GĨCUNJĨ KĨA WĨRUTI KĨA 29
Hihi nĩ Wĩhaarĩirie nĩ Ũndũ wa Thĩna Ũrĩa Mũnene?
“Ikaragai mwĩhaarĩirie.”—MAT. 24:44.
RWĨMBO NA. 150 Caria Ngai Nĩguo Ũhonokio
GĨCUNJĨ-INĨ GĨKĨ a
1. Nĩkĩ nĩ wega kwĩhaarĩria nĩ ũndũ wa icanjama?
KWĨHAARĨRIA no kũhonokie mĩoyo. Kwa ngerekano, rĩrĩa kwoimĩra gĩcanjama, nĩ ũndũ mũhũthũ harĩ arĩa mehaarĩirie kũhonoka na kũhota gũteithia andũ angĩ. Gĩkundi kĩmwe gĩteithagĩrĩria andũ thĩinĩ wa Europe kĩaugire ũũ: “Kwĩhaarĩria wega no kũhonokie mĩoyo.”
2. Twagĩrĩirũo kwĩhaarĩria nĩ ũndũ wa thĩna ũrĩa mũnene nĩkĩ? (Mathayo 24:44)
2 ‘Thĩna ũrĩa mũnene’ ũkaambĩrĩria o rĩmwe. (Mat. 24:21) O na kũrĩ ũguo, ngũrani na icanjama iria ingĩ, ti andũ othe magaakorererũo nĩ thĩna ũrĩa mũnene matehaarĩirie. Mĩaka ta 2,000 mĩhĩtũku, Jesu nĩ eerire arũmĩrĩri ake maikarage mehaarĩirie nĩ ũndũ wa mũthenya ũcio. (Thoma Mathayo 24:44.) Tũngĩkorũo twĩhaarĩirie, nĩ ũgaakorũo ũrĩ ũndũ mũhũthũ harĩ ithuĩ gũkirĩrĩria ihinda rĩu iritũ na gũteithia andũ angĩ o nao gwĩka ũguo.—Luk. 21:36.
3. Gũkorũo na ũkirĩrĩria, ũcayanĩri, na wendo kũngĩtũteithia atĩa kwĩhaarĩria nĩ ũndũ wa thĩna ũrĩa mũnene?
3 Ta wĩcirie ũhoro wa ngumo ithatũ iria ingĩtũteithia kwĩhaarĩria nĩ ũndũ wa thĩna ũrĩa mũnene. Tũgeeka atĩa tũngĩkeerũo tũhunjie ndũmĩrĩri nditũ ya ituĩro na andũ matũũkĩrĩre? (Kũg. 16:21) Nĩ tũkaabatara gũkirĩrĩria nĩguo twathĩkĩre Jehova tũrĩ na ma atĩ nĩ egũtũgitĩra. Tũgeeka atĩa aarĩ na ariũ a Ithe witũ mangĩkoorũo nĩ indo imwe ciao o na kana moorũo nĩ ciothe? (Hab. 3:17, 18) Nĩ tũkaabatara ũcayanĩri nĩguo tũmahe ũteithio ũrĩa magaakorũo makĩbatara. Tũgeeka atĩa tũngĩgaatharĩkĩrũo nĩ ngwatanĩro ya mabũrũri na tũbatare gũikarania na aarĩ na ariũ a Ithe witũ aingĩ tũrĩ hamwe kwa ihinda? (Ezek. 38:10-12) Nĩ tũkaabatara gũkorũo na wendo mũnene harĩ o nĩguo tũhote gwĩtiiria ihinda rĩu iritũ.
