1. Nĩ kĩĩ kĩngĩtũma twambĩrĩrie kwaga wetereri?

MŨTABARĨRE ũyũ wa Shaitani waingĩrire matukũ ma kũrigĩrĩria mwaka wa 1914, rĩrĩa Ũthamaki wa Kĩĩmesia wahandirũo igũrũ. Kuumana na mbaara ĩrĩa yarũirwo igũrũ, Jesu nĩ aaharũrũkirie Mũcukani na ndaimono ciake gũkũ thĩ. (Thoma Kũguũrĩrio 12:7-9.) Shaitani nĩ oĩ atĩ “no ihinda inyinyi atigairie.” (Kũg. 12:12) O na kũrĩ ũguo, “ihinda” rĩu nĩ rĩthiĩte na mbere mĩaka mĩingĩ na andũ amwe no mone ta matukũ ma kũrigĩrĩria maroya kahinda karaihu mũno. O na gũtuĩka no twetereire Jehova arehe mũico-rĩ, hihi tũrĩ mũndũ ũmwe ũmwe nĩ twambĩrĩirie kwaga mwerekera wa wetereri?

2. Gĩcunjĩ gĩkĩ gĩkwarĩrĩria maũndũ marĩkũ?

² Kwaga wetereri nĩ ũgwati tondũ no gũtũme twĩke maũndũ tũtambĩte gwĩciria. Tũngĩtũũria atĩa mwerekera wa gweterera? Gĩcunjĩ gĩkĩ nĩ gĩgũtũteithia gwĩka ũguo na njĩra ya gũcokia ciũria ici. (1) Kĩonereria kĩa mũnabii Mika kĩngĩtũruta atĩa ũhoro wa wetereri? (2) Nĩ maũndũ marĩkũ mekuonania atĩ mũico wa ihinda ritũ rĩa gweterera ũrĩ hakuhĩ? (3) Tũngĩonania ngatho citũ atĩa nĩ ũndũ wa wetereri wa Jehova?

3. Maũndũ maatariĩ atĩa thĩinĩ wa Israeli hĩndĩ ya Mika?

³ Thoma Mika 7:2-6. Mika mũnabii wa Jehova nĩ eeyoneire maũndũ ma kĩĩroho ma Aisiraeli magĩthũka nginya magĩtororokia biũ hĩndĩ ya Mũthamaki mwaganu Ahazu. Mika aaringithanirie Aisiraeli acio mataarĩ ehokeku na “cong’e” na “rũirigo rwa mĩigua.” O ta ũrĩa cong’e kana rũirigo rwa mĩigua rũthecaga mũndũ o wothe ũrĩa ũngĩgerera harĩ ruo, Aisiraeli acio aaganu maathũkagia mũndũ o wothe ũngĩamakuhĩrĩirie. Waganu wao waingĩhire mũno nginya ũkĩharagania mĩciĩ. Nĩ ũndũ wa kũmenya atĩ gũtirĩ ũndũ angĩekire nĩguo athondeke maũndũ macio, Mika agĩitũrũrĩra Jehova ngoro yake. Agĩcoka agĩeterera arĩ na ũkirĩrĩria Jehova oe ikinya.  Mika aarĩ na ma atĩ Jehova nĩ angĩoire ikinya ihinda rĩake rĩrĩa rĩagĩrĩru rĩakinya.

