Ũrĩa Tũngĩonia Andũ Arĩa Angĩ Wendo
Tondũ tũrĩ njiarũa cia mũndũ wa mbere, Adamu, ithuothe tũrĩ a famĩlĩ ĩmwe. O na gũtuĩka andũ a famĩlĩ ĩmwe merĩgagĩrĩrũo monanie wendo na maheane gĩtĩo, thikũ ici ti kaingĩ monanagia wendo. Ũguo tiguo Ngai witũ ũrĩ wendo endaga.
ŨRĨA MAANDĨKO MATHERU MOIGAGA IGŨRŨ RĨGIĨ WENDO
“No mũhaka wende mũndũ ũrĩa ũngĩ o ta ũrĩa wĩyendete wee mwene.”—MAŨNDŨ MA ALAWII 19:18.
“Endagai thũ cianyu.”—MATHAYO 5:44.
KWENDA ANDŨ ARĨA ANGĨ NĨ KUUGA ATĨA?
Ta rora ũrĩa Ngai ataarĩirie wendo Kiugo-inĩ gĩake thĩinĩ wa 1 Akorintho 13:4-7:
“Wendo nĩ ũrĩ wetereri na ũtugi.”
Ta wĩcirie: Ũiguaga atĩa rĩrĩa andũ arĩa angĩ makuonia wetereri na ũtugi na maga gũkũrakarĩra rĩrĩa wahĩtia?
“Wendo ndũrĩ ũiru.”
Ta wĩcirie: Ũiguaga atĩa rĩrĩa andũ arĩa angĩ maragwĩkũũa kana magakũiguĩra ũiru?
Wendo “ndũcaragia ũrĩa ũngĩĩguna guo mwene.”
Ta wĩcirie: Ũiguaga atĩa rĩrĩa andũ arĩa angĩ marahe mawoni maku gĩtĩo na makaaga kũnyitĩrĩra mawoni mao hingo ciothe?
Wendo “ndũtaraga maita marĩa ũhĩtĩirio.”
Ta wĩcirie: Ngai akoragwo ehaarĩirie kuohera andũ arĩa mamũhĩtĩria merira. Kiugo gĩake kiugaga: “Ndacaragia mahĩtia hingo ciothe, kana agatũũra arakarĩte.” (Thaburi 103:9) Nĩ tũkenaga rĩrĩa tuoherũo nĩ mũndũ tũhĩtĩirie. Kwoguo nĩ twagĩrĩirũo gũikara twĩhaarĩirie kuohera andũ arĩa matũhĩtĩria.—Thaburi 86:5.
Wendo “ndũkenagĩra maũndũ matarĩ ma ũthingu.”
Ta wĩcirie: Tũtingĩigua wega tũngĩona andũ arĩa angĩ magĩkena rĩrĩa tuona maũndũ moru. Kwoguo tũtiagĩrĩirũo gũkena rĩrĩa andũ angĩ maragerera maũndũ maritũ, o na angĩkorũo manatwĩka maũndũ moru.
Nĩguo tũkenere irathimo cia Ngai, no mũhaka twende andũ arĩa angĩ na njĩra icio twarĩrĩria, gũtekũmakania nĩ andũ a mũthemba ũrĩkũ. Njĩra ĩmwe tũngĩka ũguo nayo, nĩ gũteithia andũ arĩa marabatara ũteithio.