4. Bibilia yonanĩtie atĩa atĩ nĩ twagĩrĩirũo gũthiĩ na mbere gũkũria ũkirĩrĩria, ũcayanĩri, na wendo?
4 Kiugo kĩa Ngai gĩtwĩkĩraga ngoro tũthiĩ na mbere gũkũria ũkirĩrĩria, ũcayanĩri, na wendo. Luka 21:19 yugaga: “Na mwakirĩrĩria nĩ mũkaahonokia mĩoyo yanyu.” Akolosai 3:12 yugaga: “Mwĩhumbei . . . ũcayanĩri.” Na 1 Athesalonike 4:9, 10 yugaga: “Inyuĩ ene nĩ mũrutagwo kwendana nĩ Ngai. . . . No rĩu ariũ a Ithe witũ tũramũringĩrĩria mũthiĩ na mbere gwĩka ũguo na gĩkĩro kĩnene o na makĩria.” Mĩhari ĩyo yothe yaandĩkĩirũo arutwo arĩa maakoretwo makĩonania ũkirĩrĩria, ũcayanĩri, na wendo. O na kũrĩ ũguo, no maabataraga gũthiĩ na mbere kuonania ngumo icio. O na ithuĩ nĩ twagĩrĩirũo gwĩka ũguo. Nĩguo tũhote gwĩka ũguo, nĩ tũkwarĩrĩria ũrĩa Akristiano a tene moonanirie ngumo icio. Tũcoke tuone ũrĩa tũngĩĩgerekania na arutwo acio, na njĩra ĩyo tuonanie atĩ nĩ twĩhaarĩirie nĩ ũndũ wa thĩna ũrĩa mũnene.
ĨKĨRA HINYA ŨKIRĨRĨRIA WAKU
5. Nĩ kĩĩ gĩateithirie Akristiano a tene gũkirĩrĩria magerio?
5 Akristiano a tene nĩ maabataraga gũkirĩrĩria. (Ahib. 10:36) Makĩria ma kũhiũrania na mathĩna marĩa makoraga andũ othe, nĩ maacemanagia na magerio mangĩ. Aingĩ ao nĩ maanyariragwo nĩ atongoria a ndini ya Kĩyahudi na anene a thirikari ya Roma na ningĩ makanyarirũo nĩ andũ a famĩlĩ ciao. (Mat. 10:21) Na thĩinĩ wa kĩũngano, rĩmwe nĩ maabataraga kũrũa na morutani ma aregenyũki arĩa meendaga kũgayũkania kĩũngano. (Atũm. 20:29, 30) No Akristiano acio nĩ maakirĩrĩirie. (Kũg. 2:3) Nĩ kĩĩ kĩamateithirie? Nĩ meecũranagia ũhoro wĩgiĩ andũ arĩa Bibilia yugaga maakirĩrĩirie, ta Ayubu. (Jak. 5:10, 11) Nĩ maahoyaga maheo hinya. (Atũm. 4:29-31) Ningĩ nĩ maaririkanaga atĩ Jehova nĩ angĩamarathimire mangĩathiire na mbere gũkirĩrĩria.—Atũm. 5:41.
6. Ũreruta atĩa kuumana na ũrĩa Merita eekire nĩguo ahote gũkirĩrĩria ũkararia?
6 O na ithuĩ no tũhote gũkirĩrĩria tũngĩĩrutaga kaingĩ igũrũ rĩgiĩ andũ arĩa maakirĩrĩirie magwetetwo thĩinĩ wa Kiugo kĩa Ngai na mabuku-inĩ maitũ, na tũgecũrania ũhoro wao. Mwarĩ wa Ithe witũ wĩtagwo Merita kuuma Albania nĩ aahotire gũkirĩrĩria ũkararia mũnene wa andũ a famĩlĩ nĩ ũndũ wa gwĩka ũguo. Aaugire ũũ: “Nĩ ndahutirio mũno rĩrĩa ndathuthuririe rũgano rwa Bibilia rwĩgiĩ Ayubu. Nĩ aacemanirie na moritũ maingĩ mũno, na o na gũtuĩka ndaamenyaga kĩhumo kĩa mathĩna macio make, aaugire: ‘O nginya rĩrĩa ngaakua, gũtirĩ hĩndĩ ngaatiganĩria wĩkindĩru wakwa!’ (Ayub. 27:5) Ndecũrania nĩ ndonire atĩ magerio makwa maarĩ manini makĩringithanio na ma Ayubu. Ngũrani na Ayubu ũrĩa ũtaamenyaga kũrĩa mathĩna make maaumaga, niĩ nĩ ndamenyaga nũũ kĩhumo kĩa magerio makwa.”