4. Nĩ moritũ marĩkũ tũcemanagia namo?

⁴ O ta Mika, o na ithuĩ tũtũũranagia na andũ meyendete. Andũ aingĩ ‘matirĩ ngatho, ti atheru; na matikoragwo na wendani ũrĩa wa ndũire.’ (2 Tim. 3:2, 3) Nĩ tũiguaga ũũru rĩrĩa arĩa tũrutithanagia wĩra nao, arĩa tũthomaga nao, na andũ angĩ monania roho wa kwĩyenda. O na kũrĩ ũguo, ndungata imwe cia Jehova nĩ ikoragwo na moritũ manene makĩria. Jesu oigĩte atĩ arũmĩrĩri ake nĩ mangĩgookĩrĩrũo nĩ andũ a famĩlĩ. Akĩonania ũrĩa andũ makaamũkĩra ndũmĩrĩri yake, aahũthĩrire ciugo ta iria irĩ thĩinĩ wa Mika 7:6. Oigire ũũ: “Ndokire kũmenithania mũndũ na ithe, na mũirĩtu na nyina, o na mũtumia na nyaciarawe; o nacio thũ cia mũndũ igatuĩka o andũ a nyũmba yake kĩũmbe.” (Mat. 10:35, 36) Ti ũndũ mũhũthũ gũkirĩrĩria rĩrĩa mũndũ aranyũrũrio na agokĩrĩrũo nĩ andũ a famĩlĩ arĩa matarĩ Akristiano. Rĩrĩa twacemania na magerio ta macio tũtiagĩrĩirũo gũcoka na thutha. Ithenya rĩa ũguo, twagĩrĩirũo gũikara tũrĩ ehokeku na tweterere Jehova tũrĩ na ũkirĩrĩria athondeke maũndũ. Tũngĩthiĩ na mbere kũmũhoya, nĩ arĩtũheaga hinya na ũũgĩ ũrĩa tũrabatara nĩguo tũhote gũkirĩrĩria.

5, 6. Mika aarathimirũo nĩ Jehova atĩa, ĩndĩ nĩ maũndũ marĩkũ aateyoneire?

⁵ Jehova nĩ aarathimire Mika nĩ ũndũ wa wetereri wake. Mika nĩ eeyoneire mũico wa wathani mũũru wa Mũthamaki Ahazu. Ningĩ nĩ eeyoneire Hezekia mũrũ wa Ahazu agĩikarĩra gĩtĩ gĩa Ũthamaki na agĩcokia ũthathaiya mũtheru. Narĩo ituĩro rĩa Jehova kwerekera Samaria rĩrĩa rĩarathĩtwo nĩ Mika nĩ rĩahingire rĩrĩa Ashuri maatharĩkĩire ũthamaki wa rũgongo wa Isiraeli.—Mik. 1:6.

⁶ O na kũrĩ ũguo, Mika ndaigana kwĩyonera kũhinga kwa maũndũ mothe marĩa eerĩtwo nĩ Jehova arathe. Kwa ngerekano, aandĩkire ũũ: “Matukũ ma kũrigĩrĩria . . . kĩrĩma kĩrĩa nyũmba ya Jehova yakĩtwo nĩgĩgaikara kĩrũmĩtio kĩagararĩte tũcũmbĩrĩ twa irĩma iria ingĩ, na gĩtũũgĩrio gũkĩra ithũngũri iria ingĩ; nao andũ a ndũrĩrĩ nĩkuo makomokagĩra, nacio ndũrĩrĩ nyingĩ ithiĩ kuo, ikiugaga ũũ: Atĩrĩrĩ, nĩtwambate tũthiĩ kĩrĩma-inĩ kĩa Jehova.” (Mik. 4:1, 2) Mika aakuire ihinda iraya ũrathi ũcio ũtahingĩte. O na kũrĩ ũguo, nĩ aatuĩte itua rĩa gũikara arĩ mwĩhokeku harĩ Jehova o na angĩacemanirie na gĩkuũ, gũtekũmakania ũrĩa arĩa maamũrigicĩirie meekaga. Ũndũ-inĩ ũcio Mika aandĩkire ũũ: ‘Andũ a ndũrĩrĩ ciothe marĩrũmagĩrĩra kĩrĩra kĩa ngai ciao, no ithuĩ, tũrĩrũmagĩrĩra kĩrĩra kĩa Jehova Ngai witũ tene na tene.’ (Mik. 4:5) Mika aahotire gweterera arĩ na ũkirĩrĩria mahinda-inĩ macio maarĩ na moritũ maingĩ tondũ aarĩ na wĩtĩkio mũrũmu atĩ Jehova nĩ angĩahingirie ciĩranĩro ciake ciothe. Mũnabii ũcio mwĩtigĩri Ngai nĩ eehokete Jehova.

