KUUMA MŨTHITHŨ-INĨ WITŨ

Gũtwarana Hamwe na Agendi

 “NIĨ ndingĩhota kũhunjia nyũmba kwa nyũmba!” Hihi nĩ arutwo aigana a Bibilia manaigua ũguo meeciria ũhoro wĩgiĩ kũhunjĩria andũ matoĩ! O na kũrĩ ũguo, ciugo icio cioigirũo nĩ mũndũ waamenyerete kwaria mbere ya andũ na warĩ ũmwe wa arutani a Bibilia arĩa meetagwo agendi.

Athomi aingĩ a ngathĩti ya Zion’s Watch Tower arĩa maatiganĩirie kanitha ciao nĩ meeriragĩria mũno kũnyitanĩra na arĩa maanyotagĩra ma cia Bibilia tao. Ngathĩti ĩyo nĩ yekagĩra ngoro athomi ayo methe arĩa angĩ maarĩ na wĩtĩkio ta ũcio wa bata na magomanage kaingĩ nĩguo merute Bibilia. Kuuma mwaka wa 1894, Sosaitĩ ya Watch Tower nĩ yaambĩrĩirie gũtũma andũ magaceerere ikundi iria cioragia iceererũo. Athuri acio maarĩ kĩyo na ũmenyeru nĩo maacokire gwĩtagwo agendi, na maathuragwo nĩ ũndũ wa gũkorũo na wĩnyihia, ũmenyo wa Bibilia, ũhoti wa kwaria na kũrutana, na kuonania wĩhokeku harĩ igongona rĩa ũkũũri. Iceera rĩao rĩakoragwo rĩrĩ rĩa mũthenya ũmwe kana ĩĩrĩ ĩrĩ na maũndũ maingĩ. Arutwo aingĩ a Bibilia maahunjagia rita rĩa mbere rĩrĩa maraheana tũratathi twa gwĩta andũ hĩndĩ ya mĩario ya mũgendi mũna. Thutha wa mĩario yake ya hwaĩ-inĩ cukuru-inĩ ĩmwe, Hugo Riemer, ũrĩa waacokire gũtuĩka wa Kĩama kĩrĩa Gĩtongoragia, aacokirie ciũria cia Bibilia nginya akĩhĩtũkia thaa thita cia ũtukũ. Anogete no arĩ na gĩkeno, oigire atĩ mũcemanio ũcio warĩ “mwega mũno.”

Ngathĩti ya Watch Tower yoigaga atĩ “muoroto mũnene” wa iceera rĩa agendi warĩ gwaka “arĩa metĩkĩtie” kũgerera mĩcemanio ĩrĩa yekagĩrũo mĩciĩ-inĩ yao. Arutwo a Bibilia a matũũra marĩa marigicĩirie nĩ mookaga gũthikĩrĩria mĩario ĩyo na icunjĩ cia ciũria na macokio. Thutha ũcio gũkagĩa ihinda rĩa kuonania ũtaana wa Gĩkristiano. Rĩrĩa aarĩ kairĩtu, Maude Abbott nĩ aathire gũthikĩrĩria mĩario ya rũcinĩ, thutha ũcio andũ othe magĩikara thĩ hau nja marigicĩirie metha. “Kwarĩ na irio nyingĩ njega—nyama cia ngũrũwe, ngũkũ ngarange, mĩgate ya mĩthemba mĩingĩ, thambutha, na keki! O mũndũ aarĩire ũrĩa angĩahotire, na kĩndũ thaa inyanya tũgĩcokanĩrĩra nĩguo tũthikĩrĩrie mĩario ĩngĩ.” No oigire atĩ, “Gũkinyĩria hĩndĩ ĩyo andũ othe nĩ maacũngaga.” Mũgendi wa ihinda inene wetagwo Benjamin Barton hĩndĩ ĩmwe oigire atĩ, ‘Korũo nĩ ndaarĩire indo iria ciothe njega ndaaheagwo, ingĩatigĩte wĩra wa ũgendi tene.’ Thutha-inĩ irũa rĩmwe kuuma gĩikaro kĩnene kĩa Brooklyn rĩataarire aarĩ a Ithe witũ arĩa meerutagĩra atĩ nĩ wega kũhe agendi acio “irio o ta iria marugaga,” na mweke wa “gũkoma mategũthumbũrũo.”

Agendi acio nĩ maagacĩire harĩ kũrutana na kũhũthĩra mbica, tũindo twa gũthondekwo, kana kĩndũ kĩngĩ o gĩothe nĩguo andũ mataũkĩrũo wega. Mĩario ya R. H. Barber “hĩndĩ ciothe yaakoragwo ĩrĩ mĩega mũno.” Mũthuri ti W. J. Thorn aaragia “ta athuri arĩa ehokeku a tene.” Mũthenya ũmwe, akuuĩtwo nĩ ngari Mũthemba wa A Ford, Shield Toutjian aanĩrĩire o rĩmwe akiuga, “Rũgama!” Akĩrũga nja, agĩtua mahũa ma gĩthaka, na akĩruta arĩa maarĩ nao ũndũ mũna mateerĩgĩrĩire wĩgiĩ ũũmbi wa Jehova.

