1. Tũrabatara kũiga ũrata witũ na Jehova ũrĩ mũrũmu biũ nĩkĩ?

ANGĨKORŨO ũrĩ Mũira wa Jehova, ũrĩ na kĩndũ kĩa goro mũno—ũrata wa hakuhĩ na Ngai. Ĩndĩ, ũrata ũcio ũrĩ ũgwati-inĩ wa gũthũkio nĩ maũndũ marĩa marĩ thĩinĩ wa thĩ ya Shaitani o hamwe na mĩerekera itũ ya kwaga gũkinyanĩra. Nĩ ũndũ ũcio, no mũhaka ithuothe twĩrutanĩrie kũiga ũrata witũ na Jehova ũrĩ mũrũmu biũ.

2. Tũngĩka atĩa nĩguo twĩkĩre ũrata witũ na Jehova hinya?

² Ũrata waku na Jehova ũtariĩ atĩa? Hihi no wende kũwĩkĩra hinya? Rĩandĩko rĩa Jakubu 4:8 nĩ rĩtwĩraga ũrĩa tũngĩka ũguo. Riugaga ũũ: ‘Kuhĩrĩriai Ngai, nake nĩekũmũkuhĩrĩria inyuĩ.’ Ũngĩrora rĩandĩko rĩu nĩ ũkuona atĩ inyuĩ erĩ na Jehova gũtirĩ ũtarĩ na itemi rĩake. O ũrĩa tũrakuhĩrĩria Ngai, nake noguo atũkuhagĩrĩria. Twathiĩ na mbere gwĩka ũguo, ũrata witũ na Jehova ũthiaga ũkĩrũmaga ũũ atĩ no tũhote kuuga ta ũrĩa Jesu oigire: ‘Ũrĩa wandekirie nĩ wa ma na nĩndĩmũũĩ.’ (Joh. 7:28, 29) O na kũrĩ ũguo-rĩ, nĩ makinya marĩkũ ũngĩoya nĩguo ũkuhĩrĩrie Jehova makĩria?

3. Twaranagĩria na Jehova atĩa?

 ³ Nĩguo ũkuhĩrĩrie Jehova, nĩ ũkũbatara kwaranagĩria nake kaingĩ. Ũngĩaranĩria na Ngai na njĩra irĩkũ? Ta wĩcirie ũrĩa waranagĩria na mũrata waku ũikaraga kũndũ kũraya. No kũhoteke nĩ mwandĩkanagĩra marũa na mũkaaria na thimũ maita maingĩ. Waragĩria Jehova na njĩra ya kũmũhoya maita maingĩ. (Thoma Thaburi 142:2.) Nake Jehova akwaragĩria rĩrĩa ũrathoma Kiugo gĩake na ũgecũũrania ũhoro wakĩo ũtegũtĩrĩria. (Thoma Isaia 30:20, 21.) Rekei rĩu twarĩrĩrie ũrĩa kũmũhoya na kũmũthikĩrĩria agĩtwarĩria kũgerera Kiugo gĩake gwĩkagĩra ũrata witũ nake hinya.

4, 5. Jehova akwaragĩria atĩa kũgerera Kiugo gĩake? Heana ngerekano.

⁴ Hatarĩ nganja, nĩ wĩtĩkĩtie atĩ Bibilia ĩkoragwo na ndũmĩrĩri ya Ngai kũrĩ andũ othe. No hihi-rĩ, Bibilia nĩ yonanĩtie ũrĩa wee ũrĩ mũndũ kĩũmbe ũngĩkuhĩrĩria Jehova makĩria? Ĩĩ nĩ yonanĩtie. Rĩrĩa ũreruta Bibilia o mũthenya, rora ũrĩa ũraiyũkia maũndũ marĩa ũrathoma thĩinĩ wayo, na wĩcirie ũrĩa ũngĩmahũthĩra ũtũũro-inĩ waku. Weka ũguo, nĩ ũrareka Jehova akwarĩrie kũgerera Kiugo gĩake. Ũndũ ũcio nĩ ũrĩtũmaga ũkorũo na ũrata wa hakuhĩ mũno nake.—Ahib. 4:12; Jak. 1:23-25.

⁵ Kwa ngerekano-rĩ, ũiguaga atĩa wathoma na wecũrania ciugo ici cia Jesu: “Tigagai kwĩigĩra ũtonga gũkũ thĩ”? Angĩkorũo nĩ wĩkaga o ũrĩa wothe ũngĩhota kũiga maũndũ ma kĩĩroho mbere ũtũũro-inĩ waku, ũkũigua ta Jehova arĩ gũkũgaathĩrĩria arakũgaathĩrĩria tondũ nĩ wĩkĩte ũrĩa kwagĩrĩire. No ũngĩthoma ciugo icio na wone atĩ nĩ ũrabatara kũhũthahũthia mũtũũrĩre waku nĩguo ũhote gũthingata makĩria maũndũ ma Ũthamaki, Jehova arakwĩra harĩa ũrabatara kũrutĩra wĩra nĩguo ũmũkuhĩrĩrie makĩria.—Mat. 6:19, 20.