7. O na angĩkorũo tũtirahiũrania na igerio iritũ ihinda-inĩ rĩrĩ-rĩ, nĩ ũndũ ũrĩkũ twagĩrĩirũo kwĩruta gwĩka?
7 Ningĩ no twĩkĩre hinya ũkirĩrĩria witũ na njĩra ya kũhoyaga Jehova kaingĩ na kũmwĩra maũndũ marĩa maratũma tũtangĩke. (Afil. 4:6; 1 Thes. 5:17) No kũhoteke ihinda-inĩ rĩrĩ ndũrĩ na ũndũ mũritũ ũrahiũrania naguo. No hihi nĩ ũhoyaga Jehova agũtongorie rĩrĩa ũraigua ũrakarĩte, ũtukanĩirũo, o na kana ũritũhĩirũo? Ũngĩhoyaga Jehova kaingĩ agũteithie rĩrĩa ũrahiũrania na moritũ matarĩ manene, nĩ ũkaahota kũmũhoya agũteithie ihinda-inĩ rĩũkĩte ũngĩgacemania na moritũ manene. Hĩndĩ ĩyo nĩ ũgaakorũo na ma atĩ nĩ amenyaga rĩrĩa ũrabatara ũteithio na ũrĩa angĩgũteithia.—Thab. 27:1, 3.
ŨKIRĨRĨRIA
Igerio o rĩothe rĩrĩa tũrakirĩrĩria no rĩtũhe hinya wa gũkirĩrĩria igerio rĩngĩ tũngĩcemania narĩo (Rora kĩbungo gĩa 8)
8. Kĩonereria kĩa Mira kĩronania atĩa atĩ gũkirĩrĩria magerio ũmũthĩ no gũtũteithie gũkirĩrĩria magerio mahinda-inĩ mokĩte? (Jakubu 1:2-4) (Ningĩ rora mbica.)
8 Nĩ ũgaakorũo ũrĩ ũndũ mũhũthũ harĩ ithuĩ gũkirĩrĩria magerio ihinda-inĩ rĩũkĩte hĩndĩ ya thĩna ũrĩa mũnene, angĩkorũo nĩ tũrĩkiragĩrĩria magerio ũmũthĩ. (Rom. 5:3) Nĩ kĩĩ kĩngĩtũma tuuge ũguo? Aarĩ na ariũ a Ithe witũ aingĩ nĩ monete atĩ rĩrĩa rĩothe makirĩrĩria igerio rĩna, ũndũ ũcio nĩ ũmateithagia gũkirĩrĩria igerio rĩngĩ mangĩcemania narĩo. Rĩrĩa makirĩrĩria igerio rĩmwe magĩteithio nĩ Jehova, nĩ magĩaga na wĩtĩkio makĩria atĩ Jehova nĩ akoragwo ehaarĩirie kũmateithia. Wĩtĩkio ũcio nĩ ũmateithagia gũkirĩrĩria igerio rĩrĩa rĩngĩ mangĩcemania narĩo. (Thoma Jakubu 1:2-4.) Mwarĩ wa Ithe witũ Mira ũrĩa ũtungataga arĩ painia bũrũri-inĩ wa Albania, nĩ oonire atĩ gũkirĩrĩria moritũ marĩa aacemanirie namo na hau kabere nĩ kũmũteithĩtie gũthiĩ na mbere gũkirĩrĩria moritũ marĩa aracemania namo rĩu. Aaugire atĩ rĩmwe onaga ta arĩ o we wiki ũkoragwo na mathĩna maingĩ. No aririkana ũrĩa Jehova amũteithĩtie na njĩra nene ihinda-inĩ rĩa mĩaka 20 mĩhĩtũku, akeĩra ũũ: ‘Ikara ũrĩ mwĩhokeku. Ndũkareke mĩaka ĩyo yothe ũkoretwo ũgĩkirĩrĩria moritũ ũgĩteithio nĩ Jehova yũrĩre thĩ.’ O nawe no wĩcũranie ũrĩa Jehova agũteithĩtie gũkirĩrĩria. Koragwo na ma atĩ nĩ onaga rĩrĩa rĩothe ũrakirĩrĩria igerio na nĩ arĩkũrathimaga. (Mat. 5:10-12) Na rĩrĩa thĩna ũrĩa mũnene ũkaambĩrĩria, nĩ ũgaakorũo wĩrutĩte gũkirĩrĩria na nĩ ũgaakorũo wĩhotorete gũthiĩ na mbere gũkirĩrĩria.
