Nĩ kĩĩ Gĩtũmaga Mũigua wa Mahoya Etĩkĩrie Mĩnyamaro?

ONA gũtuĩka andũ amwe no mahoe, makoragwo na nganja kana Ngai arĩ kuo. Makoragwo na nganja nĩkĩ? No gũkorũo nĩ tondũ nĩ monaga ũnyamarĩki mũingĩ thĩinĩ wa thĩ. Hihi ũrĩ weciria nĩ kĩĩ gĩtũmaga Ngai etĩkĩrie mĩnyamaro?

Hihi kũna Ngai ombire andũ ũrĩa mahaana ũmũthĩ—matarĩ akinyanĩru na marĩ rungu rwa mĩnyamaro? Tũtingĩhe gĩtĩo ngai ũrĩa ũngĩenda andũ manyamarĩke. No ta wĩcirie ũndũ ũyũ: Ũngĩkorũo ũgĩthiũrũrũka ngari njerũ ĩrĩa ũraigua ũkĩĩrirĩria ũcoke wone nĩ mondeku mwene-inĩ-rĩ, ũngĩtua atĩ mũmĩthondeki aamĩakire ũguo? Aca! Ũngĩtua atĩ mũmĩthondeki aamĩturire ĩrĩ njega biũ na atĩ nĩ mũndũ ũngĩ kana kĩndũ kĩngĩ kĩamĩmondire.

O ũndũ ũmwe na ũcio, rĩrĩa twakenera mĩtaratara na maũndũ ma magegania marĩa marĩ thĩinĩ wa thĩ na tũcoke tuone ngahĩha na maũũru marĩa mathũkĩtie andũ, tũtuaga atĩa? Bibilia ĩrutanaga atĩ Ngai ombire andũ a mbere marĩ akinyanĩru no thutha-inĩ magĩtũma o ene mathũkio. (Gũcokerithia Maathani 32:4, 5) Ũhoro ũrĩa mwega nĩ atĩ Ngai nĩ atwĩrĩire atĩ nĩ agaathondeka thĩna ũcio—gũcokeria andũ arĩa athĩki ũkinyanĩru. No etereire ihinda inene ũguo nĩkĩ?

Etereire Ihinda Inene Ũguo Nĩkĩ?

Gĩtũmi kĩhocetie harĩ kĩũria, nũũ wagĩrĩirũo gwatha andũ? Jehova ndaabangĩte andũ metongorie o ene. Aarĩ atuĩke Mũtongoria wao. Bibilia yo nyene yugaga ũũ: ‘Gũtirĩ mũndũ wa gũkũ thĩ ũngĩhota kũrũngĩrĩria makinya make njĩra-inĩ ĩrĩa yerekereire.’ (Jeremia 10:23) Ũndũ wa kĩeha nĩ atĩ, andũ a mbere maathurire kũremera wathani wa Ngai. Gĩĩko kĩao gĩa kuuna watho gĩgĩtũma matuĩke ehia. (1 Johana 3:4)  Moimĩrĩro maarĩ kũũrũo nĩ ũkinyanĩru, na makĩĩrehera mathĩna o ene na njiaro ciao.

Kwa ihinda rĩa mĩaka ngiri nyingĩ, Jehova nĩ etĩkĩrĩtie andũ meyathe, na maũndũ marĩa makoretwo kuo monanĩtie andũ matirĩ na ũhoti wa gwĩka ũguo. Maronania atĩ thirikari ciothe cia andũ nĩ itũmaga andũ manyamarĩke. Gũtirĩ thirikari o na ĩmwe ĩrĩ yeheria mbaara, wĩki-naĩ, wagi wa kĩhooto, kana mĩrimũ.

Ngai Akaarũnga Maũndũ Atĩa?

Bibilia ĩtwĩragĩra atĩ ica ikuhĩ Ngai nĩ ekũrehe thĩ njerũ ĩrĩ na ũthingu. (2 Petero 3:13) No arĩa tu megũthuura kũhũthĩra wĩyathi wao kuonania wendo harĩ andũ arĩa angĩ na harĩ Ngai magetĩkĩrio kũmĩtũũra.—Gũcokerithia Maathani 30:15, 16, 19, 20.

Ningĩ Bibilia nĩ yugaga atĩ “mũthenya ũrĩa wa cira” ũrĩa wĩhĩkĩte mũno, Ngai nĩ akeheria mĩnyamaro na arĩa mamĩrehaga. (2 Petero 3:7) Thutha ũcio, Mũtongoria ũrĩa ũthuurĩtwo nĩ Ngai, Jesu Kristo, nĩ agaatongoria andũ arĩa athĩki. (Danieli 7:13, 14) Wathani wa Jesu ũkaahingia maũndũ marĩkũ? Bibilia yugaga ũũ: “Andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”—Thaburi 37:11.

Arĩ Mũthamaki wa igũrũ, Jesu nĩ akeeheria mathĩna mothe—hamwe na mĩrimũ, ũkũrũ, na gĩkuũ—marĩa mookire rĩrĩa andũ maaregire gwathĩkĩra Jehova, “itherũkĩro rĩa muoyo.” (Thaburi 36:9) Jesu nĩ akaahonia arĩa othe metĩkagĩra wathani wake wĩ wendo. Rungu rwa wathani wake, ciĩranĩro ici cia Bibilia nĩ ikaahinga:

◼ “Mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru; nao andũ arĩa matũũraga kuo nĩmakoherũo ũũru wao.”—Isaia 33:24.

 ◼ “[Ngai] nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:4.

Na githĩ ti ũndũ wa kũũmĩrĩria kũmenya atĩ ica ikuhĩ Ngai nĩ ekũhingia kĩĩranĩro gĩake kĩa kũniina mĩnyamaro yothe? Ihinda-inĩ rĩrĩ, twagĩrĩirũo gũkorũo na ũũma atĩ nĩ aiguaga mahoya maitũ, o na gũtuĩka nĩ etĩkĩrĩtie tũnyamarĩke kwa ihinda.

Ngai arĩ kuo. No akũigue, nginya rĩrĩa ũramũrĩrĩra ũrĩ na ruo na kĩeha. Na nĩ arerirĩria gũkona ũgĩkenera gũtũũra ihinda rĩrĩa nganja na ruo rwaku ruothe rũgaathira.