Mũtumia ũmwe wonaga ta Jehova atangĩamũrũmbũirie o na hanini oigire ũũ: “No gũkorũo ũndũ ũrĩa mũnene ũgiragia nguhĩrĩrie Ngai na ngeragia kũũtoria nĩ kũigua ta itarĩ kĩene.” Hihi ũguo nĩguo ũiguaga? Angĩkorũo nĩguo, no gũkorũo nĩ wĩyũragia, ‘Hihi Jehova nĩ arũmbũyagia ndungata ciake irĩ mũndũ ũmwe ũmwe?’ Ĩĩ! Tondũ nĩ tuonaga ũndũ ũcio ciugo-inĩ ici cia Jesu.—Thoma Johana 6:44.

Jesu ũrĩa ũĩ Jehova wega makĩria gũkĩra mũndũ ũngĩ o wothe, oigire atĩa ũndũ-inĩ ũcio? (Luka 10:22) Oigire ũũ: “Gũtirĩ mũndũ ũngĩhota gũũka kũrĩ niĩ atagucĩrĩirio nĩ Ithe witũ ũrĩa wandekirie.” Kwoguo, tũtingĩtuĩka arũtwo a Kristo—na athathaiya a Ithe witũ wa igũrũ, Jehova—tũtangĩgucĩrĩrio nĩ Jehova we mwene. (2 Athesalonike 2:13) Tũngĩtaũkĩrũo nĩ ciugo icio cia Jesu, nĩrĩo tũngĩona ũũma wa atĩ Ngai nĩ arũmbũyagia mũndũ o mũndũ.

Kũgucĩrĩrio nĩ Jehova nĩ kuuga atĩa? Kiugo gĩa Kĩgiriki “kũgucĩrĩria” ningĩ nĩ kĩhũthĩkaga kuuga kũgucia na neti ya gũtega thamaki. (Johana 21:6, 11) Hihi Jehova nĩ atũgucagia tũtekwenda, na gũtũtindĩkĩrĩria tũmũtungatĩre? Aca. Jehova nĩ atũheete wĩyathi wa kwĩamũrĩra, kwoguo ndatũtindĩkagĩrĩria tũhingũre ngoro ciitũ. (Gũcokerithia Maathani 30:19, 20) Mũthomi ũmwe oigire ũũ: “Mũndũ ndangĩhota kũhingũra ngoro ya mũndũ ũrĩa ũngĩ, tiga mũndũ we mwene amũhingũrĩre.” Jehova nĩ atuĩragia ngoro cia andũ bilioni nyingĩ thĩinĩ wa thĩ, agĩetha arĩa marĩ na mwerekera mwega. (1 Maũndũ ma Matukũ ma Tene 28:9) Ekaga ũguo atĩa?

Jehova agucagĩrĩria na njĩra ya wendo ngoro ya mũndũ ũrĩa ũrĩ na mwerekera mwega. Ekaga ũguo na njĩra igĩrĩ—Kũgerera ũhoro mwega ũrĩa ũrĩ thĩinĩ wa Bibilia, ũrĩa ũtũkinyagĩra tũrĩ mũndũ ũmwe ũmwe na kũgerera roho wake. Rĩrĩa Jehova ona mũndũ ũrakenera kwĩruta ma cia Bibilia, ahũthagĩra roho wake kũmũteithia ataũkĩrũo nĩ ma icio na gũcihũthĩra ũtũũro-inĩ wake. (1 Akorintho 2:11, 12) Tũtarĩ na ũteithio ũcio wa Ngai, tũtingĩtuĩka arũtwo a ma a Jesu na andũ meyamũrĩire gũtungatĩra Jehova.

Kwoguo-rĩ, ciugo cia Jesu thĩinĩ wa Johana 6:44 iratũruta ũndũ ũrĩkũ wĩgiĩ Jehova Ngai? Jehova agucagĩrĩria andũ nĩ ũndũ wa kuona ũndũ mwega thĩinĩ wa ngoro ciao na akamarũmbũiya marĩ mũndũ ũmwe ũmwe. Kũmenya ma ĩyo nĩ kwomĩrĩirie mũtumia ũrĩa ũkũgwetetwo hau kĩambĩrĩria-inĩ. Oigire ũũ: “Gũtuĩka ndungata ya Jehova nĩkĩo gĩtĩo kĩrĩa kĩnene mũno mũndũ angĩkorũo nakĩo. Nĩ gũkorũo Jehova nĩ aathurire nduĩke ndungata yake, no mũhaka ngorũo ndĩ wa bata mũno harĩ we.” Ĩĩ wee nawe? Hihi kũmenya atĩ Jehova nĩ arũmbũyagia ndungata ciake irĩ mũndũ ũmwe ũmwe no gũtũme wende kũmũhingũrĩra ngoro yaku?