7, 8. (a) Nĩkĩ tũrĩ na gĩtũmi gĩa gũkorũo na wĩtĩkio? (b) Nĩ kĩĩ kĩngĩtũteithia kuona mahinda magĩthiĩ na ihenya?

⁷ Hihi ithuĩ nĩ tũkoragwo na wĩtĩkio ta ũcio harĩ Jehova? Tũrĩ na gĩtũmi kĩega gĩa gũkorũo na wĩtĩkio ta ũcio. Ithuĩ nĩ twĩyoneire kũhinga kwa ũrathi wa Mika. ‘Matukũ-inĩ maya ma kũrigĩrĩria,’ andũ milioni nyingĩ kuuma mabũrũri-inĩ na ndũrĩrĩ-inĩ ciothe nĩ mokĩte ‘kĩrĩma-inĩ kĩrĩa nyũmba ya Jehova yakĩtwo.’ O na gũtuĩka moimĩte mabũrũri-inĩ kaingĩ makoragwo na ũthũ, Akristiano acio nĩ maturĩte ‘hiũ ciao cia njora igatuĩka cia mĩraũ’ na matiĩtĩkagĩra “kwĩĩgithia mbaara rĩngĩ.” (Mik. 4:3) Na githĩ ti gĩtĩo kĩnene gũkorũo thĩinĩ wa andũ a Jehova me thayũ!

⁸ Ma nĩ atĩ, wendi witũ nĩ Jehova arehe mũico wa mũtabarĩre ũyũ mũũru na ihenya. O na kũrĩ ũguo, angĩkorũo nĩ tũgũthiĩ na mbere gweterera tũrĩ na ũkirĩrĩria, tũkũbatara kuona maũndũ ta ũrĩa Jehova amonaga. Nĩ aigĩte mũthenya ũrĩa akaahũthĩra Jesu Kristo, “mũndũ ũrĩa athurĩte,” nĩguo atuĩre andũ. (Atũm. 17:31) No  mbere ya hĩndĩ ĩyo, Ngai nĩ ahete andũ a mĩhĩrĩga yothe mweke wa “kũmenya ũhoro-wa-ma,” na gũikara kũringana naguo nĩguo makaahonokio. Mĩoyo ya andũ ĩrĩ ũgwati-inĩ. (Thoma 1 Timotheo 2:3, 4.) Tũngĩkorũo na kĩyo harĩ gũteithia andũ mamenye ũhoro wa ma wĩgiĩ Ngai, tũkuona mahinda marĩa matigaire nĩguo Jehova arehe ituĩro magĩthiĩ na ihenya mũno. Ica ikuhĩ, mũico nĩ ũgũũka. Woka nĩ tũgaakena mũno tondũ nĩ twathiire na mbere gũkorũo na kĩyo wĩra-inĩ wa kũhunjia.

9-11. Hihi ũrathi wa 1 Athesalonike 5:3 nĩ mũhingu? Taarĩria.

⁹ Thoma 1 Athesalonike 5:1-3. Ica ikuhĩ mabũrũri nĩ mekwanĩrĩra atĩ, ‘kũrĩ na thayũ, na gũtirĩ mburuga!’ Angĩkorũo tũtikwenda kĩmenyithia kĩu gĩtũkorerere hinahi, tũkũbatara ‘gũikaraga twĩiguĩte na tũterigĩtwo.’ (1 Thes. 5:6) Nĩguo tũikarage twĩiguĩte, rekei twarĩrĩrie na njĩra nguhĩ maũndũ marĩa makamba kuoneka mbere ya kĩmenyithia kĩu.

