Kuhĩrĩria Ngai

“Twagũthaitha Ũtwĩtĩkĩrie Tũcoke Mũciĩ”

Hihi kũrĩ hĩndĩ watungatagĩra Jehova? Waneciria kũmũtungatĩra rĩngĩ no ũkĩona ta ategũkwamũkĩra? Tũgũkũũria ũthome na kinyi gĩcunjĩ gĩkĩ na kĩrĩa kĩrĩrũmĩrĩra. Icunjĩ icio ihaarĩirio nĩ ũndũ waku.

 “NĨ NDAAHOIRE Jehova anjĩtĩkĩrie njoke mũciĩ na anjohere nĩ ũndũ wa kũmũtuuria.” Ũguo nĩguo mũtumia ũmwe waatiganĩte na njĩra ya Gĩkristiano ĩrĩa aarereirũo oigire. Hihi ũndũ ũcio nĩ wahutia ngoro yaku? No gũkorũo nĩ wĩyũragiaũũ: ‘Ngai aiguaga atĩa nĩ ũndũ wa arĩa maamũtungatagĩra tene? Hihi nĩ amaririkanaga? Nĩ endaga “macoke mũciĩ”?’ Nĩguo tuone macokio, rekei tũrore ciugo ciaandĩkirũo nĩ Jeremia. Hatarĩ nganja macokio macio nĩ megũcanjamũra ngoro yaku.—Thoma Jeremia 31:18-20.

Ta wĩcirie ũrĩa gwatariĩ Jeremia akĩandĩka ciugo icio. Mwaka-inĩ wa 740 Mbere ya Mahinda Maitũ (M.M.M.), mĩaka mĩingĩ mbere ya matukũ ma Jeremia, Jehova nĩ eetĩkĩririe ũthamaki wa mĩhĩrĩga ikũmi wa Isiraeli ũtwarũo ũkombo-inĩ nĩ Aashuri. a Ngai eetĩkĩririe mathĩna macio me ma kũrũithia andũ ake nĩ ũndũ nĩ meehagia na njĩra nene, na makaagĩra kĩene mĩkaana ĩrĩa maaheagwo nĩ anabii kaingĩ. (2 Athamaki 17:5-18) Hihi nĩ maatigire kũũmia ngoro maacemania na mathĩna bũrũri-inĩ wa ithamĩrio, rĩrĩa maamũranĩtio na Ngai wao na marĩ kũraya na kwao? Hihi Jehova nĩ aariganĩirũo nĩ o? Hihi nĩ angĩametĩkĩririe macoke mũciĩ?

‘Nĩ Ndacokire Ngĩĩrira’

Marĩ kũu ũkombo-inĩ, andũ acio nĩ mecokerire na makĩona bata wa kwĩrira. Jehova nĩ onire kwĩrira kwao gwa kuuma ngoro-inĩ. Ta thikĩrĩria Jehova agĩtaarĩria ũhoro wa mwerekera wa Aisiraeli acio maatahĩtwo, arĩa metĩtwo Efiraimu marĩ othe.

“Nĩnjiguĩte Efiraimu agĩĩcakaĩra we mwene,” nĩguo Jehova aroiga. (Mũhari wa 18) Nĩ aaiguire Aisiraeli magĩcakaĩra moimĩrĩro ma mehia mao. Mũthomi ũmwe oigĩte atĩ ciugo “agĩĩcakaĩra we mwene,” nĩ ta kuuga “kũinaina kana gũthingitha.” Maahaanaga ta mwana mũremi ũrainia mũtwe enyitĩte rũthĩa agĩtarania mathĩna marĩa ereheire na akerirĩria mũtũũrĩre ũrĩa aarĩ naguo e mũciĩ. (Luka 15:11-17) Andũ acio mooigaga atĩa?

“Nĩũ’herithĩtie . . . ta ndĩ gacaũ gatamenyerete gwĩkĩrũo mũtĩ wa ngingo.” (Mũhari wa 18) Andũ acio nĩ meetĩkĩrire atĩ nĩ maagĩrĩire kũrũngwo na njĩra ĩyo. Ĩĩ, tondũ maatariĩ o ta gacaũ gataamenyeretio. Ibuku rĩmwe riugaga atĩ ngerekano ĩyo yonanagia atĩ maatariĩ ta ndegwa “ĩtangĩaiguithĩtio ruo rwa rũthanju tiga yaregire icoki.”

“Ngarũra ũ’hũgũre, na niĩ njikare ‘hũgũkĩte o ro ũguo, nĩ ũndũ wee nĩwe Jehova, Ngai wakwa.” (Mũhari wa 18) Andũ acio maagĩa na wĩnyihia wa kuuma ngoro, magĩkaĩra Ngai. Maakoretwo marikĩte mehia-inĩ, no rĩu maamũthaithaga  amateithie kũmenya ũrĩa mangĩekire nĩguo ametĩkĩre rĩngĩ. Ũtaũri ũmwe ugaga ũũ: “Wee nowe Ngai witũ—twagũthaitha ũtwĩtĩkĩrie tũcoke mũciĩ.”—Contemporary English Version.

‘Ndacokire ngĩĩrira, ngĩconoka na ngĩtitikithio rũmena.’ (Mũhari wa 19, NW) Andũ acio nĩ maiguire ũũru mũno nĩ kwĩhia. Makĩona mahĩtia mao na makĩmetĩkĩra. Maaiguaga maconokete mũno na makahinyĩrĩrĩka.—Luka 15:18, 19, 21.

