Rĩu Nĩ Njũĩ Ngai Ũrĩa Thathayagia

Ta Ũrĩa Rũtaarĩirio Nĩ Marieta Manuel Bacudio

Mũhunjia ũmwe wa kanitha wa Pentecostal ũrĩa weragwo atĩ nĩ aarĩ na hinya wa kũhonania agĩũka gũceera. Rĩrĩa aahutirie, ‘ngĩgwa thĩ itekwĩigua nĩ ũndũ wa hinya wa roho.’ Rĩrĩa ndeiguire, ndonire ta ndaarĩ na kĩrĩa ndendaga—hinya wa kũhonania. Nĩ kĩĩ gĩatũmire ndĩĩkore ũndũ-inĩ ũcio, na wahutirie ũtũũro wakwa atĩa? Itanakwĩra ũhoro ũcio-rĩ, reke ndaarĩrie mũtũũrĩre wakwa wa na hau kabere.

NDAACIARĨIRŨO Ilocos Norte, bũrũri-inĩ wa Philippines, mweri 10, Dicemba, 1968, ndĩ wa mũgwanja harĩ ciana citũ ikũmi. O ta Afilipino aingĩ, twarerirũo tũrĩ a Gatoreki. Ndarĩkirie cukuru ya thekondarĩ mwaka wa 1986, na ndendaga gũtuĩka mũtumberia (nurse). O na kũrĩ ũguo, ũndũ ũcio ndwahotekire, tondũ nĩ ndaanyitirũo nĩ mũrimũ mũũru. O na ndeciragia atĩ nĩ ingĩakuire. Tondũ wa ũrĩa ndakuĩte ngoro nĩ ũndũ wa mũrimũ ũcio, ngĩhoya Ngai na ngĩĩhĩta atĩ ingĩkaahona, ingĩkaamũtungatĩra ũtũũro-inĩ wakwa wothe.

Thutha wa ihinda iraya ngĩhona, na ngĩririkana ũrĩa nderĩire Ngai. Kwoguo, mweri wa Juni 1991, ngĩingĩra cukuru ya Bibilia ya Pentecostal. Gwatuĩkaga atĩ cukuru ĩyo nĩ yatũmaga mũndũ agĩe na “kĩheo gĩa tũhũ kĩa roho mũtheru.” Ndendaga kũgĩa na hinya wa kũhonania. Thĩinĩ wa cukuru ĩyo twathomithagio atĩ mũndũ angĩagĩire na hinya ũcio kũgerera kwĩhinga na kũhoya. Hĩndĩ ĩmwe ngĩgeria kuonania ta ndaarĩ na “kĩheo,” ndaathikĩrĩirie na hitho mũndũ ũmwe twathomaga nake akĩhoya aanĩrĩire hĩndĩ ya mahoya. Arĩ hakuhĩ kũrĩkia, ngĩcoka na ihenya harĩa ndaaturĩtie maru. Thutha ũcio, ngĩmwĩra maũndũ marĩa ekũgwetaga mahoya-inĩ make, na agĩtĩkia atĩ niĩ ndaarĩ na “kĩheo kĩu gĩa tũhũ”!

Ngĩthiĩ na mbere na mathomo makwa, nĩ ndeyũragia ciũria nyingĩ. Kwa ngerekano-rĩ, Mathayo 6:9 yugaga ũhoro wa “Ithe” na “rĩĩtwa” rĩake. Nĩ ndoragia ciũria ta “Ithe ũcio ũgwetetwo nĩ Jesu nĩ ũrĩkũ?” na “Nĩ rĩĩtwa rĩa ũ rĩagĩrĩire kwamũrũo?” Kaingĩ arutani akwa maaheaga macokio itaataũkagĩrũo wega nĩmo na mataatũmaga njiganĩre. Nĩ maaragia ũhoro wĩgiĩ Ũtatũ na makoiga atĩ nĩ kĩriga. Maũndũ macio maatũmaga ndukanĩrũo mũno. O na kũrĩ ũguo, nĩ ndaathire na mbere gũthoma nĩguo nduĩke pasta.

Gũcemania na Aira a Jehova

Tũrĩ cukuru ĩyo ya Bibilia, twarutĩtwo atĩ Aira a Jehova nĩo ndini ĩrĩa ya maheeni biũ. Meeragwo atĩ matiĩtĩkĩtie Kristo. Ngĩkũria ũthũ mũnene mũno harĩ ndini ĩyo.