6, 7. (a) Kwĩruta Bibilia kũhutagia atĩa wendo witũ harĩ Jehova na wendo wake harĩ ithuĩ? (b) Muoroto witũ wagĩrĩirũo gũkorũo ũrĩ ũrĩkũ rĩrĩa tũreruta Bibilia?

⁶ Makĩria ma gũtũteithia kuona kũrĩa tũngĩagagĩria maũndũ maitũ ma kĩĩroho, kwĩruta Bibilia nĩ gũtũteithagia kũmenya ngumo cia Jehova na ũndũ ũcio ũgatũma tũmwende mũno. Na rĩrĩa wendo witũ harĩ we wongerereka, wendo wake gũtwerekera noguo wongererekaga, na nĩ ũndũ  ũcio ũrata witũ nake ũkarũma biũ.—Thoma 1 Akorintho 8:3.

⁷ O na kũrĩ ũguo, nĩguo tũkuhĩrĩrie Jehova, no mũhaka tũkorũo na muoroto ũrĩa wagĩrĩire hĩndĩ ĩrĩa tũreruta Kiugo gĩake. Rĩandĩko rĩa Johana 17:3 riugaga ũũ: ‘Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.’ Kwoguo muoroto witũ ndwagĩrĩirũo gũkorũo ũrĩ kũgĩa tu na ũmenyo, no wagĩrĩirũo gũkorũo ũrĩ ‘kũmenya’ wega ngumo cia Jehova.—Thoma Thama 33:13; Thab. 25:4.

8. (a) Nĩ ũndũ ũrĩkũ ũngĩthumbũra mũndũ wĩgiĩ ũrĩa Jehova eekire Mũthamaki Azaria? (b) Kũmenya Jehova kũngĩtũteithia atĩa kwaga gũkorũo na nganja harĩ mwĩkĩre wake wa maũndũ?

⁸ Twamenya Jehova wega makĩria, tũtirĩthumbũkaga nĩ ũndũ wa kwaga gũtaũkĩrũo biũ nĩ maũndũ mamwe marĩa eekire magwetetwo thĩinĩ wa Bibilia. Kwa ngerekano-rĩ, ũgĩaga na mawoni marĩkũ wathoma ũrĩa Jehova eekire Mũthamaki Azaria wa Juda? (2 Ath. 15:1-5) Ũngĩrora nĩ ũkuona atĩ o na gũtuĩka ‘andũ no maarutaga magongona na magacinĩra ũbumba matĩri-inĩ ma kũndũ gũtũũgĩru,’ Azaria we mwene no ‘eekaga maũndũ marĩa moonagwo marĩ mega nĩ Jehova.’ O na kũrĩ ũguo, ‘Jehova nĩ aaherithirie mũthamaki ũcio, akĩrũara mangũ o nginya rĩrĩa aakuire.’ Nĩ kĩĩ gĩatũmire amwĩke ũguo? Ibuku rĩu rĩa Athamaki rĩtitwĩrĩte. Hihi ũndũ ũcio nĩ wagĩrĩirũo nĩ gũtũthumbũra kana ũtũme tuone ta Jehova aaherithirie Azaria hatarĩ na gĩtũmi kĩiganu? Tũtingĩka ũguo angĩkorũo nĩ tũmenyete wega biũ njĩra cia Jehova cia gwĩka maũndũ. Kũmenya njĩra cia Jehova nĩ hamwe na kũmenya atĩ hingo ciothe aherithanagia “na kĩhooto.” (Jer. 30:11) Kũmenya ũguo gũtũteithagia gũkorũo na ma atĩ o na angĩkorũo tũtiũĩ kĩrĩa gĩatũmire Jehova eke Azaria ũguo, itua rĩake rĩarĩ rĩa kĩhooto.