Aisiraeli nĩ meeririre. Maiyũrirũo nĩ kĩeha, makiumbũrĩra Ngai mehia mao, na makĩgarũrũka magĩtiga njĩra ciao njũru. Hihi kwĩrira kwao nĩ kũngĩahutirie ngoro ya Ngai? Hihi nĩ angĩametĩkĩririe macoke mũciĩ?

“Nĩ Ngaamũiguĩra Tha”

Jehova nĩ eendete Aisiraeli na njĩra ya mwanya. Oigire ũũ: ‘Nĩ niĩ Ithe wa Isiraeli, nake Efiraimu nĩwe irigithathi rĩakwa.’ (Jeremia 31:9) Ithe wa andũ wĩ wendo angĩaga atĩa kũiyũkia mũrũwe wonanĩtie kwĩrira biũ kuuma ngoro-inĩ? Rora wone ũrĩa Jehova onanagia wendo ta wa mũciari harĩ andũ ake.

“Anga Efiraimu towe mũrũ wakwa ũrĩa nyendete mũno? Anga towe mwana wa rũendo? Nĩ ũndũ-rĩ, o na harĩa njaragia kaingĩ ndeto cia kũmũũkĩrĩra-rĩ, no ngoragwo ngĩririkana ũrĩa ndĩmwendete.” (Mũhari wa 20) Githĩ icio ti ciugo irĩ na wendo mũingĩ! O ta mũciari ũgwatagĩria maũndũ no wĩ wendo, Ngai nĩ onire agĩrĩire kwaria “agĩũkĩrĩra” ciana ciake, agĩcikaania maita maingĩ njĩra cia wĩhia. Rĩrĩa ciaregire kũmũthikĩrĩria nĩ ũndũ wa rũng’athio, nĩ aacirekereirie itwarũo ithamĩrio—na njĩra ĩyo, ikiuma mũciĩ. Ĩndĩ, o na agĩcirũngaga, ndaariganĩirũo nĩcio. Ndarĩ hĩndĩ angĩekire ũguo. Ithe wa andũ wĩ wendo ndariganagĩrũo nĩ ciana ciake. O na kũrĩ ũguo-rĩ, Jehova aaiguire atĩa rĩrĩa onire ciana ciake nĩ cierira biũ?

“Ngoro yakwa nĩĩgũtangĩka mũno nĩ ũndũ wake, na ti-itherũ nĩ ngamũiguĩra tha.” (Mũhari wa 20) Jehova nĩ aaiguire anyoteire ciana ciake mũno. Kwĩrira kwao kwa ma nĩ kwahutirie ngoro yake mũno, na akĩĩrirĩria mamũcokerere. O ta ithe wa mwanake ũrĩa woorire mũciĩ ngerekano-inĩ ya Jesu, Jehova nĩ ‘aaringirũo nĩ tha’ na agĩtĩkĩria ciana ciake icoke mũciĩ acanjamũkĩte.—Luka 15:20.

“Jehova Njĩtĩkĩria Njoke Mũciĩ!”

Ciugo cia Jeremia 31:18-20 itũteithagia kũmenya ngumo njega cia Jehova cia ũcayanĩri na tha. Ngai ndariganagĩrũo nĩ arĩa maanamũtungatĩra. Ĩ mangĩenda kũmũcokerera rĩngĩ? Ngai akoragwo ‘ehaarĩirie kuohanĩra.’ (Thaburi 86:5) Ndarĩ hingo akaingata arĩa macokaga kũrĩ we merirĩte na ngoro yothe. (Thaburi 51:17) Ithenya rĩa ũguo, nĩ gũkena akenagĩra kũmaamũkĩra mũciĩ rĩngĩ.—Luka 15:22-24.

Mũtumia ũrĩa ũgwetetwo kĩambĩrĩria-inĩ nĩ oire ikinya rĩa gũcokerera Jehova, na agĩceera kĩũngano-inĩ kĩa Aira a Jehova. No mũhaka aangĩambire gũtooria meciria moru marĩa aakoragwo namo. Akĩririkana oigaga ũũ: “Ndaiguaga ndĩĩmenete mũno.” No athuri a kĩũngano nĩ maamũmĩrĩirie na makĩmũteithĩrĩria gũcokia hinya wa kĩĩroho. Aiyũirũo nĩ ngaatho cia kuuma ngoro-inĩ, oigire, “Nĩ ũndũ wa magegania mũno kuona atĩ Jehova nĩ aanjĩtĩkĩririe njoke mũciĩ!”

Angĩkorũo kũrĩ hĩndĩ watungatagĩra Jehova na nĩ wĩciragia kũmũcokerera rĩngĩ, tũgũkũũria ũceerere kĩũngano kĩa Aira a Jehova kĩrĩa kĩrĩ hakuhĩ na kwanyu. Ririkana atĩ Jehova nĩ aamũkagĩra arĩa merirĩte arĩ na ũcayanĩri na tha rĩrĩa mamũkaĩra ũũ: “Twagũthaitha ũtwĩtĩkĩrie tũcoke mũciĩ.”

[Kohoro ka magũrũ-inĩ]