KĨAMBĨRĨRIA-INĨ kĩa mĩaka ya 1930 wĩra wa kũhunjia thĩinĩ wa Brazil nĩ wathiaga kahora mũno. No 1935 Nathaniel na Maud Yuille arĩa maarĩ mapainia nĩ maandĩkĩire Joseph F. Rutherford, ũrĩa watongoragia wĩra-inĩ wa kũhunjia hĩndĩ ĩyo. Maandĩkire makiuga atĩ nĩ meerutĩire “gũthiĩ kũrĩa guothe mangĩatũmirũo.”

Nathaniel aarĩ na mĩaka 62 hĩndĩ ĩyo na nĩ aaritayĩte kuuma wĩra-inĩ. Aakoretwo agĩtungata arĩ mũrũgamĩrĩri wa ũtungata kĩũngano-inĩ kĩmwe thĩinĩ wa San Francisco, California, U.S.A. Gĩcigo-inĩ kĩu nĩ aabangĩte wĩra wa kũhunjia na akahũthĩra ikeero kũhunjia ũhoro ũrĩa mwega. Ũmenyeru wake na ngoro yake ya kwĩrutĩra nĩ ciamũteithirie mũno wĩra-inĩ wake mwerũ arĩ mũrũgamĩrĩri wa wabici ya rũhonge ya Brazil kũrĩa kwaragio thiomi nyingĩ.

Nathaniel na Maud maakinyire Brazil 1936 marĩ na painia ũngĩ wetagwo Antonio P. Andrade, ũrĩa wahũthĩkaga arĩ mũtabuti. Maakinyire kuo marĩ na indo cia bata mũno​​—inanda 35 na ngari ya kũmemerekia. Brazil nĩguo bũrũri wa gatano ũrĩa mũnene mũno thĩinĩ wa thĩ na hĩndĩ ĩyo kwarĩ o na ahunjia 60 tu! Ĩndĩ, indo icio cia kũmemerekia nĩ cingĩamateithirie mũno harĩ gũkinyĩria andũ milioni nyingĩ ũhoro ũrĩa mwega kwa ihinda rĩa mĩaka mĩnini tu.

Mweri ũmwe thutha wa mũrũ na mwarĩ wa Ithe witũ Yuille gũkinya Brazil, wabici ya rũhonge nĩ yabangire gũkorũo na kĩgomano kĩa mbere kĩrĩa gĩekĩirũo taũni-inĩ ya São Paulo. Nĩ maahũthĩrire ngari ĩyo ya kũmemerekia ĩrĩa yatwarithagio nĩ Maud kũmenyithia andũ ũhoro wa kĩgomano kĩu na gũgĩũka andũ 110. Kĩgomano kĩu nĩ gĩekĩrire ahunjia ngoro mũno nginya makĩongerera kĩyo ũtungata-inĩ. Nĩ meerutire kũhunjia makĩhũthĩra mabuku na kandi cia kũruta ũira o hamwe na kũhũrĩra andũ thani cia  kĩnanda iria ciarekondetwo na rũthiomi rwa Gĩthũngũ, Kĩĩnjĩrĩmani, Kĩĩhungaria, Kĩĩpolish, Kĩĩhispania, na thutha ũcio Kĩĩportuguese.

Igomano ithatũ iria ciekĩirũo São Paulo, Rio de Janeiro, na Curitiba 1937 nĩ ciateithirie mũno harĩ gũtwarithia na ihenya wĩra wa kũhunjia. Ngari ya kũmemerekia nĩ yateithagia ahunjia mũno kũhunjia nyũmba kwa nyũmba hĩndĩ ya kĩgomano. Mũrũ wa Ithe witũ José Maglovsky ũrĩa hĩndĩ ĩyo warĩ kamwana kanini, aacokire kwandĩka ũũ: “Twabangaga mabuku handũ, nayo ngari ĩkamemerekia ndũmĩrĩri ĩrĩa yakoragwo ĩrekondetwo, na ithuĩ tũkaria na andũ arĩa mooimaga mĩciĩ yao magoka kũrora kĩrĩa kĩrathiĩ na mbere.”