Mwaka-inĩ wakwa wa kerĩ cukuru-inĩ ĩyo, nĩ ndaathiire mũciĩ gũceerera aciari akwa hĩndĩ ya rũtha. Mwarĩ ũmwe wa maitũ mũkũrũ kũngĩra, wĩtagwo Carmen, akĩigua atĩ ndĩ mũciĩ na agĩũka gũceera. Aarĩ Mũira wa Jehova mũbatithie, na nĩ aaingĩrĩte ũtungata-inĩ wa hĩndĩ-ciothe. Rĩrĩa aageririe kũnduta ũhoro wa Ngai, ngĩmwĩra ũũ ndakarĩte: “Nĩ njũĩ  Ngai ũrĩa ndĩratungatĩra!” Thutha wa kũmũruma nyanĩrĩire, ngĩmũikania na ndiamũheire mweke ũngĩ wa kwaria na niĩ.

Thutha wa gũcoka cukuru ya Bibilia, Carmen akĩndũmĩra broshua Je! Uamini Utatu? * Ngĩmĩkũnjakũnja o hĩndĩ ĩyo na ngĩmĩikia mwaki-inĩ. No ndaarakarĩtio nĩwe.

Gũtuĩka Pasta

O ngĩthiĩ na mbere na mathomo makwa thĩinĩ wa cukuru ya Bibilia, nĩ ndaahotire kũgarũra andũ amwe maingĩre kanitha witũ. Makĩria nĩ ndaakenire mũno rĩrĩa maitũ na mũrũ wa maitũ maaingĩrire ndini ya Pentecostal.

Mweri wa Machi, 1994, ngĩrĩkia cukuru ya Bibilia ya Pentecostal. Ta ũrĩa hekũgwetetwo kĩambĩrĩria-inĩ, kwarĩ na mũhunjia waceerete hĩndĩ ĩyo. Ithuothe arĩa twarĩkagia cukuru twendaga gũkorũo hamwe nake tondũ twetĩkĩtie atĩ aarĩ na kĩheo gĩa kũhonania. Tũgĩthiĩ harĩ we hau mbere, tũkĩrũgarũgaga na tũkĩhũũraga hĩ hamwe nake tũkĩina rwĩmbo. O mũndũ o wothe aahutagia no ‘kũgwa agũaga thĩ nĩ ũndũ wa hinya wa roho.’ * Rĩrĩa aahutirie, o na niĩ ngĩgwa thĩ itekwĩigua. Hĩndĩ ĩrĩa ndeiguire, ndaarĩ na guoya, no ngĩigua atĩ ndaarĩ na hinya wa kũhonania na kwoguo ngĩkena.

Thutha wa kahinda kanini, ngĩhũthĩra hinya ũcio kũhonia kaana kaarĩ karũaru mũno. Hĩndĩ ĩrĩa ndaahoire, kaana kau o rĩo kaambĩrĩirie gũthithina na gakĩhona. Ngĩigua atĩ nĩ ingĩahotire kũhingia mwĩhĩtwa wakwa harĩ Ngai. O na kũrĩ ũguo, ndiaiguaga njiganĩire, ndaiguaga ta ndĩrabatara ũndũ ũngĩ makĩria. Nĩ ndetĩkĩtie biũ atĩ kũrĩ Ngai o ũmwe tu wa ma, no kũna ndiamũmenyaga wega. Na ndaarĩ na nganja nyingĩ ciĩgiĩ morutani maingĩ ma kanitha.

Maũndũ Marĩa Maagarũrire Mwĩcirĩrie Wakwa

Thutha wa maũndũ macio, rũmena rwakwa kwerekera Aira a Jehova rũkĩneneha makĩria. Hingo ciothe ingĩonire mabuku ma Aira a Jehova no gũcina ndacinaga. Thutha ũcio, gũgĩkĩka ũndũ iterĩgĩrĩire. Ndaamakire kuona atĩ maitũ ndeendaga ũhoro wa ndini ĩyo itũ rĩngĩ. Nĩ eerutaga Bibilia na Carmen! Ngĩrakara mũno nĩ ũndũ wa mwarĩ wa maitũ ũcio.

Ngĩcoka ngĩona ngathĩti ya Amkeni! nyũmba kwa Maitũ. O ta mũtugo no kũmĩcina ingĩamĩcinire. No tondũ nĩ ndendaga kũmenya ũhoro ũrĩa aathomaga, ngĩguũria ngathĩti ĩyo. Ngĩona gĩcunjĩ kĩaragĩrĩria ũhoro wa mũndũ warĩ na wĩtĩkio mũrũmu harĩ maũndũ marĩa kanitha warutanaga. O na kũrĩ ũguo, rĩrĩa aambĩrĩirie gũthoma mabuku ma Aira a Jehova hamwe na Bibilia, akĩmenya biũ atĩ Ũtatũ, mwaki wa icua, na muoyo ũtakuaga ti morutani ma Kĩĩmaandĩko. Ngoro yakwa ĩkĩhutio. Macio nĩmo maũndũ marĩa ndendaga mũno gũtaũkĩrũo wega. Kuuma hĩndĩ ĩyo, ndeeriragĩria rĩrĩa ingĩgaataũkĩrũo nĩ ma ya Bibilia.