¹⁰ Thutha wa mbaara iria nene igĩrĩ cia thĩ, mabũrũri nĩ meeriragĩria mũno kũgĩa na thayũ. Thutha wa mbaara ya mbere ya thĩ, mabũrũri nĩ maathondekire kĩama kĩa Ngwatanĩro ya Mabũrũri, marĩ na muoroto wa kũrehe thayũ. Narĩo thutha wa mbaara ya kerĩ ya thĩ, gũkĩgĩa na kĩama kĩa Ũrũmwe wa Mabũrũri, kĩrĩa kĩerĩgagĩrĩrũo kĩrehe thayũ thĩinĩ wa thĩ. Atongoria a ndini o hamwe na thirikari, makoretwo makĩĩhoka ciama icio irehere andũ thayũ na ũgitĩri. Kwa ngerekano, kĩama kĩa Ũrũmwe wa Mabũrũri nĩ kĩaanĩrĩire atĩ mwaka wa 1986 nĩ Mwaka wa Thayũ thĩinĩ wa Thĩ yothe. Mwaka-inĩ ũcio, atongoria kuuma mabũrũri-inĩ na ndini-inĩ nyingĩ nĩ maacemanirie na mũtongoria wa Kanitha wa Gatoreki, bũrũri-inĩ wa Italy nĩguo mahoere thayũ.

¹¹ O na kũrĩ ũguo, rĩanĩrĩra rĩu rĩa thayũ na ũgitĩri o na kana maanĩrĩra mangĩ matariĩ tarĩo, matiahingirie ũrathi ũrĩa ũrĩ thĩinĩ wa 1 Athesalonike 5:3 wĩgiĩ ‘thayũ na kwaga mburuga.’ Nĩkĩ? Tondũ ‘kũhobanĩrio na kwanangwo kwa narua’ kũrĩa kwarathĩtwo gũtirĩ kũrahanĩka.

12. Nĩ ũndũ ũrĩkũ tũĩ wĩgiĩ kwanĩrĩrũo atĩ kũrĩ ‘thayũ na gũtirĩ mburuga’?

 ¹² Hihi nũũ ũkaanĩrĩra atĩ kũrĩ na ‘thayũ na gũtirĩ na mburuga’? Atongoria a ndini iria ciĩĩtaga cia Gĩkristiano na a ndini iria ingĩ magaakorũo na itemi rĩrĩkũ? Ĩ nao atongoria a thirikari itiganĩte? Bibilia ndĩtwĩrĩte. Ũrĩa tũĩ nĩ atĩ, o njĩra ĩrĩa yothe ĩkahũthĩrũo kwanĩrĩra, o na kũngĩkooneka ta kũrĩ na ‘thayũ na gũtirĩ mburuga’ macio maagakorũo marĩ o maheeni. Mũtabarĩre ũyũ wa tene ũgaathiĩ na mbere gũkorũo rungu rwa ũtongoria wa Shaitani. Nĩ mũthũku biũ na ũgũthiĩ na mbere gũkorũo ũhaana ũguo. No ũkorũo ũrĩ ũndũ wa kĩeha mũno angĩkorũo harĩ Mũkristiano ũgetĩkia mũhuhu ũcio wa Shaitani na ambĩrĩrie kũnyita mbaru thirikari cia gũkũ thĩ!

13. Nĩ kĩĩ gĩtũmĩte araika magirĩrĩrie huho iria cia kũniinana?

¹³ Thoma Kũguũrĩrio 7:1-4. Ihinda rĩrĩ, rĩrĩa twetereire ũrathi wa 1 Athesalonike 5:3 ũhinge, araika marĩ hinya mũno nĩ magirĩrĩirie huho cia kũniinana cia thĩna ũrĩa mũnene. Maagĩte gũcirekereria nĩkĩ? Nĩ getha “ndungata cia Ngai witũ” iria njitĩrĩrie maguta ciĩkĩrũo rũũri rwa mũico ta ũrĩa mũtũmwo Johana agwetete. * Thutha wa ũndũ ũcio wa bata kũhingio, araika nĩ makarekereria huho icio cia kũniinana. Gũgaacoka gũthiĩ atĩa?