ONANAGIA ŨCAYANĨRI
9. Kĩũngano kĩa Antiokia ya Siria kĩoonanirie ũcayanĩri atĩa?
9 Ta wĩcirie ũrĩa gwathiire rĩrĩa Akristiano thĩinĩ wa Judea maagũmĩirũo nĩ ngʼaragu nene. Thutha wa aarĩ na ariũ a Ithe witũ a kĩũngano kĩa Antiokia ya Siria kũigua ũhoro wĩgiĩ ngʼaragu ĩyo, nĩ maacaĩire Akristiano acio a Judea. No makĩria ma ũguo, nĩ moonanirie ũcayanĩri wao kũgerera ciĩko. Kwoguo “magĩtua itua rĩa gũtũma ũteithio kũrĩ ariũ a Ithe witũ arĩa maaikaraga Judea, o mũndũ kũringana na ũrĩa angĩahotire.” (Atũm. 11:27-30) O na gũtuĩka Akristiano acio maagũmĩirũo nĩ ngʼaragu maaikaraga kũndũ kũraihu, aarĩ na ariũ a Ithe witũ a Antiokia nĩ meehotorete kũmateithia.—1 Joh. 3:17, 18.
ŨCAYANĨRI
Rĩrĩa kwaumĩra icanjama nĩ tũgĩaga na mweke wa kuonania ũcayanĩri (Rora kĩbungo gĩa 10)
10. Tũngĩonania ũcayanĩri na njĩra irĩkũ rĩrĩa aarĩ na ariũ a Ithe witũ magũmĩrũo nĩ gĩcanjama? (Ningĩ rora mbica.)
10 O na ithuĩ no tuonanie ũcayanĩri ũmũthĩ rĩrĩa twamenya atĩ aarĩ na ariũ a Ithe witũ nĩ mahutĩtio nĩ gĩcanjama. Nĩ twĩrutagĩra kũheana ũteithio o na ihenya, hihi na njĩra ya kũũria athuri a kĩũngano kana no tũteithĩrĩrie wĩra-inĩ mũna, na njĩra ya kũruta mĩhothi nĩ ũndũ wa wĩra wa thĩ yothe, kana na njĩra ya kũhoera arĩa magũmĩirũo nĩ gĩcanjama. b (Thim. 17:17) Kwa ngerekano, mwaka-inĩ wa 2020, makĩria ma kamĩtĩ 950 cia gũteithĩrĩria hĩndĩ ya icanjama nĩ ciathondekirũo thĩinĩ wa thĩ yothe nĩ ũndũ wa kũrũmbũiya arĩa maahutĩtio nĩ kĩngʼũki gĩa COVID-19. Nĩ tũcokagia ngatho mũno nĩ ũndũ wa arĩa matungataga kamĩtĩ-inĩ icio. Nĩ ũndũ wa gũcaĩra aarĩ na ariũ a Ithe witũ, nĩ mahotete kũmahe ũteithio ũrĩa marabatara, makamekĩra ngoro, na rĩmwe na rĩmwe magacokereria kana magaaka mĩciĩ na kũndũ gwa gũthathaĩria kũrĩa gũthũkangĩtio.—Ringithania 2 Akorintho 8:1-4.
11. Ciĩko citũ cia ũcayanĩri igoocithagia Ithe witũ wa igũrũ atĩa?
11 Rĩrĩa tuonania ũcayanĩri thutha wa gĩcanjama kuumĩra, andũ arĩa angĩ nĩ monaga ũrĩa tũrateithania. Kwa ngerekano, mwaka-inĩ wa 2019, kĩhuhũkanio kĩa Dorian nĩ gĩathũkangirie Nyũmba ĩmwe ya Ũthamaki gĩcigĩrĩra-inĩ kĩa Bahamas. Rĩrĩa ariũ a Ithe witũ maacokagĩrĩria nyũmba ĩyo, nĩ mooririe mũndũ ũmwe ũtarĩ Mũira wa Jehova ameere ũrĩa ekũmarĩhia wĩra mũna meendaga arute. Aameerire ũũ: “No nyende gũteithĩrĩria na njĩra ya kũheana . . . macini cia wĩra, aruti a wĩra, na indo iria irabatarania cia gwaka. . . . Ndĩrenda gwĩka ũguo nĩ ũndũ wa ithondeka rĩanyu. Nĩ ngenagio mũno nĩ ũrĩa mũkoragwo mwĩhaarĩirie gũteithia arata anyu.” Andũ aingĩ thĩinĩ wa thĩ matiũĩ Jehova. No aingĩ ao nĩ monaga maũndũ marĩa Aira a Jehova mekaga gũteithĩrĩria andũ arĩa angĩ. Nĩ tũkenaga mũno nĩ kũmenya atĩ kuonia andũ arĩa angĩ ũcayanĩri no gũtũme andũ angĩ mende kũmenya Jehova, Ngai ũrĩa ũrĩ “tha nyingĩ.”—Ef. 2:4.