9. Nĩ maũndũ marĩkũ matũteithagia kũmenya kĩrĩa gĩatũmire Jehova ahũũre Azaria na mangũ?

⁹ O na kũrĩ ũguo, Bibilia nĩ ĩheanaga ũhoro makĩria wĩgiĩ Mũthamaki Azaria ũrĩa ningĩ wetagwo Mũthamaki Uzia. (2 Ath. 15:7, 32) Ibuku rĩa 2 Maũndũ ma Matukũ ma Tene 26:3-5, 16-21, rĩtwĩraga atĩ o na gũtuĩka kwa ihinda rĩna Uzia nĩ eekire maũndũ marĩa moonagwo marĩ mega nĩ Jehova, thutha-inĩ “nĩetũũgĩririe ngoro-inĩ, agĩĩka maũndũ moru.” Nĩ ũndũ wa kwĩhe mbere, nĩ aageririe kũruta wĩra ũrĩa waagĩrĩirũo kũrutwo tu nĩ athĩnjĩri-Ngai. Athĩnjĩri-Ngai mĩrongo ĩnana na ũmwe nĩ maageririe kũmũrũnga. Uzia aaiyũkirie atĩa ũtaaro wao? Onanirie atĩ nĩ aakũrĩtie mwĩtĩo tondũ nĩ ‘aarakarĩire’ athĩnjĩri-Ngai acio mũno. Nĩkĩo Jehova aamũhũrire na mangũ.

10. Nĩkĩ tũtirĩbataraga hingo ciothe Jehova atũtaarĩrie itũmi cia maũndũ mothe marĩa ekaga, na twagĩrĩirũo gwĩkaga atĩa nĩguo twĩhokage biũ njĩra ciake cia ũthingu?

¹⁰ Ĩ korũo Bibilia ndĩtaarĩirie makĩria ũhoro wa Azaria o ta ũrĩa ĩtataarĩirie makĩria ũhoro wĩgiĩ maũndũ mamwe? Hihi ũndũ ũcio nĩ ũngĩtũmaga wĩkĩrĩre nganja ũthingu wa Ngai? Kana hihi nĩ ũngĩiganagĩra atĩ ũhoro ũrĩa ũrĩ thĩinĩ wa Bibilia nĩ mũiganu wa gũtũteithia tuone biũ atĩ hingo ciothe Jehova arũmagĩrĩra kĩhooto na nĩwe gĩthimi kĩrĩa kĩagĩrĩire kĩa wega na ũru? (Gũcok. 32:4) O ũrĩa tũrĩthiaga tũkĩmenyaga ngumo cia Jehova wega makĩria, noguo tũrĩmwendaga makĩria na tũkamwĩhoka, na nĩ ũndũ ũcio tũtirĩbataraga atũtaarĩrie itũmi cia maũndũ mothe marĩa ekaga. Ririkana atĩ kwenda Jehova na kũmwĩhoka kũrĩkũraga kũringana na ũrĩa ũrekĩra kĩyo kwĩruta na  gwĩcũũrania Kiugo gĩake. (Thab. 77:12, 13) Ningĩ, kwĩruta Bibilia nĩ kũrĩkagĩra hinya ũrata waku na Jehova na gũgatũma ũmũkuhĩrĩrie mũno.

11-13. Ũmenyaga atĩa atĩ Jehova nĩ athikagĩrĩria mahoya? (Rora mbica kĩambĩrĩria-inĩ gĩa gĩcunjĩ gĩkĩ.)

¹¹ Mahoya nĩ matũteithagia gũkuhĩrĩria Jehova. Nĩ tũhotaga kũmũgooca, kũmũcokeria ngatho, na kũmũhoya atũtongorie. (Thab. 32:8) Ĩndĩ nĩguo ũrata waku na Jehova ũkorũo ũrĩ mũrũmu, no mũhaka ũkorũo na ma atĩ nĩ athikagĩrĩria mahoya.

¹² Andũ amwe metĩkĩtie atĩ mahoya makoragwo marĩ o ma kũhooreria meciria tu. Moigaga atĩ mahoya magũteithagia tu gwĩciria na njĩra njega ũhoro wa mathĩna maku, na gwĩcarĩria kĩhonia kĩa mo. Ma nĩ atĩ, mahoya no magũteithie na njĩra icio. O na kũrĩ ũguo, Jehova nĩ athikagĩrĩria mahoya maku. Ũngĩkorũo na ma atĩa?

¹³ Ta wĩcirie ũndũ ũyũ: Jesu atanoka gũkũ thĩ, nĩ eeyonagĩra Jehova agĩcokia mahoya ma ndungata ciake gũkũ thĩ. Hĩndĩ ya ũtungata wake gũkũ thĩ, Jesu nĩ aahũthĩrire mahoya marĩ njĩra yake ya kwaranĩria na Ithe. O na kũrĩ hĩndĩ aahũthĩrire ũtukũ mũgima akĩhoya. Hihi nĩ aangĩekire ũguo korũo nĩ eeciragia atĩ Jehova ndaramũthikĩrĩria? (Luk. 6:12; 22:40-46) Hihi nĩ angĩarutĩte arutwo ake kũhoya korũo eeciragia atĩ mahoya no kĩndũ gĩa kũhooreria meciria tu? Hatarĩ nganja, Jesu nĩ aamenyaga atĩ Jehova nĩ athikagĩrĩria mahoya. Kũrĩ hĩndĩ oigire ũũ: “Awa, nĩndakũgatha nĩ ũndũ nĩwanjigua. Niĩ no ngũũĩ atĩ nĩũnjiguaga.” O na ithuĩ no tũkorũo na ma atĩ Jehova nĩ “mũigua wa mahoya.”—Joh. 11:41, 42; Thab. 65:2.

