NATALYA marĩ na kahĩĩ gake ka mĩaka kenda, Aslan, mekunĩte manyitanĩte, hakuhĩ na harĩa Zarina na kairĩtu gake Anzhelika ka mĩaka ikũmi na ĩrĩ marĩ. Makĩria ma ciana ingĩ 1,000 na andũ agima maikarĩte hamwe marũgamĩrĩirũo nĩ itoi irĩ na matharaita.

Mathaa ma rũcinĩ ma mũthenya ũcio wa Njumatano Septemba 1, 2004, aciari maarĩ nja na ciana ciao makĩhaarĩria gũkũngũĩra mũthenya wa mbere wa cukuru gataũni-inĩ kanini getagwo Beslan, karĩa karĩ Alania bũrũri-inĩ wa Russia. O rĩmwe, andũ maarĩ na mĩcinga na a gwĩtuthũra na mbomu makĩmoimĩrĩra na makĩambĩrĩria gũtũrĩkia mĩcinga rĩera-inĩ makĩhũyũkaga. Makĩria ma itoi 30 igĩtwarĩrĩria andũ acio nyũmba-inĩ ya gũthakĩra kũu cukuru, na makĩmĩthiũrũrũkĩria na nduthũki.

Kwoguo gũkĩgĩa na ndũgamano ya thikũ ithatũ gatagatĩ ga itoi icio na thigari. Natalya, ũrĩa werutaga Bibilia na Aira a Jehova oigire ũũ: “Ndioimĩte hoete ta ũrĩa ndahoire hĩndĩ ĩyo.”

Kwarĩ hĩndĩ ya riũa na nyũmba ĩyo ya mathako yarĩ na ũrugarĩ mũingĩ mũno. Kuuma mũthenya wa Aramithi itoi icio itiaheire acio cianyitĩte mĩgwate maĩ kana irio, na gũkinyĩria Njumaa-rĩ, amwe ao makiumania na kũnyua mathugumo na kũrĩa mahũa marĩa ciana ciareheire arimũ. Ningĩ Natalya oigire ũũ: “Kahĩĩ twaikaranĩtie nako gakĩhe gathangũ ka ihũa. Ngĩgatinania maita merĩ, kamwe ngĩhe Anzhelika na kau kangĩ ngĩhe Aslan.”

Mũthenya wa Njumaa mathaa ma hwaĩ-inĩ, mbaara ĩgĩtuthũka. Natalya agataarĩria: “Nduthũki ikĩngũithia. Ndogo  nene ĩkĩiyũra rĩera-inĩ, na rithathi ikĩambĩrĩria kũrĩra.” Hĩndĩ ĩrĩa thigari ciahũranaga na itoi, Natalya na Aslan makĩũra makurumĩte. Mũndũ ũmwe wa kũu wĩtagwo Alan akĩmagucia akĩmeheria ũgwati-inĩ. Andũ angĩ aingĩ matiahotire gwĩthara.

Ciana nyingĩ na andũ agima nĩ maakuire o hamwe na Anzhelika. Ciumia ciigana ũna thutha ũcio, kĩrĩro no kĩaiguĩkaga kũu Beslan. Mũciĩ wa Natalya ũng’ethanĩire na cukuru ĩyo, na o na thutha wa cukuru ĩngĩ gwakwo hau hakuhĩ, Aslan nĩ aaremagwo gũthiĩ kuo. O na ndooimaga nja gũthaka. Natalya oigaga: “Twathaithire Jehova amũteithie kũniina guoya ũrĩa aarĩ naguo.” Thutha wa kahinda akĩgĩa na ũmĩrĩru wa gũcoka cukuru.

Ũndũ ũrĩa warĩ mũritũ harĩ Natalya warĩ gũthiĩ mĩcemanio ya Gĩkristiano thĩinĩ wa Nyũmba ya Ũthamaki. Ataarĩirie ũũ: “Rĩrĩa rĩothe ndakoragwo handũ thĩinĩ harĩ na andũ aingĩ ndonaga ta nyũmba ĩyo ĩgũtharĩkĩrũo. Ndahoyaga gũtigekĩke ũndũ. Thutha wa ihinda ngĩtiga gũthiĩ mĩcemanio ĩyo. Ningĩ nĩ ndathumbũkaga kũmenya atĩ ithuĩ nĩ twahonokire no andũ angĩ aingĩ magĩkua.”

Natalya oigaga: “Arĩa othe marĩ thĩinĩ wa kĩũngano gĩa Gĩkristiano mathiĩte na mbere kũndeithia nĩ ndĩmacokagĩria ngatho.” Mũira ũmwe wa Jehova wĩtagwo Tatyana nĩ aanjeragĩra o thutha wa thikũ ithatũ ategũtĩrĩria. Thutha ũcio agĩũka na Mũira ũngĩ wa Jehova wetagwo Ulyana, ũrĩa woĩ Bibilia mũno, warĩ mũcayanĩri, warĩ na ũtaũku na waaragia ahoreire. Nĩ angathagĩrĩria nĩ ũndũ wa kwĩrutanĩria na agaathikĩrĩria.

“Ulyana nĩ aathomeire ciugo cia mũtũmwo Mũkristiano Paulo iria irĩ thĩinĩ wa 2 Akorintho 1:9. Thutha wa ũndũ wekĩkire Asia, Paulo oigire ũũ: ‘Tũgĩkĩigua thĩinĩ wa ngoro ciitũ ta arĩ ituĩro twatuĩrĩirũo rĩa gũkua.’ Ningĩ nĩ aathomeire Isaia 40:31: ‘Arĩa mehokete Jehova nĩo magacokererũo nĩ hinya wao ũrĩa morĩtwo nĩguo. Makombũka na igũrũ na mathagu o ta nderi.’ Maandĩko ta macio o hamwe na ũrĩa ndomagĩrĩrio nĩ Ulyana na andũ angĩ, nĩ maanjĩkĩrire hinya gũthiaga mĩcemanio ya Gĩkristiano rĩngĩ o hamwe na ciana ciakwa. O na kũrĩ ũguo, ndĩ nyũmba-inĩ nene no njiguaga ndĩ na guoya.”

Thutha-inĩ Zarina nĩ aatuĩkire Mũira wa Jehova na nĩ erĩgagĩrĩra gũkaanyita Anzhelika ũgeni hĩndĩ ya kũriũka thĩinĩ wa thĩ thaka ĩrĩ na thayũ ĩrĩa ĩgaakorũo ĩgĩathwo nĩ Ũthamaki wa Ngai. (Mathayo 6:​9, 10; Atũmwo 24:15) Natalya na ciana ciake nĩ maabatithirio mwaka wa 2009. Nginyagia riũ, matũire hakuhĩ na matigari ma nyũmba ĩyo yathaakagĩrũo, na nĩ mahotete gwĩtiiria maũndũ macio ma kũmekĩra guoya. Natalya oigire ũũ: “Rĩu nĩ hotaga kwaria ũhoro wa mũthenya ũcio itekũigua ũũru kana gwĩtigĩra. Ngai nĩ atũteithagia kũũmĩrĩria.”