14. Nĩ kĩĩ kĩronania atĩ ithirĩro rĩa Babuloni ũrĩa Mũnene rĩrĩ hakuhĩ?

¹⁴ Babuloni ũrĩa Mũnene, nĩwe ndini ciothe cia maheeni thĩinĩ wa thĩ, nĩ ekũgwata mũcara wake wa kũniinwo. ‘Andũ a iruka ciothe, ndũrĩrĩ, na mĩario yothe’ matikahota kũmũteithia. Ihinda-inĩ rĩrĩ nĩ tũrona maũndũ maronania atĩ ithirĩro rĩake rĩrĩ hakuhĩ. (Kũg. 16:12; 17:15-18; 18:7, 8, 21) Kũringana na maũndũ marĩa tũreiguĩra kuuma nyũmba-inĩ cia mohoro, andũ nĩ maagĩte wĩtĩkio harĩ ndini icio tondũ nĩ maracimenereria na makamenereria atongoria a cio. O na kũrĩ ũguo, atongoria a Babuloni ũrĩa Mũnene marona maũndũ mao marĩ o mega. Kaĩ nĩ meheenetie-ĩ! Thutha wa kwanĩrĩrũo atĩ kũrĩ na ‘thayũ na gũtirĩ mburuga,’ o rĩmwe thirikari cia gũkũ thĩ nĩ igookĩrĩra ndini cia maheeni na icinine biũ. Babuloni ũrĩa Mũnene ndagacoka gũkorũo kuo rĩngĩ! Hatarĩ nganja, harĩ bata tweterere tũrĩ na ũkirĩrĩria kũhinga kwa maũndũ macio ma bata.—Kũg. 18:8, 10.

15. Nĩ kĩĩ gĩtũmĩte Jehova age kũrehe mũico na ihenya?

¹⁵ O na gũtuĩka andũ nĩ mahakĩte rĩĩtwa rĩa Jehova gĩko, etereire arĩ na ũkirĩrĩria nginya ihinda rĩrĩa rĩagĩrĩru rĩa kuoya ikinya rĩkinye. Jehova ndendaga mũndũ o na ũmwe ũrĩ na ngoro njega akaaninwo. (2 Pet. 3:9, 10) Hihi ũcio nĩguo muonere witũ? Mbere ya mũthenya wa Jehova ũkĩte, no tuonanie ngatho citũ nĩ ũndũ wa ũkirĩrĩria wake na njĩra ici tũkwarĩrĩria.

16, 17. (a) Nĩkĩ nĩ twagĩrĩirũo gũteithĩrĩria arĩa matigĩte gũtungatĩra Jehova? (b) Arĩa matigĩte gũtungatĩra Jehova magĩrĩirũo kũmũcokerera na ihenya nĩkĩ?

¹⁶ Teithagia arĩa matigĩte gũtungatĩra Jehova. Jesu oigire atĩ nĩ gũkoragwo na gĩkeno igũrũ, rĩrĩa ng’ondu ĩmwe yũrĩte yoneka. (Mat. 18:14; Luk. 15:3-7) Hatarĩ nganja, Jehova nĩ arũmbũyagia mũno arĩa othe monanĩtie kwenda rĩĩtwa rĩake o na angĩkorũo gwa kahinda gaka nĩ matigĩte kũmũtungatĩra. Nĩ ũndũ ũcio, rĩrĩa twateithia andũ ta acio mambĩrĩrie kũmũtungatĩra rĩngĩ nĩ tũtũmaga Jehova o hamwe na araika makene.

¹⁷ Hihi wee ũrĩ ũmwe wa acio matigĩte gũtungatĩra Jehova? No gũkorũo harĩ mũndũ wagũtuuririe thĩinĩ wa kĩũngano, na nĩ ũndũ ũcio ũgĩtiga gũthiaga mĩcemanio ya Gĩkristiano. Rĩu tondũ no kũhoteke  kuuma hĩndĩ ĩyo ihinda nĩ rĩhĩtũku-rĩ, wĩyũrie ũũ: ‘Hihi ũtũũro wakwa nĩ wagagĩrĩte, na gĩkeno gĩakwa gĩkongerereka? Hihi nĩ Jehova wahĩtĩirie kana nĩ mũndũ ũtarĩ mũkinyanĩru? Hihi Jehova arĩ anjĩka ũndũ mũũru?’ Hatarĩ nganja, hingo ciothe Jehova atwĩkaga maũndũ mega. O na rĩrĩa tũtaratũũra kũringana na wĩyamũrĩri witũ harĩ we, nĩ atwĩtĩkagĩria tũkenere indo iria njega aheanaga. (Jak. 1:16, 17) Kahinda gatarĩ coho mũthenya wa Jehova nĩ ũgũũka. Rĩrĩ nĩrĩo ihinda rĩa gũcokerera Ithe witũ wa igũrũ na kĩũngano gĩake, handũ harĩa tu harĩ na ũgitĩri wa ma matukũ-inĩ maya ma kũrigĩrĩria.—Gũcok. 33:27; Ahib. 10:24, 25.