Thutha wa gũthoma rũgano rũngĩ rwa mũtũũrĩre wa mũndũ thĩinĩ wa ngathĩti ya  Amkeni! rwĩgiĩ mũndũ warĩ mũnyui wa njohi na ndawa cia ũrĩĩu ũrĩa wacokire gwĩka ũgarũrũku nĩ ũndũ wa kwĩruta Bibilia, ngĩambĩrĩria gũthomaga mabuku ma Aira a Jehova mũno. Ngĩona broshua Jina la Mungu Litakaloendelea Milele. * Ndamĩthoma, ngĩĩruta atĩ rĩĩtwa rĩa Ngai nĩ Jehova. Nĩ ndaakenire mũno nĩ ũndũ wa kwĩruta ũũma wĩgiĩ Ngai o ũrĩa ũmwe wa ma!—Gũcokerithia Maathani 4:39; Jeremia 10:10.

Ngĩthiĩ na mbere gũthomaga na hitho na ngĩĩruta ma ingĩ nyingĩ cia Bibilia. Kwa ngerekano-rĩ, thĩinĩ wa cukuru ya Pentecostal ndaarutĩtwo atĩ Jesu nĩ Ngai, no rĩu nderutire kuuma Bibilia-inĩ atĩ nĩ “Mũrũ wa Ngai ũrĩa wĩ muoyo.”—Mathayo 16:15, 16.

Kũgarũrĩra Mawoni

Rĩrĩa ndonire Carmen rĩngĩ, nĩ aamakire mũno ndamwĩtia broshua Jina la Mungu Litakaloendelea Milele, o hamwe na mabuku mangĩ. Ndaikarire cukuru ĩyo ya Bibilia mĩaka mĩingĩ, no ndĩ kũu ndiarutirũo ma; nĩ gũtumumario ndatumumarĩtio. Nĩ ndaakenaga mũno ngoro-inĩ tondũ wa ma iria ndeerutaga kuuma Bibilia-inĩ. Ciugo ici cia Jesu nĩ ciahutirie mũno: “Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.” (Johana 8:32) Ma icio nĩ ciambĩrĩirie kũgarũra mũtũũrĩre wakwa.

Kwa ihinda, ndeciragia atĩ no thathayagie Jehova Ngai na hitho na thiĩ na mbere ndĩ pasta. Thutha wa kahinda kanini ngĩona atĩ ndingĩahotire kũrutana morutani maingĩ ma kanitha. O na kũrĩ ũguo, ndaarĩ na guoya. Ingĩarutire kũ mbeca cia mabataro makwa ingĩatigire gũtuĩka pasta? Na githĩ ndũngĩakorirũo ũrĩ ũndũ wa gĩconoko mũno harĩ kanitha pasta ũmwe wao angĩatuĩkire ũmwe wa Aira a Jehova? Kwoguo ngĩthiĩ na mbere kũrutana ndĩ pasta, no ngethemaga morutani marĩa ma maheeni ma ndini.

Rĩrĩa ndonire mwarĩ wa maitũ Carmen rĩngĩ, akĩnjĩra thiĩ mĩcemanio ya Aira a Jehova. Tondũ rĩmwe nĩ ndaathiaga kanitha-inĩ witũ ũrĩa mũnene thĩinĩ wa taũni ya Laoag, ngĩcaria na hitho Nyũmba ya Ũthamaki, kũrĩa Aira a Jehova macemanagia. Ngĩmenyithanio na Alma Preciosa Villarin, ũrĩa watuĩtwo “Precious,” na warĩ ndungata ya hĩndĩ-ciothe thĩinĩ wa kĩũngano kĩu. O na gũtuĩka no ndaathũire Aira a Jehova, ngĩtĩkĩra andutage Bibilia.

Mwarĩ wa maitũ aakoretwo na ũkirĩrĩria mũingĩ akĩnduta ma cia Bibilia. Na rĩu ngĩona roho o ũcio wa ũkirĩrĩria harĩ Precious. Akĩndeithĩrĩria mũno gũtaũkĩrũo nĩ Bibilia, o na gũtuĩka nĩ ndarakaraga, ngakararania nake, na rĩmwe ngaria na mũgambo mũnene ngĩnyitĩrĩra  maũndũ mamwe marĩa ndathomithĩtio hau kabere. Wendo, wĩnyihia, na ũhoreri ũrĩa ndonirio nĩ Precious o hamwe na Aira a Jehova arĩa angĩ nĩ wahutirie ngoro yakwa. Ũndũ ũcio ũgĩtũma nyende gũthathaiya Jehova.