12. Gũkũria ũcayanĩri mahinda-inĩ maya kũngĩtũteithia atĩa kwĩhaarĩria nĩ ũndũ wa thĩna ũrĩa mũnene? (Kũguũrĩrio 13:16, 17)
12 Nĩkĩ nĩ tũkaabatara kuonania ũcayanĩri hĩndĩ ya thĩna ũrĩa mũnene? Bibilia yonanagia atĩ andũ arĩa matanyitaga mbaru maũndũ ma gĩũteti ma thĩ ĩno nĩ marĩcemanagia na moritũ ihinda-inĩ rĩrĩ na nginya hĩndĩ ya thĩna ũrĩa mũnene. (Thoma Kũguũrĩrio 13:16, 17.) No kũhoteke aarĩ na ariũ a Ithe witũ no mabatare ũteithio wa mabataro ma o mũhaka. Rĩrĩa Mũthamaki witũ Jesu Kristo agooka kũrehe ituĩro, tũngĩenda agaatũkora tũkĩonania ũcayanĩri nĩguo atũhe mweke wa ‘kũgaya Ũthamaki.’—Mat. 25:34-40.
ĨKĨRA WENDO WAKU HINYA
13. O ta ũrĩa Aroma 15:7 yonanĩtie, Akristiano a tene meekĩrire wendo wao hinya atĩa?
13 Wendo nĩguo wamenyithanagia Akristiano a tene. No hihi warĩ ũndũ mũhũthũ harĩ o kuonania wendo? Kwa ngerekano, ta wĩcirie ũrĩa kĩũngano kĩa Roma kĩarĩ na andũ a mĩrerere ngũrani. Amwe ao maarĩ Ayahudi, na maarutĩtwo gwathĩkĩra Watho wa Musa, nao angĩ matiarĩ Ayahudi na ũndũire wao warĩ ngũrani mũno. Akristiano amwe no kũhoteke maarĩ ngombo na angĩ matiarĩ ngombo, na amwe o na no gũkorũo maarĩ na ngombo ciamatungatagĩra. Hihi Akristiano acio mangĩathiire na mbere atĩa kuonania wendo gatagatĩ-inĩ kao o na kũrĩ na ngũrani icio? Mũtũmwo Paulo aamekĩrire ngoro ‘manyitanage ũgeni.’ (Thoma Aroma 15:7.) Hihi eendaga kuuga atĩa? Kiugo kĩrĩa gĩtaũrĩtwo ‘kũnyitana ũgeni,’ kiugĩte kwamũkĩra mũndũ na njĩra ya ũtugi kana ya ũtaana, ta hihi kũmũnyita ũgeni mũciĩ kana kũmũtua mũrata. Kwa ngerekano, mũtũmwo Paulo akĩra Filemona ũrĩa ekwamũkĩra ngombo yake ĩrĩa yorĩte yetagwo Onesimo, aamwĩrire ũũ: “Mwamũkĩre na njĩra ya ũtugi.” (Filem. 17) Nao Pirisila na Akila nĩ maanyitire Apolo ũgeni, ũrĩa ũtaamenyaga maũndũ maingĩ megiĩ Ũkristiano tao, na njĩra ya ‘gũthiĩ nake kwao.ʼ (Atũm. 18:26, The Bible in Gikũyũ.) Akristiano acio nĩ maanyitanaga ũgeni na matiarekire ngũrani gatagatĩ-inĩ kao imagayũkanie.
