Athuri na atumia arĩa makoragwo merutĩire harĩ kĩhiko kĩao makĩonaga kĩrĩ mũbango wa gũtũũra, na ũndũ ũcio nĩ ũtũmaga o ũmwe wao aigue agitĩrĩtwo. Makoragwo na ma atĩ ũrĩa mahikanĩtie nake nĩ egũikara thĩinĩ wa kĩhiko kĩao o na kũngiumĩra mathĩna.

Andũ amwe maikaraga thĩinĩ wa kĩhiko kĩao nĩ ũndũ wa kũhatĩkwo nĩ arata kana andũ ao a famĩlĩ. O na kũrĩ ũguo, nĩ wega makĩria kwĩrutĩra harĩ kĩhiko nĩ ũndũ wa gũkorũo andũ mendaine na maheanĩte gĩtĩo.

ŨTAARO WA BIBILIA: “Mũthuri ndagĩrĩirũo gũtiga mũtumia wake.”​—1 Akorintho 7:11.

“Ũngĩkorũo wĩrutĩire harĩ kĩhiko gĩaku, ndũrĩhiũhaga kũrakara. Ũrĩhiũhaga kuohera ũrĩa mũhikanĩtie nake o na ũkahiũha kũhoya mũhera. Ũrĩonaga mathĩna matariĩ ta mĩhĩnga, no ti marĩ maũndũ ma kũniina kĩhiko.”​—Micah.

Rĩrĩa mũthuri na mũtumia macemania na mathĩna, angĩkorũo matikoragwo merutĩire harĩ kĩhiko kĩao, mahota kuuga, ‘Ithuĩ tũtiaganĩrĩirũo,’ na macarie itũmi cia gũtigana.

“Andũ aingĩ maingĩraga kĩhiko-inĩ makĩmenyaga atĩ kĩhiko kĩao kĩngĩaga kũgaacĩra, no matigane. Rĩrĩa andũ maingĩra kĩhiko-inĩ magĩciragia atĩ no matigane, matirĩkoragwo merutĩire harĩ kĩhiko kĩao kuuma o kĩambĩrĩria.”​—Jean.

WĨTHUTHURIE

Rĩrĩa mwaga kũiguithania ũndũ-inĩ mũna-rĩ, . . .

• Hihi nĩ wĩkoraga ũkĩĩrira nĩ ũndũ wa kũhikania na ũrĩa mũhikanĩtie nake?

• Hihi nĩ ũhũũraga mbica meciria-inĩ mũhikanĩtie na mũndũ ũngĩ?

• Hihi nĩ uugaga ciugo ta “Niĩ nĩ ngũgũtiga” kana “Nĩ ngũcaria mũndũ ũngĩ ũrĩnyonaga ndĩ wa bata”?

Angĩkorũo nĩ wacokia ĩĩ harĩ kĩũria kĩmwe kana makĩria gĩa icio, nĩ ũrabatara gwĩkĩra hinya itua rĩaku rĩa kwĩrutĩra harĩ kĩhiko gĩaku.

ARĨRĨRIAI MAŨNDŨ MAYA NA ŨRĨA MŨHIKANĨTIE NAKE

• Hihi nĩ tũnyihĩtie ũrĩa twĩrutagĩra harĩ kĩhiko gitũ? Angĩkorũo nĩguo-rĩ, gũthiĩte ũguo nĩkĩ?

• Nĩ makinya marĩkũ tũngĩoya rĩu nĩguo twĩkĩre hinya itua ritũ rĩa kwĩrutĩra harĩ kĩhiko gitũ?

GERIA ŨŨ

• Rĩmwe na rĩmwe, andĩkagĩra ũrĩa mũhikanĩte nake kaũndũ ga kũmuonia atĩ nĩ ũmwendete

• Onania atĩ nĩ ũkoragwo wĩrutĩire harĩ kĩhiko gĩaku na njĩra ya kũiga mbica ya mũndũ ũrĩa mũhikanĩtie nake metha-inĩ yaku wĩra-inĩ

• Hũũragĩra ũrĩa mũhikanĩtie nake thimũ o mũthenya rĩrĩa ũrĩ wĩra-inĩ kana rĩrĩa mũtarĩ hamwe

ŨTAARO WA BIBILIA: “Arĩa Ngai anyitithanĩtie, mũndũ ndakanamatigithanie.”​—Mathayo 19:6.