Nĩ ũthomete icunjĩ cia ica ikuhĩ cia Mũrangĩri? Rora kana no ũhote gũcokia ciũria ici:

Ithirĩro rĩoka-rĩ, nĩ maũndũ marĩkũ mamwe makaaninwo?

Maũndũ mamwe marĩa makaaninwo nĩ ta thirikari cia thĩ, mbaara, wagi wa kĩhooto, ndini iria itekaga wendi wa Ngai na itagunaga andũ, o hamwe na andũ arĩa manyitaga mbaru maũndũ marĩa marĩ thĩinĩ wa thĩ.—5/1, kar. 3-5.

Gogu wa Magogu ũrĩa ũgwetetwo ibuku-inĩ rĩa Ezekieli nũ?

Gogu wa Magogu ti Shaitani, ĩndĩ nĩ ngwatanĩro ya mabũrũri maingĩ ĩrĩa ĩkaageria kũniina andũ a Ngai thĩna ũrĩa mũnene wambĩrĩria.—5/15, kar. 29-30.

Nĩ maũndũ marĩkũ matandatũ mangĩgũteithia kũgĩa na gĩkeno ũkũrũ-inĩ?

Bibilia ĩtũtaaraga atĩ (1) tũmenye mĩhaka, (2) tũkoragwo na ũigananĩru, (3) tũkoragwo na mawoni marĩa magĩrĩire, (4) tũtuĩke ataana, (5) tũkoragwo na ũrata, na (6) tũcokagie ngatho. Gwĩcũranagia igũrũ rĩgiĩ maũndũ macio no gũteithie mũndũ kũgĩa na gĩkeno ũkũrũ-inĩ.—6/1, kar. 8-10.

Ciama iria Jesu aaringire cionanagia atĩa atĩ aarĩ mũtaana?

Ũhiki-inĩ wa Kana ya Galili, Jesu nĩ aaringire kĩama akĩgarũra maĩ rita 380 magĩtuĩka ndibei. Hĩndĩ ĩngĩ narĩo nĩ aaringire kĩama akĩhũnia andũ makĩria ma 5,000. (Mat. 14:14-21; Joh. 2:6-11) Mahinda-inĩ macio merĩ, eegerekanagia na Jehova harĩ kuonania ũtaana.—6/15, kar. 4-5.

Tũngĩkorũo na ma atĩa atĩ no tũhote gũkenia Ngai o na tũtarĩ akinyanĩru?

Athuri ta Ayubu, Loti, na Daudi nĩ maahĩtagia. O na kũrĩ ũguo nĩ meendaga gũtungatĩra Ngai, na nĩ meeririre mehia mao, na makĩgarũrĩra mĩthiĩre yao. Nĩ meetĩkĩrĩkire nĩ Ngai, na o na ithuĩ no twĩtĩkĩrĩke nĩwe.—7/1, kar. 12-13.

Hihi arũmĩrĩri a ndini cia maheeni nĩ makooragũo othe Babuloni Ũrĩa Mũnene akĩniinwo?

Aca. Zekaria 13:4-6 yonanagia atĩ no kũhoteke o na atongoria amwe a ndini nĩ magaatigana na ndini ciao na makaane atĩ nĩ kũrĩ hĩndĩ maarĩ thĩinĩ wa ndini icio cia maheeni.—7/15, kar. 15-16.

Nĩ kĩĩ gĩatũmire Baraka oige atĩ egũthiĩ mbaara-inĩ angĩkorũo tu Debora nĩ egũthiĩ hamwe nake?

Baraka aarĩ na wĩtĩkio. Handũ ha kũhoya Ngai amũhe indo nyingĩ cia mbaara, onire arĩ ũndũ wa bata makorũo hamwe na Debora nĩguo amwĩkĩre ngoro hamwe na andũ ake. (Atiir. 4:6-8; 5:7)—8/1, kar. 13.

Nĩ maũndũ marĩkũ mamwe Mũkristiano angĩĩcũrania ũhoro wamo?

Maũndũ mamwe tũngĩĩcũrania ũhoro wamo nĩ ũũmbi wa Jehova, bata wa Kiugo gĩake, kĩheo kĩa mahoya, na igongona rĩa ũkũũri.—8/15, kar. 10-13.

Gwĩthema thiritũ njũru kũngĩtũteithia atĩa kwaga gũtuma ndũgũ na mũndũ ũtarĩ Mũira wa Jehova?

Twendaga gwĩkĩra andũ othe maũndũ mega o na arĩa matarĩ Aira a Jehova. O na kũrĩ ũguo, kũgĩa ndũgũ na mũndũ ũtarĩ mũira wa Jehova tũrĩ na muoroto wa kũhikania nake nĩ mũgarũ na wendi wa Jehova. (1 Kor. 15:33)—8/15, kar. 25.

Nĩ kĩĩ gĩatũmire Petero aage wĩtĩkio na aacokire akĩonania wĩtĩkio atĩa?

Petero aarĩ na wĩtĩkio rĩrĩa aageragĩra igũrũ rĩa maĩ erekeire harĩ Jesu. (Mat. 14:24-32) No rĩrĩa aarorire kĩhuhũkanio, agĩĩtigĩra. Agĩcoka akĩrora Jesu na agĩĩtĩkĩra ũteithio wake.—9/15, kar. 16-17.

Atũmwo 28:4 yonanagia atĩ andũ a Melita meeciririe atĩ mũtũmwo Paulo aarĩ mũũragani. Meeciririe ũguo nĩkĩ?

Hĩndĩ ĩrĩa Paulo aarũmirũo nĩ nyoka, meeciririe atĩ ngai ya maheeni yetagwo Dike nĩyo yamũherithagia.—10/1, kar. 9.

Tũngĩĩruta atĩa kuumana na ũrĩa Maritha aahĩngĩcĩkire nĩ mĩhang’o mĩingĩ?

Kũrĩ hĩndĩ Maritha aahĩngĩcĩkire nĩ ũndũ wa kũhaarĩria iruga inene. Jesu ooigire Mariamu nĩ aathuurĩte rwĩga rũrĩa rwega nĩ ũndũ wa gũthikĩrĩria ũrutani wake. Twagĩrĩirũo kwĩmenyerera nĩ getha maũndũ matarĩ ma bata mũno matikaingĩrĩre mĩbango itũ ya kĩĩroho.—10/15, kar. 18-20.