1, 2. Nĩ atĩa tũngĩka nĩgetha tũkorũo tũrĩ na hinya kĩĩmwĩrĩ, na gwĩka ũguo nĩ kwa bata nĩkĩ?

ITHUOTHE nĩ twendaga gũkorũo tũrĩ na hinya na ũgima mwega wa mwĩrĩ. No nĩgetha tũkorũo tũtariĩ ũguo-rĩ, twagĩrĩirũo nĩ kũrĩa irio njega, tũrutithie mwĩrĩ wĩra, na tũthiĩ na mbere kũrũmbũiya ũgima witũ wa mwĩrĩ. Ũndũ ũcio ti mũhũthũ, no tondũ nĩ ũhutagia ũtũũro witũ wa mahinda maya na marĩa mokĩte, no tũthiaga na mbere. No nĩ kũrĩ mũthemba ũngĩ wa gũkũra twagĩrĩirũo gwĩciria ũhoro waguo. Nĩ ũrĩkũ ũcio?

² Mũtũmwo Judasi nĩ aaririe ũhoro waguo rĩrĩa eerire Akristiano ũũ: “Mũikarage o mwendetwo nĩ Ngai,” ningĩ o hau nĩ onanirie ũrĩa mangĩka ũguo: “Ikaragai mũkĩongererekaga hinya ũhoro-inĩ wanyu wa gwĩtĩkia wĩtĩkio ũrĩa mũtheru mũno.” (Judasi 20, 21) Nĩ ũndũ ũrĩkũ ũngĩka nĩgetha wongerere wĩtĩkio waku hinya na nĩguo ũikarage wendetwo nĩ Ngai? Rekei twĩcirie ũhoro wa maũndũ matatũ tũrabatara kũrũmbũiya.

3-5. (a) Shaitani endaga ũgĩe na mawoni marĩkũ matagĩrĩire igũrũ rĩgiĩ ithimi cia Ngai? (b) Twagĩrĩirũo kuona ithimi cia Ngai na njĩra ĩrĩkũ, na ciagĩrĩirũo gũtũma tũigue atĩa? Heana ngerekano.

³ Wa mbere, tũrabatara gwĩkĩra hinya wĩtĩkio witũ thĩinĩ wa watho wa Ngai. Nĩ wĩrutĩte maũndũ maingĩ megiĩ ithimi  cia ũthingu cia Jehova thĩinĩ wa ibuku rĩrĩ. Wee ũrona maũndũ macio atĩa? Shaitani angĩenda gũkũhĩtithia nĩgetha wone mawatho na ithimi cia Jehova ta arĩ cia gũtũima maũndũ mega, o na kana irĩ cia gũtũhinyĩrĩria. Akoretwo akĩhũthĩra njĩra ĩyo kuuma o rĩrĩa yagĩire na moimĩrĩro mega mũno thĩinĩ wa mũgũnda wa Edeni. (Kĩambĩrĩria 3:1-6) Hihi nĩ egũkũhĩtithia o nawe? Gũkũringana na mwerekera waku.

⁴ Kwa ngerekano-rĩ, ta hũũra mbica ũgĩceeraceera thĩinĩ wa kamũtitũ gathaka, ũkoona rũgiri rũnene rũrigicĩirie handũ. Kũu kũrigicĩirio kũroneka gwĩ gũthaka mũno. Warora o ũguo wahota kuona rũgiri rũu ta rũragiria ũthiĩ kũrĩa ũrenda. No wacũthĩrĩria-rĩ, wone mũrũthi mũnene mũno ũgĩtembũranga nyama hau thĩinĩ. Rĩu ũkona bata wa rũgiri rũu—nĩ gũkũgitĩra. Hihi nĩ kũrĩ na thũ ĩkuohetie o na rĩu? Kiugo kĩa Ngai gĩtũheaga mũkaana ũyũ: “Ikaragai mũterigĩtwo, na mwĩhũgage. Atĩrĩ, mũcukani, thũ yanyu, acangaga ta mũrũthi ũkũrarama, agĩcaragia mũndũ wa gũtambura.”—1 Petero 5:8.

