Aca, gũtirĩ handũ thĩinĩ wa Bibilia kana mabuku-inĩ ma historĩ honanagia atĩ ũndũ ũcio nĩ wekagwo.

Ũrĩa Bibilia nyingĩ itaũrĩte mũhari ũcio nĩ gũtũmaga andũ amwe mecirie atĩ andũ nĩ maabatithagio na maĩ nĩ ũndũ wa andũ arĩa akuũ matukũ-inĩ ma Paulo. Kwa ngerekano, The Bible in Gikũyũ yugaga ũũ: “Akorũo acio akuũ matirĩ hingo makariũkio-rĩ, andũ makĩbatithagio ithenya rĩao nĩkĩ?”

No ta rora ũrĩa athomi erĩ a Bibilia moigĩte. Ũmwe wao wĩtagwo Dr. Gregory Lockwood ooigire atĩ hatirĩ handũ thĩinĩ wa Bibilia kana thĩinĩ wa historĩ honanagia atĩ nĩ kũrĩ andũ maabatithagio ithenya rĩa andũ akuũ. Nake profesa ũngĩ ũthomeire maũndũ ma Bibilia wĩtagwo Gordon D. Fee nĩ ooigire ũndũ o ta ũcio. Aandĩkire atĩ hatirĩ handũ thĩinĩ wa Bibilia kana thĩinĩ wa historĩ ũngĩona ũbatithio wa mũthemba ta ũcio. Ooigire atĩ hatirĩ handũ ũbatithio ta ũcio ũgwetetwo thĩinĩ wa Kĩrĩkanĩro Kĩrĩa Kĩerũ, na hatirĩ ũndũ wonanagia atĩ ũndũ ũcio nĩ wekagwo nĩ Akristiano a karine ya mbere kana nĩ kanitha iria ciaambĩrĩirio ihinda inini thutha wa atũmwo gũkua.

Bibilia yugaga atĩ arũmĩrĩri a Jesu maarĩ ‘matue andũ arutwo kuuma ndũrĩrĩ-inĩ ciothe, makĩmabatithagia, na makĩmarutaga kũrũmia maũndũ marĩa mothe’ aamathĩte. (Mat. 28:19, 20) Nĩguo mũrutwo abatithio, aabataraga kwamba kwĩruta ũhoro wĩgiĩ Jehova na Mũrũ wake, ametĩkie, na amathĩkĩre. Mũndũ wakuĩte na agathikwo mbĩrĩra-inĩ ndangĩahotire gwĩka maũndũ macio, na Mũkristiano ũrĩ muoyo ndangĩahotire gwĩka maũndũ macio handũ-inĩ hake.​—Koh. 9:5, 10; Joh. 4:1; 1 Kor. 1:14-16.

Kwoguo Paulo eendaga kuuga atĩa?

Akorintho amwe mooigaga atĩ andũ matikaariũkio. (1 Kor. 15:12) Paulo nĩ aarũngire mawoni macio mao. Na njĩra ĩrĩkũ? Aameerire atĩ ‘aang’ethagĩra gĩkuũ o mũthenya.’ Ũrĩa kũrĩ nĩ atĩ Paulo aarĩ o muoyo. Ĩndĩ o na agĩcemanagia na mogwati mangĩatũmire akue, aarĩ na ma biũ atĩ o na akua nĩ angĩariũkirio athiĩ agatũũre kũrĩa igũrũ o ta Jesu.​—1 Kor. 15:30-32, 42-44.

Akorintho nĩ maabataraga gũtaũkĩrũo atĩ gũkorũo marĩ Akristiano aitĩrĩrie maguta kuoonanagia atĩ nĩ mangĩacemanirie na moritũ maingĩ na makue nĩguo thutha-inĩ mariũkio. Kũbatithio “thĩinĩ wa Kristo Jesu” kuoonanagia atĩ nĩ maabatithirio “thĩinĩ wa gĩkuũ gĩake.” (Rom. 6:3) Ũguo nĩ kuonania atĩ o ta Jesu, nĩ mangĩacemanirie na moritũ na makue nĩguo mariũkio mathiĩ igũrũ.

Makĩria ma mĩaka ĩĩrĩ thutha wa Jesu kũbatithio na maĩ, eerire atũmwo ake erĩ ũũ: “Ũbatithio ũrĩa ndĩrabatithio naguo, nĩ mũkũbatithio naguo.” (Mar. 10:38, 39) Jesu ndeerĩgagĩrĩra kũbatithio na maĩ rĩngĩ. Eendaga kuuga atĩ nĩ angĩakuire nĩ ũndũ wa gũkorũo arĩ mwĩhokeku. Paulo ooigire atĩ arĩa aitĩrĩrie maguta nĩ ‘mangĩkanyamarĩka hamwe nake, nĩguo ningĩ magaatũũgĩrio hamwe nake.’ (Rom. 8:16, 17; 2 Kor. 4:17) Kwoguo o nao nĩ mangĩakuire nĩguo mariũkio mathiĩ igũrũ.

Nĩ ũndũ ũcio, ciugo iria ciagĩrĩire cia mũhari ũcio nĩ ici: “Angĩkorũo tiguo-rĩ, gũgaathiĩ atĩa harĩ arĩa mabatithagio nĩguo makue? Angĩkorũo arĩa akuũ matikaariũkio o na atĩa-rĩ, o nao makĩbatithagio nĩkĩ nĩguo mahaane ũguo?”