KUUMA KŨNDŨ NA KŨNDŨ
Maũndũ Megiĩ Afrika
Mathondeka maingĩ, na andũ kĩũmbe nĩ mathiĩte na mbere gwĩkĩra kĩyo nĩguo maagagĩrie mĩtũũrĩre ya andũ thĩinĩ wa Afrika. O na kũrĩ ũguo, gĩcigo gĩkĩ no kĩgũmĩirũo nĩ mathĩna maingĩ mũno.
KŨŨRAGWO KWA MUNYI
Munyi 1,004 nĩ cioragirũo thĩinĩ wa bũrũri wa Afrika ya Mũhuro mwaka-inĩ wa 2013, iringithanĩtio na 13 iria cioragirũo mwaka wa 2007. O na gũtuĩka hĩa cia munyi nĩ cionekete kwa ũingĩ, no irathiĩ na mbere gwethũo mũno nĩ andũ ũũ atĩ kilo ĩmwe ya hĩa icio no ĩkorũo ĩrĩ na goro gũkĩra kilo ya thahabu. Rũhĩa rũmwe tu no rũkinyie dola 500,000 cia Amerika.
ŨNDŨ WA GWĨCIRIA: Hihi nĩ kũrĩ hĩndĩ thirikari ikaahota kũniina uuni wa watho?—Jeremia 10:23.
Mahaki Mataribotagwo
Kũringana na kĩama kĩa Transparency International, mabũrũri ma Afrika ya Irathĩro nĩ mamwe ma marĩa makoragwo na ungumania wa gĩkĩro kĩa igũrũ mũno thĩinĩ wa thĩ. O na kũrĩ ũguo, andũ 90 harĩ 100 arĩa mekoraga handũ maretio mahaki matiribotaga ũndũ ũcio. Mwaria wa rũhonge rwa kĩama kĩu bũrũri-inĩ wa Kenya, oigire ũũ: “Raiya mationekaga ta marehoka atĩ thirikari no yoe ikinya mangĩheana riboti ciĩgiĩ ungumania.”
ŨRĨA BIBILIA YUGAGA: “Ihaki nĩrĩo rĩtũmaga arĩa me na maitho matuĩke atumumu.”—Thama 23:8.
Andũ a Afrika Kũhũthĩra Intaneti
Kũringana na kĩama kĩa International Telecommunication Union, andũ 20 harĩ 100 a Afrika, nĩ meerĩgagĩrĩrũo gũkorũo makĩhũthĩra Intaneti gũkinyĩria mũthia wa mwaka wa 2014. Mũigana wa andũ arĩa mareyandĩkithia Intaneti-inĩ thĩinĩ wa Afrika ũrakũra na maita merĩ gũkĩra mabũrũri marĩa mangĩ thĩinĩ wa thĩ.