WENDO
Wendo wa aarĩ na ariũ a Ithe witũ no ũtũteithie gũkirĩrĩria (Rora kĩbungo gĩa 15)
14. Anna na mũthuri wake moonirie andũ arĩa angĩ wendo na njĩra ĩrĩkũ?
14 O na ithuĩ no tuonie aarĩ na ariũ a Ithe witũ wendo na njĩra ya kũmatua arata na kũhũthĩra mahinda hamwe nao. Ũndũ ũcio nĩ ũrĩmatindĩkaga o nao gũtuonia wendo. (2 Kor. 6:11-13) Ta wĩcirie ũhoro wa ngerekano ya Anna na mũthuri wake. Kĩngʼũki gĩa COVID-19 kĩaambĩrĩirie kahinda kanini thutha wao gũthiĩ gũtungata marĩ amishonarĩ bũrũri-inĩ ũmwe thĩinĩ wa Afrika ya Ithũĩro. Nĩ ũndũ wa kĩngʼũki kĩu matingĩahotire kuonana ũthiũ gwa ũthiũ na andũ a kĩũngano kĩao, na ndwarĩ ũndũ mũhũthũ harĩ o kũmenyana nao. Hihi Anna na mũthuri wake maangĩonirie aarĩ na ariũ a Ithe witũ acio wendo atĩa? Nĩ maahũthĩrire njĩra cia kwaranĩria na video nĩguo maranĩrie nao, na mameere ũrĩa meeriragĩria mũno kũmamenya wega. Aarĩ na ariũ a Ithe witũ acio nĩ maahutirio nĩ wendo ũcio, na o nao makĩambĩrĩria kũmahũũragĩra thimũ na kũmatũmĩra ndũmĩrĩri. Nĩ kĩĩ gĩatindĩkire amishonarĩ acio gwĩka ũguo? Anna aaugire ũũ: “Wendo ũrĩa niĩ na famĩlĩ itũ twanonio mahinda-inĩ mega na mahinda-inĩ maritũ ndũngĩriganĩra, na nĩ ũndindĩkaga o na niĩ kuonania wendo.”
15. Ũreruta atĩa kuumana na Vanessa igũrũ rĩgiĩ kwenda aarĩ na ariũ a Ithe witũ othe? (Ningĩ rora mbica.)
15 Aingĩ aitũ tũkoragwo ciũngano-inĩ irĩ na aarĩ na ariũ a Ithe witũ maumĩte ũndũire-inĩ ngũrani na marĩ na ũmũndũ ngũrani na witũ. No twĩkĩre wendo witũ hinya kũmerekera na njĩra ya kũroraga ngumo ciao njega. Mwarĩ wa Ithe witũ ũmwe wĩtagwo Vanessa ũrĩa ũtungataga bũrũri-inĩ wa New Zealand, hĩndĩ ĩmwe nĩ aaritũhagĩrũo kũiguithania na andũ amwe thĩinĩ wa kĩũngano. No agĩtua itua atĩ handũ ha gwĩthemaga andũ arĩa marĩ na ũmũndũ ũtaramũkenia, nĩ arĩhũthagĩra mahinda hamwe nao. Gwĩka ũguo nĩ kwamũteithirie kuona kĩrĩa gĩtũmaga Jehova amende. Aaugire ũũ: “Kuuma rĩrĩa mũthuri wakwa aatuĩkire mũrori wa mũthiũrũrũko, nĩ tũcemanagia na aarĩ na ariũ a Ithe witũ aingĩ marĩ na ũmũndũ ũtiganĩte, na nĩ hotaga kũiguithania nao. Rĩu nĩ ngenagĩra kuona andũ marĩ na ũmũndũ ngũrani. Na hatarĩ nganja, Jehova o nake nĩ akenaga tondũ andũ arĩa etĩkagĩria matuĩke athathaiya ake makoragwo marĩ ngũrani.” Rĩrĩa tweruta kuonaga andũ arĩa angĩ ta ũrĩa Jehova amonaga, nĩ tuonanagia atĩ nĩ tũmendete.—2 Kor. 8:24.
