Hihi nĩ Harĩ Ũrĩa Ũrehaga Maũndũ Mothe Moru?

MŨTONGORIA ũmwe wa mbirarũ cia Ũrũmwe wa Mabũrũri (UN) bũrũri-inĩ wa Rwanda akĩririkana ũrĩa maagire kũniina njũragano ya kweheria rũrĩrĩ bũrũri-inĩ ũcio mwaka-inĩ wa 1994 oigire ũũ: “Niĩ ndageithirie Mũcukani na guoko.” Mũndũ ũngĩ weyoneire njũragano ĩyo nene oigire ũũ: “Angĩkorũo kũrĩ mũndũ ugaga gũtirĩ Shaitani, ingĩenda tũcemanie nake kaburi-inĩ ka mũingĩ bũrũri-inĩ wa Rwanda.” Hihi maũndũ ta macio moru ũguo nĩ wĩra wa Mũcukani?

Andũ aingĩ matiĩtĩkĩtie atĩ ciĩko iria irĩ kuo cia ũhinya na cia wagi wa tha nĩ wĩra wa kĩũmbe kĩũru gĩa kĩĩroho gĩtonekaga. Aingĩ meciragia atĩ maũndũ ta macio nĩ moimĩrĩro ma ũũru ũrĩa wa kĩĩmerera na atĩ kĩhumo kĩa maũndũ moru nĩ ithuĩ. Angĩ nao meciragia atĩ nĩ kũrĩ gĩkundi kĩa andũ atongu marĩ na ũhoti, arĩa makoretwo makĩhĩngĩca andũ mĩaka mĩingĩ na njĩra ya wara nĩguo mathanage thĩinĩ wa thĩ. Ningĩ kũrĩ angĩ macokagĩrĩria thirikari na atongoria a bũrũri mahĩtia nĩ ũndũ wa wagi wothe wa kĩhooto na mĩnyamaro ĩrĩa ĩrĩ kuo.

Wee wĩtĩkĩtie atĩa? Nĩkĩ gĩtũmĩte maũndũ ma waganu, ũhinya, njũragano, na mĩnyamaro maingĩhe mũno thĩinĩ wa thĩ ũmũthĩ ona andũ makĩĩrutanagĩria kũmaniina? Hihi nĩ kĩĩ gĩtũmaga andũ mahũthĩrĩrie moimĩrĩro ma ciĩko ciao o makĩonaga merekeire kwĩniina o ene? Hihi nĩ harĩ ũrĩa ũtongoragia maũndũ macio? Hihi nũũ kũna wathaga thĩ ĩno? Macokio ma ciũria icio no makũgegie.