini mwena o na ũrĩkũ. Aira a Jehova Ahutu na Atutsi nĩ maahithanire, na kaingĩ gwĩka ũguo nĩ kwaigaga mĩoyo yao ũgwati-inĩ. Aira a Jehova erĩ Ahutu nĩ maanyitirũo nĩ itungati cia Interahamwe nĩ ũndũ wa kũhitha ariũ a Ithe wao Atutsi na makĩĩrũo ũũ: “No mũhaka tũmũũrage tondũ nĩ mwateithirie Atutsi kũũra.” Ũndũ wa kĩeha nĩ atĩ, Aira acio erĩ Ahutu nĩ mooragirũo.—Johana 15:13.

Wee ũkuona atĩa: Hihi ciĩko icio cia Aira a Jehova nĩ ĩratwarana na ciugo cia Jesu ciĩgiĩ mũndũ kũneana muoyo wake nĩ ũndũ wa arĩa angĩ?

[Mbica karatathi ka 5]

[Mbica karatathi ka 5]

Based on U.S. Army photo

[Mbica karatathi ka 5]

Atongoria a ndini hihi nĩ marutanaga wendo wa ma wa Gĩkristiano?