Nĩ kĩĩ Gĩtũmaga Ihiko Nyingĩ Iharagane?

“Afarisai amwe magĩũka kũrĩ [Jesu] makĩmũgeria, makĩmũũria atĩrĩ, Nĩkwagĩrĩire mũndũ ate mũtumia wake nĩ ũndũ wa gĩtũmi o na kĩrĩkũ?”—Mathayo 19:3.

ANDŨ amwe hingo ya Jesu maarĩ na nganja kana hihi ihiko no citũũre na kana nĩ ciagĩrĩirũo nĩ gũtũũra. Jesu aamerire ũũ: “Kaĩ mũtathomete atĩ, Ũrĩa wombire andũ gwata kĩambĩrĩria, aamombire marĩ mũndũ mũrũme na mũndũ mũka, na akiuga atĩrĩ, Nĩ ũndũ ũcio mũndũ mũrũme nĩagatigana na ithe na nyina, magwatane na mũtumia wake; nao erĩ matuĩke mwĩrĩ ũmwe? Tondũ wa ũguo matigacoka gũtuĩka erĩ, no mwĩrĩ ũmwe. Nĩ ũndũ ũcio-rĩ, arĩa Ngai agwatanĩtie mũndũ ndakanamatigithanie.” * (Mathayo 19:4-6) Hatarĩ nganja, Ngai aatanyĩte kĩhiko gĩkorũo kĩrĩ gĩa gũtũũra.

Thĩinĩ wa mabũrũri maingĩ ũmũthĩ, gĩcunjĩ kĩa mĩrongo ĩna harĩ igana o na kana makĩria kĩa ihiko ciothe irigagĩrĩria harĩ ‘ndigano.’ Hihi ũtaaro wa Bibilia ũkoniĩ kĩhiko nĩ mũhĩtũke nĩ mahinda? Hihi ihiko iharaganaga tondũ mũbango ũcio guo mwene ti mwega?

Wĩcirie ũhoro wa ngerekano ĩno: Mũthuri ũmwe na mũtumia wake makagũra ngari, nake mũthuri ũngĩ na mũtumia wake makagũra ngari ya mũthemba o ũcio. Amwe makamenyerera ngari yao na makamĩtwarithagia na ũbarĩrĩru. Ngari yao ĩgatũũra ĩrĩ njega. Acio angĩ makaga kũmenyerera ngari yao na makamĩtwarithagia ũrĩa gũtagĩrĩire. Ngari ĩyo ĩgathũka na makamĩtiganĩria. Hihi thĩna wa ngari ĩyo nĩ kĩĩ—nĩyo-ĩ, kana nĩ ene yo? Hatarĩ nganja, gĩtũmi kĩnene kĩa ngari ĩyo gũthũka nĩ ene yo.

Ũndũ ũmwe na ũcio, kũharagana kwa ihiko nyingĩ ti kuuga atĩ mũbango ũcio wa kĩhiko ũkoragwo na mahĩtia. Ihiko milioni nyingĩ iria igaacĩrĩte nĩ cionanagia atĩ mũbango ũcio ndwarĩ na mahĩtia. Ihiko icio irehaga gĩkeno harĩ mũndũ ũmwe ũmwe, harĩ famĩlĩ, na harĩ andũ othe. No kĩhiko, kĩbataraga gũikara gĩkĩmenyagĩrĩrũo o ta ngari angĩkorũo nĩ gĩgũtũũra.

O na angĩkorũo ũraingĩrire kĩhiko-inĩ ica ikuhĩ kana mĩaka mĩingĩ mĩhĩtũku-rĩ, ũtaaro wa Bibilia wĩgiĩ ũrĩa ũngĩtũũria na wĩkĩre kĩhiko gĩaku hinya no ũgũteithie. Rora ngerekano imwe thĩinĩ wa tũratathi tũrĩa tũkũrũmĩrĩra.

[Kohoro ka magũrũ-inĩ]