14, 15. (a) Tũgunĩkaga atĩa twera Jehova cararũkũ maũndũ marĩa tũrenda atũhingĩrie? (b) Mahoya maateithirie mwarĩ wa Ithe witũ ũmwe atĩa gwĩkĩra ũrata wake na Jehova hinya?

¹⁴ Ti hingo ciothe Jehova angĩcokia mahoya maku na njĩra ya ĩmwe kwa ĩmwe. No ũngĩgweta cararũkũ maũndũ marĩa ũrenda akũhingĩrie, no ũhote kuona wega makĩria macokio ma mahoya  maku, na ũndũ ũcio ũtũme ũrata wanyu nake ũrũme makĩria. Makĩria ma ũguo, o ũrĩa ũraitũrũrĩra Jehova maũndũ marĩa magũthumbũraga, noguo arĩgũkuhagĩrĩria mũno.

¹⁵ Ta wĩcirie ũhoro wa mwarĩ wa Ithe witũ Kathy. * Nĩ aathiaga ũtungata-inĩ ategũtĩrĩria, ĩndĩ ndaakenagĩra wĩra wa kũhunjia. Oigire ũũ: “Ndiakenagio o na hanini nĩ wĩra wa kũhunjia. Rĩrĩa ndaaritaire, mũthuri ũmwe wa kĩũngano nĩ aanjĩkĩrire ngoro nduĩke painia o na nginya akĩnengera fomu nĩguo njiyũrie. Ngĩtua itua rĩa gũtuĩka painia, ĩndĩ ngĩambĩrĩria kũhoya Jehova o mũthenya andeithie nyende wĩra wa kũhunjia.” Hihi Jehova nĩ aacokirie mahoya make? Oigire ũũ: “Ũyũ nĩ mwaka wa gatatũ kuuma ndambĩrĩria ũpainia. Nĩ ũndũ wa kũhũthagĩra mahinda maingĩ ũtungata-inĩ na kwĩruta kuumana na aarĩ a Ithe witũ arĩa angĩ, ũhoti wakwa wa kũhunjia nĩ ũthiĩte ũkĩagĩraga. Rĩu nĩ nyendete mũno wĩra wa kũhunjia. Makĩria ma ũguo, nĩ ngĩĩte na ũrata wa hakuhĩ mũno na Jehova gũkĩra ũrĩa ndaarĩ naguo mbere.” Hatarĩ nganja, mahoya ma Kathy nĩ maamũteithirie gwĩkĩra ũrata wake na Jehova hinya.

16, 17. (a) Twagĩrĩirũo nĩ gwĩka atĩa nĩguo ũrata witũ na Jehova ũthiĩ na mbere kũgĩa na hinya? (b) Nĩ ũndũ ũrĩkũ ũkaarĩrĩrio gĩcunjĩ-inĩ kĩrĩa kĩrũmĩrĩire?

¹⁶ Gũkũria ũrata wa hakuhĩ na Jehova gũtirĩ mũthia. Gũkĩrĩ ũguo, rekei tũthiĩ na mbere kũmũthikĩrĩria na njĩra ya kwĩrutaga Kiugo gĩake o mũthenya, na kũmwarĩria na njĩra ya mahoya. Tweka ũguo, ũrata witũ na Jehova ũrĩthiaga ũkĩgĩaga na hinya, na nĩ arĩtũheaga hinya wa gũkirĩrĩria magerio.

¹⁷ O na kũrĩ ũguo, rĩmwe na rĩmwe no tũkorũo tũkĩhiũrania na mathĩna, o na tũgĩthiaga na mbere kũhoya. Hĩndĩ ta ĩyo wĩtĩkio witũ harĩ Jehova no wambĩrĩrie kũnyiha. Twahota kwambĩrĩria kũgĩa na nganja kana kũna Jehova nĩ aiguaga mahoya na kana kũna nĩ mũrata witũ. Ũngĩambĩrĩria kũgĩa na mawoni ta macio-rĩ, ũngĩka atĩa? Gĩcunjĩ kĩrĩa kĩrũmĩrĩire nĩ kĩarĩrĩirie ũndũ ũcio.