18. Nĩkĩ nĩ twagĩrĩirũo kũnyita mbaru arĩa matongoragia thĩinĩ wa kĩũngano?

¹⁸ Nyitaga mbaru arĩa matongoragia thĩinĩ wa kĩũngano ũrĩ na wĩhokeku. Tondũ Jehova nĩ Mũrĩithi ũrĩ wendo, atũtongoragia na agatũgitĩra. Athuurĩte Mũrũ wake atuĩke Mũrĩithi ũrĩa Mũnene wa rũũru rwake. (1 Pet. 5:4) Athuri thĩinĩ wa ciũngano makĩria ma 100,000 nĩ marĩithagia ng’ondu cia Ngai irĩ mũndũ ũmwe ũmwe. (Atũm. 20:28) Rĩrĩa tũranyita mbaru arĩa matongoragia tũrĩ na wĩhokeku, nĩ tuonanagia ngatho citũ harĩ Jehova na Jesu nĩ ũndũ wa maũndũ marĩa matwĩkĩire.

19. Tũngĩkuhanĩrĩria atĩa?

¹⁹ Ikaragai mũkuhanĩrĩirie. Ũguo nĩ kuuga atĩa? Rĩrĩa thigari imenyeretio wega ciatharĩkĩrũo nĩ thũ, nĩ gũkuhanĩrĩria ikuhanagĩrĩria. Nĩ ũndũ ũcio, ũgakorũo ũrĩ ũndũ mũritũ gũtoorio nĩ thũ. Shaitani arathiĩ ongereire tharĩkĩro ciake kwerekera andũ a Ngai. Maya ti mahinda ma mũndũ kũrũa arĩ wiki. Ĩndĩ, nĩ mahinda ma gũkuhanĩrĩria mũndũ na ũrĩa ũngĩ, kwaga gũtindanĩra na mawathe ma Akristiano arĩa angĩ, na kwĩhoka ũtongoria wa Jehova biũ.

20. Twagĩrĩirũo gwĩka atĩa mahinda-inĩ maya?

²⁰ Rekei ithuothe tũthiĩ na mbere gũikara twĩiguĩte kĩĩroho na tũkorũo na mwerekera wa wetereri. Tũrĩ na ũkirĩrĩria, rekei tweterere kwanĩrĩrũo atĩ kũrĩ ‘thayũ na gũtirĩ mburuga’ na ningĩ tweterere aitĩrĩrie maguta mekĩrũo rũũri rwa mũico. Thutha ũcio, araika arĩa ana nĩ mekũrekereria huho iria cia kũniinana, na Babuloni ũrĩa Mũnene nĩ ekũniinwo. O tũgĩetagĩrĩra maũndũ macio manene mahaanĩke, rekei twĩtĩkĩre ũtongoria wa arĩa mamũrĩtwo matongoragie ithondeka-inĩ rĩa Jehova. Rekei tũkuhanĩrĩrie biũ nĩguo tũhotage gũtooria Mũcukani na ndaimono ciake! Maya nĩmo mahinda ma gwathĩkĩra ciugo ici cia mwandĩki wa Thaburi: “Gĩai na hinya, na mwĩũmĩrĩrie ngoro, inyuothe mwĩrĩgĩrĩire Jehova.”—Thab. 31:24.