Mweri wa Julaĩ 1995, ngĩmenya atĩ angĩkorũo nĩ ndendaga gũkenia Ngai, no mũhaka ingĩatigire wĩra wa pasta. Nĩkĩ? Kũguũrĩrio 18:4 yugaga ũũ ĩkĩaria na ngerekano ũhoro wa ndini ya maheeni: “Umai kuo, andũ akwa, muume thĩinĩ wake, nĩguo mũtikagĩe ngwatanĩro na mehia make, na mũtikae kũgwatanĩra nake matũhũhũ make.” Ingĩarutire kũ mbeca cia mabataro makwa? Ahibirania 13:5 yandutire atĩ ingĩekire wendi wa Ngai, eranĩire ũũ: “Ndirĩ hĩndĩ ngagũtigĩrĩra, kana ndigane nawe o na atĩa.”

O na gũtuĩka baba na mũrũ wa maitũ nĩ maangararagia mũno, ciumia igĩrĩ itanabatithio nduĩke Mũira wa Jehova, ngĩĩhe hinya, ngĩthiĩ mũciĩ na ngĩcina indo iria ciothe ndahũthagĩra ndĩ pasta. Ndeka ũguo, ngĩigua atĩ hinya o wothe wa mwanya ndaaheetwo nĩ wathira. Mbere-inĩ, ndakoma, ndaiguaga ta kũrĩ kĩndũ kĩandindĩkagĩrĩria na thĩ. Ũndũ ũcio o naguo ũgĩthira. Ciĩruru iria ndamenyerete kuonaga ndirica-inĩ ya nyũmba yakwa ndiacokire gũciona rĩngĩ. Wĩruti wakwa wa Bibilia nĩ wandutĩte atĩ kĩrĩa gĩothe andũ metaga iheo ũmũthĩ, ta hinya wa kũhonania, itiumaga kwĩ Ngai no ciumaga kwĩ ndaimono. Ningĩ nĩ ngenaga tondũ nĩ ndeyeheranirie na ũgucĩrĩria wacio, o ta ũrĩa mũirĩtu ũmwe eekire, ũrĩa warutirũo “roho wa kũragũra” nĩ Paulo na Baranaba.—Atũmwo 16:16-18.

Kĩarĩ gĩkeno kĩnene mũno tũkĩbatithio hamwe na Maitũ tũtuĩke Aira a Jehova mweri wa Septemba 1996! Thutha wa kũbatithio, ngĩtuĩka ndungata ya hĩndĩ-ciothe ya Aira a Jehova na ngĩtungata ũguo mĩaka mĩingĩ.

Rĩu ndĩ mũtumia wa Silver. Twĩ hamwe, tũrerutanĩria kũrera mũirĩtu witũ njĩra-inĩ ya ma ya Bibilia. Aarĩ a maitũ atatũ o nao nĩ manyitanĩire na ithuĩ harĩ gũtungatĩra Jehova. O na gũtuĩka nĩ ndĩriraga atĩ kwa ihinda rĩa mĩaka mĩingĩ ndiamenyaga Ngai, nĩ ngenaga mũno tondũ rĩu nĩ njũĩ Ngai ũrĩa thathayagia.

[Kohoro ka Magũrũ-inĩ]

[Mbica karatathi-inĩ ka 27]

Ngĩhũthĩra hinya ũcio kũhonia kaana kaarĩ karũaru mũno

[Mbica karatathi-inĩ ka 28]

Ma icio nĩ ciambĩrĩirie kũgarũra mũtũũrĩre wakwa

[Mbica karatathi-inĩ ka 29]

Nĩ ndaakenire mũno kwĩruta ũũma wĩgiĩ Ngai o ũrĩa ũmwe wa ma!

[Mbica karatathi-inĩ ka 27]

Rĩrĩa ndarĩkirie cukuru na ngĩtuĩka pasta

[Mbica karatathi-inĩ ka 28]

Precious nĩ aandutire Bibilia. Wendo, wĩnyihia, na ũhoreri wake ũkĩhutia ngoro yakwa

[Mbica karatathi-inĩ ka 29]

Rĩrĩa niĩ na maitũ twabatithirio

[Mbica karatathi-inĩ ka 29]

Ndĩ ndungata ya hĩndĩ-ciothe ya Aira a Jehova

[Mbica karatathi-inĩ ka 29]

Twĩ na mũthuri wakwa, mũirĩtu witũ, na andũ a famĩlĩ itũ arĩa maanyitanĩire na ithuĩ ũthathaiya-inĩ wa ma