Hĩndĩ ya thĩna ũrĩa mũnene, Jehova nĩ agaatũgitĩra tũngĩgathiĩ na mbere kũmũtungatĩra hamwe na aarĩ na ariũ a Ithe witũ (Rora kĩbungo gĩa 16)
16. Wendo ũkaabatarania mũno nĩkĩ hĩndĩ ya thĩna ũrĩa mũnene? (Ningĩ rora mbica.)
16 Wendo nĩ ũkaabatarania hĩndĩ ya thĩna ũrĩa mũnene. Hĩndĩ ĩrĩa thĩna ũcio ũkaambĩrĩria-rĩ, Jehova agaatũgitĩra atĩa? Ta wĩcirie ũrĩa Jehova eerĩte andũ ake meke rĩrĩa Babuloni ya tene ĩngĩatharĩkĩirũo. Aameerĩte ũũ: “Thiĩi, inyuĩ andũ akwa mũingĩre rumu cianyu cia thĩinĩ, na mũhinge mĩrango mwaingĩra. Mwĩhithe ihinda inini nginya rĩrĩa marakara marĩkorũo mahĩtũkĩte.” (Isa. 26:20) No kũhoteke o na ithuĩ nĩ tũkaabatara gwathĩkĩra ciugo icio hĩndĩ ya thĩna ũrĩa mũnene. ‘Rumu cia thĩinĩ’ no ikorũo ikĩrũgamĩrĩra ciũngano citũ. Jehova nĩ eranĩire atĩ nĩ agaatũgitĩra hĩndĩ ya thĩna ũrĩa mũnene, angĩkorũo nĩ tũgathiĩ na mbere kũmũtungatĩra hamwe na aarĩ na ariũ a Ithe witũ. Kwoguo no mũhaka twĩrutanĩrie kwenda aarĩ na ariũ a Ithe witũ ihinda-inĩ rĩrĩ, to kũmakirĩrĩria tu. Gwĩka ũguo no gũtũteithie gũkaahonoka!
WĨHAARĨRIE IHINDA-INĨ RĨRĨ
17. Nĩ ũndũ ũrĩkũ tũkaahota gwĩka hĩndĩ ya thĩna ũrĩa mũnene tũngĩĩhaarĩria ihinda-inĩ rĩrĩ?
17 “Mũthenya ũrĩa mũnene wa Jehova” nĩ ũkaarehera andũ moritũ maingĩ. (Zef. 1:14, 15) O na andũ a Jehova no magaacemania na moritũ. No tũngĩĩhaarĩria ihinda-inĩ rĩrĩ, nĩ tũkaahota gũikara tũhooreire na tũteithie andũ angĩ. Nĩ tũkaahota gũkirĩrĩria moritũ o mothe tũgaacemania namo. Aarĩ na ariũ a Ithe witũ mangĩgaacemania na moritũ, nĩ tũgeka ũrĩa wothe tũngĩhota kũmateithia na njĩra ya kũmacaĩra na kũmateithia kuona mabataro mao. Na tũngĩĩruta kwenda aarĩ na ariũ a Ithe witũ ihinda-inĩ rĩrĩ, nĩ tũkaahota kũmonia wendo hĩndĩ ĩyo. Tweka ũguo, Jehova nĩ agaatũrathima atũhe muoyo wa tene na tene thĩinĩ wa thĩ njerũ, kũrĩa maũndũ ta icanjama na mathĩna mothe matakaaririkanwo rĩngĩ.—Isa. 65:17.
RWĨMBO NA. 144 Tũũra Ũcũthĩrĩirie Kĩheo!
a Ica ikuhĩ, thĩna ũrĩa mũnene nĩ ũrĩambĩrĩria. Nĩ tũrabatara ngumo ya ũkirĩrĩria, ũcayanĩri, na wendo, nĩguo tũkorũo twĩhaarĩirie nĩ ũndũ wa moritũ marĩa andũ magaacemania namo hĩndĩ ĩyo. Nĩ tũkuona ũrĩa Akristiano a tene meerutire kuonania ngumo icio, ũrĩa tũngĩcionania ũmũthĩ, na ũrĩa ngumo icio ingĩtũteithia kwĩhaarĩria nĩ ũndũ wa thĩna ũrĩa mũnene.
b Arĩa mangĩenda kũnyitanĩra wĩra-inĩ wa kũheana ũteithio magĩrĩirũo kwamba kũiyũria fomu ya Ombi la Kujitolea Katika Kazi ya Usanifu na Ujenzi (DC-50) kana ya Ombi la Kuwa Mjitoleaji (A-19) macoke meterere metwo magateithĩrĩrie.