Mathĩna ma wĩra wa ũgendi nĩ maarehaga moritũ maingĩ, makĩria harĩ andũ arĩa maakinyĩtie kana makahĩtũkia mĩaka ya gatagatĩ. No harĩ amwe ao, igerio inene makĩria rĩarĩ rĩrĩa mũrutĩre wa wĩra wao  wagarũrũkire. Gũgĩtuĩka matongoragie wĩra-inĩ wa kũhunjia nyũmba kwa nyũmba. Ngathĩti ya Watch Tower ya Machi 15, 1924, yoigire atĩ “wĩra ũmwe mũnene” wa Akristiano a ma “nĩ kũruta ũira wĩgiĩ ũthamaki. Agendi matũmagwo nĩ ũndũ wa ũndũ ũcio.”

Agendi amwe matiakenirio nĩ ũgarũrũku ũcio, amu nĩ maatiganĩirie wĩra wa kũgenda, na amwe arĩa mataiganĩire makĩambĩrĩria ndini ciao. Robie D. Adkins aririkanaga atĩ mũgendi ũmwe warĩ mwaria mwega mũno oigire ũũ arĩ na marũrũ: “Niĩ ũndũ ũrĩa ingĩhota no kũhunjia ndĩ mbere ya andũ aingĩ. Ndingĩhota kũhunjia nyũmba kwa nyũmba!” Mũrũ wa Ithe witũ Adkins aririkanaga ũũ: “Ndaacokire kũmuona rĩngĩ Columbus, Ohio kĩrũrũngano-inĩ kĩa mwaka wa 1924. Nowe wonekaga arĩ na kĩeha kũu, arũgamĩte rungu rwa kamũtĩ arĩ wiki, athitĩte gĩthithi gatagatĩ-inĩ ka makiri ma aarĩ na ariũ a Ithe witũ akenu. Ndiigana kũmuona rĩngĩ. Kahinda kanini thutha ũcio agĩtiga ithondeka.” No “ariũ a Ithe witũ aingĩ maahĩtũkaga makenete makuuĩte mabuku marorete ngari-inĩ ciao,” marĩ na wendi mũnene mũno wa kũhunjia nyũmba kwa nyũmba.—Atũm. 20:20, 21.

O na gũtuĩka no kũhoteke agendi aingĩ nĩ maaiguaga guoya o ta andũ arĩa maatũmagwo makamenyerie, nĩ maahunjagia makenete. Mũgendi Mũnjĩrĩmani Maxwell G. Friend (Freschel) aandĩkire ũũ igũrũ rĩgiĩ kũhunjia nyũmba kwa nyũmba: “Gĩcunjĩ kĩu kĩa wĩra wa ũgendi nĩ kĩongagĩrĩra irathimo harĩ iceera.” Mũgendi ũgwĩtwo John A. Bohnet oigire atĩ ariũ a Ithe witũ hakuhĩ othe nĩ maiyũkirie kuuma ngoro-inĩ gwĩkĩrĩrũo kwa wĩra wa kũhunjia Ũthamaki. Kũringana nake, aingĩ “maahĩahĩaga nĩ kĩyo makĩenda gũkorũo mũhari-inĩ wa mbere mbaara-inĩ ĩyo.”

Ihinda rĩa mĩaka mĩingĩ, ariũ a Ithe witũ ehokeku arĩa magendaga nĩ makoretwo na ũgucania mwega. “Ũguni wa agendi acio warĩ mũingĩ, o ta ũrĩa ndeyoneire ndĩ kamwana,” ũguo nĩguo Norman Larson, Mũira ũmwe wa Jehova ũtungatĩte mĩaka mĩingĩ oigire. “Nĩ maandeithirie mũno gũikara ũrĩa kwagĩrĩire.” O na ũmũthĩ ũyũ, arori ehokeku na meimaga arĩa magendaga nĩ marateithia athathaiya arĩa angĩ kuuga, “No tũhote gũthiĩ kũhunjia nyũmba kwa nyũmba!”

[Mbica karatathi ka 32]

Wakoragwo ũrĩ mũthenya wa gĩkeno rĩrĩa mũgendi atũceerera!

[Mbica karatathi ka 31]

Mũbango wa Benjamin Barton wa 1905 warĩ na kũndũ 170 gwa gũceera

[Mbica karatathi ka 32]

Mũgendi Walter J. Thorn eetagwo nĩ andũ Baba nĩ ũndũ wa mwerekera wake wa Gĩkristiano ũtariĩ ta wa mũciari

[Mbica karatathi ka 32]

J. A. Browne aatũmirũo Jamaica e mũgendi kĩndũ mwaka wa 1902 akoomĩrĩrie na ekĩre hinya ikundi nyinyi 14

[Mbica karatathi ka 32]

Wĩra wa ũgendi nĩ waakaga wĩtĩkio, ũgekĩra hinya ũrũmwe wa Gĩkristiano, na ũgateithia ariũ a Ithe witũ mamenye ithondeka wega