No Twĩrute Ũhoro Wĩgiĩ Ngai Kuuma Kũrĩ Anabii Ake
Mahinda-inĩ ma tene, Ngai nĩ aaheaga anabii ake ndũmĩrĩri cia bata makinyĩrie andũ. Hihi ndũmĩrĩri icio no itũteithie kũmenya ũrĩa tũngĩamũkĩra irathimo cia Ngai? Ĩĩ no itũteithie. Rekei tuone maũndũ marĩa tũngĩĩruta kuuma kũrĩ anabii atatũ ehokeku.
IBURAHIMU
Ngai ndarĩ mũthutũkanio na endaga kũrathima andũ othe.
Ngai eerĩire mũnabii Iburahimu atĩ, “hatarĩ nganja famĩlĩ ciothe cia thĩ nĩ ikaarathimwo kũgerera harĩ wee.”—Kĩambĩrĩria 12:3.
Tũreruta atĩa? Ngai nĩ atwendete mũno na endaga kũrathima famĩlĩ ciothe, na ũguo nĩ kuuga athuri, atumia, na ciana, arĩa mamwathĩkagĩra.
MUSA
Ngai nĩ arĩ tha, na nĩ arathimaga arĩa merutanagĩria kũmũmenya.
Mwene-Hinya-Wothe nĩ aaheire mũnabii Musa ũhoti wa kũringa ciama nene. O na kũrĩ ũguo, Musa aahoire ũũ: “Ndagũthaitha ũmenyithie njĩra ciaku, nĩgetha ngũmenye na thiĩ na mbere gwĩtĩkĩrĩka maitho-inĩ maku.” (Thama 33:13) Ngai nĩ aakenirio nĩ ihoya rĩu rĩa Musa na akĩmũrathima na akĩmũhe ũmenyo na ũtaũku makĩria wĩgiĩ njĩra ciake na ũrĩa atariĩ. Kwa ngerekano, Musa nĩ eerutire atĩ Mũũmbi witũ nĩ “Ngai mũigua tha na mũcayanĩri.”—Thama 34:6, 7.
Tũreruta atĩa? Ngai nĩ endaga gũtũrathima ithuothe tũrĩ athuri, atumia, na ciana, tũngĩĩrutanĩria kũmũmenya wega. Thĩinĩ wa Maandĩko Matheru nĩ atuonetie ũrĩa twagĩrĩirũo kũmũthathaiya, ũrĩa atwendete, na ũrĩa eriragĩria gũtũrathima.
JESU
Jesu arĩ na ũcayanĩri nĩ aahonirie andũ mĩrimũ ya mĩthemba yothe
No tũgĩe na irathimo cia Ngai cia gũtũũra tũngĩĩruta ũhoro wĩgiĩ Jesu, maũndũ marĩa eekire, na marĩa aarutanire.
Kiugo kĩa Ngai nĩ gĩkoragwo na maũndũ maingĩ megiĩ ũtũũro wa Jesu na maũndũ marĩa aarutanire. Ngai nĩ aaheete Jesu ũhoti wa kũringa ciama nyingĩ ta kũhonia andũ arĩa matoonaga, arĩa mataaiguaga, na arĩa maathuaga. O na nĩ aariũkirie andũ maakuĩte. Na njĩra ĩyo Jesu nĩ oonanirie irathimo iria Ngai akaarehera andũ ihinda rĩũkĩte. Nĩ oonanirie ũrĩa o ũmwe witũ angĩka nĩguo akoona irathimo icio, ooigire: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa watũmire, nĩwe Jesu Kristo.”—Johana 17:3.
Jesu aarĩ mũcayanĩri, mũigua tha, na mũtugi. Athuri na atumia, andũ ethĩ na akũrũ, othe nĩ maathiaga kũrĩ we tondũ aameeraga ũũ: “Mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũgũcanjamũrũo.” (Mathayo 11:29) Ngũrani na andũ a hĩndĩ ĩyo arĩa mataaheete atumia gĩtĩo, Jesu nĩ eekagĩra atumia maũndũ na gĩtĩo na ũtugi.
Tũreruta atĩa? Jesu nĩ eendete andũ mũno, na nĩ aatũigĩire kĩonereria kĩega kĩa ũrĩa twagĩrĩirũo kwenda andũ arĩa angĩ.
JESU TIWE NGAI
Maandĩko Matheru marutanaga atĩ “harĩ ithuĩ Ngai no ũmwe” na atĩ Jesu Kristo aarĩ mũtũmwo wa Ngai. (1 Akorintho 8:6) Jesu ooigire ĩmwe kwa ĩmwe atĩ Ngai nĩ mũnene kũmũkĩra, na atĩ Ngai nĩwe wamũtũmire gũkũ thĩ.—Johana 11:41, 42; 14:28. *
^ kĩb. 17 Nĩguo wĩrute ũhoro makĩria wĩgiĩ Jesu Kristo, rora gĩcunjĩ gĩa 8 na gĩa 9 gĩa kabuku getagwo Imani ya Kweli—Siri ya Kuwa na Maisha Yenye Furaha karĩa konekaga Intaneti-inĩ thĩinĩ wa www.isa4310.com/sw.