Andũ maabatithagĩrio njũĩ-inĩ, na gũkuhĩ na harĩa harabatithanĩrio nĩ gwakoragwo na andũ marota riũa thutha wa gwĩthamba. Wakoragwo ũrĩ mweke mwega mũno wa kũhunjia ũhoro ũrĩa mwega kũgerera ngari ĩyo. Mĩario ya ũbatithio ĩrĩa yarutagwo nĩ Mũrũ wa Ithe witũ Rutherford yaiguĩkaga wega mũno kuuma ikeero-inĩ iria ciakoragwo ngari-inĩ ĩyo. Andũ maarigicagĩria ngari magathikĩrĩria mĩario ĩyo, ĩrĩa yatabutagwo na rũthiomi rwa Kĩĩportuguese. Thutha ũcio andũ makabatithio. Makĩbatithio nyĩmbo cia Ũthamaki ciakoragwo ikĩhũrũo na rũthiomi rwa Kĩĩpolish nao aarĩ na ariũ a Ithe witũ makaina magĩtwaranaga na kĩnanda o mũndũ na rũthiomi rwake. Yearbook ya 1938 yoigĩte ũũ: “Ũndũ ũcio waririkanagia mũndũ ũrĩa hĩndĩ ya Pentekoste andũ maataũkagĩrũo nĩ maũndũ o mũndũ na rũthiomi rwake.”

Hingo ciothe mũthenya wa Kiumia thutha wa kĩgomano, kure kana kware no mũhaka ngari ĩyo ĩngĩamemerekirie mĩario ĩrĩa yakoragwo ĩrekondetwo. Yamemerekagia, ihaaro-inĩ cia kũhurũka, mĩciĩ-inĩ, na iganda-inĩ cia taũni ya São Paulo, na taũni ingĩ iria ciarĩ hakuhĩ. O mweri ngari ĩyo nĩ yathiaga kũhunjĩria andũ 3,000 arĩa maarĩ na mũrimũ wa mangũ arĩa maaikaraga kilomita 97 mwena wa rũgongo wa São Paulo. Thutha wa ihinda nĩ kwambĩrĩirio kĩũngano gĩcigo-inĩ kĩu. O na gũtuĩka nĩ maanyamarĩkaga mũno nĩ mũrimũ ũcio, ahunjia a kĩũngano kĩu nĩ maahoire rũtha mathiĩ gĩcigo-inĩ kĩngĩ makahunjĩrie gĩkundi kĩngĩ kĩa andũ marĩ na mangũ.

Hakuhĩ mũico-inĩ wa 1938 nĩ gwacokire gũgĩũka thani ciarekondetwo na rũthiomi rwa Kĩĩportuguese. Hĩndĩ ya All Souls’ Day ngari ya kũmemerekia yathire kuuma kaburi ĩmwe ya mũingĩ nginya ĩrĩa ĩngĩ kũmemerekeria andũ ũhoro warĩ na kĩongo “Akuũ Marĩ Kũ?,” “Jehova,” na “Ũtonga.” Ũhoro ũcio wakinyĩire andũ makĩria ma 40,000 arĩa mookĩte kũririkana mũthenya ũcio!

Atongoria a ndini nĩ maarakaragio mũno nĩ kũmemerekio kwa ndũmĩrĩri ĩyo ya ũhoro wa ma na kaingĩ nĩ maatindĩkagĩrĩria atongoria a thirikari matũgirie kũhũthĩra ngari ĩyo. Mwarĩ wa Ithe witũ Yuille nĩ aririkanaga mũthenya ũmwe ũrĩa mũtongoria ũmwe wa ndini acokanĩrĩirie gĩkundi kĩa andũ gĩkĩrigicĩria ngari ĩyo. No mayor wa taũni ĩyo hamwe na thigari magĩũka na magĩthikĩrĩria programu yothe. Macũngĩrĩro-inĩ mayor agĩtĩkĩra kuoya mamwe ma mabuku maitũ na agĩthiĩ. Gũtiagĩire na gĩcanjama mũthenya ũcio. O na kũrĩ na mathĩna macio mothe, Yearbook ya 1940 yoigĩte atĩ 1939 nĩguo warĩ mwaka ‘ũrĩa mwega mũno thĩinĩ wa Brazil harĩ andũ othe wa kũhunjia ũhoro wa Jehova na rĩĩtwa rĩake.’

Gũkinya kwa “ngari ya kũmemerekia ya Watch Tower” nĩ kwarehire ũgarũrũku mũnene mũno wĩra-inĩ wa kũhunjia thĩinĩ wa Brazil. Ngari ĩyo nĩ yateithirie mũno harĩ gũkinyĩria andũ milioni nyingĩ ndũmĩrĩri ya Ũthamaki. O na gũtuĩka ngari ĩyo nĩ yendirio 1941, Aira a Jehova ngiri nyingĩ no marathiĩ na mbere kũhunjĩria andũ arĩa marĩ na ngoro njega ũhoro ũrĩa mwega thĩinĩ bũrũri ũcio mũnene mũno wa Brazil.​—Kuuma mũthithũ-inĩ witũ Brazil.