⁵ Shaitani nĩ thũ njũru mũno. Tondũ Jehova ndarenda tũtembũrangwo nĩ Shaitani-rĩ, Nĩ aigĩte mawatho ma gũtũgitĩra kuumana na “mawara” ma ũcio mũũru. (Aefeso 6:11) Kwoguo-rĩ, rĩrĩa twethugunda ũhoro wa mawatho ma Ngai-rĩ, twagĩrĩirũo kũmoona marĩ njĩra ya Ithe witũ ya gũtuonia wendo. Tũngĩona mawatho ma Ngai na njĩra ĩyo-rĩ, megũkorũo marĩ kĩhumo kĩa ũgitĩri na gĩkeno. Mũtũmwo Jakubu aandĩkire ũũ: “Mũndũ ũrĩa ũcũthagĩrĩria watho ũrĩa mwagĩrĩru kũna, o ũrĩa ũtarĩ wa ũkombo-rĩ, na agatũũra aũcũthagĩrĩria-rĩ, . . . mũndũ ũcio nĩakarithimĩrũo maũndũ marĩa ekaga.”—Jakubu 1:25.

6. Nĩ njĩra ĩrĩkũ njega mũno ya gwĩkĩra hinya wĩtĩkio thĩinĩ wa mawatho mathingu na ithimi cia Ngai? Heana ngerekano.

⁶ Gũtũũra kũringana na mawatho ma Ngai nĩyo njĩra ĩrĩa njega mũno ya gwĩkĩra hinya wĩtĩkio witũ thĩinĩ wa Mũheani-Watho ũcio na thĩinĩ wa ũũgĩ wa mawatho make. Kwa ngerekano-rĩ, “watho wa Kristo” nĩ hamwe na watho ũrĩa waheanirũo nĩ Jesu wa kũruta andũ “maũndũ marĩa mothe  [aatwathire].” (Agalatia 6:2; Mathayo 28:19, 20) Akristiano ningĩ nĩ moyaga na ũritũ watho wa gũcemanagia hamwe nĩgetha mathathaiye na meekĩrane hinya. (Ahibirania 10:24, 25) Ningĩ watho wa Ngai nĩ hamwe na ũrĩa wa kũhoyaga Jehova maita maingĩ o mũthenya mahoya moimĩte ngoro thĩinĩ. (Mathayo 6:5-8; 1 Athesalonike 5:17) Twatũũra kũringana na mawatho macio-rĩ, nĩ tuonaga wega atĩ kũna nĩ ũtongoria wa wendani. Kũmarũmĩrĩra nĩ kũrehaga gĩkeno na kũiganĩra kũrĩa tũtangĩona kũndũ kũngĩ o na kũrĩkũ thĩinĩ wa thĩ ĩno ĩiyũirũo nĩ mathĩna. Weciria ũrĩa wee ũgunĩkĩte nĩ ũndũ wa gũtũũra kũringana na mawatho ma Ngai-rĩ, githĩ ũndũ ũcio ndwĩkĩraga wĩtĩkio waku hinya?

7, 8. Kiugo kĩa Ngai kĩũmagĩrĩria atĩa arĩa monaga ta matangĩhota gũtũũra marĩ athingu o ũrĩa mĩaka ĩrathiĩ?

⁷ Rĩngĩ andũ amwe metigagĩra atĩ o ũrĩa mĩaka ĩrathiĩ kwahota gũkorũo arĩ ũndũ mũritũ gũtũũra meekaga ũrĩa Jehova endaga. Metigagĩra atĩ maahota kũremererũo. Ũngĩkaigua ũguo mũthenya o na ũmwe-rĩ, ririkana ciugo ici: “Jehova Mũgũkũũri, o we Ũrĩa Mũtheru wa Isiraeli-rĩ, ekuuga ũũ: Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera. Hĩ!  Na arĩ korũo nĩwaiguĩte maathani makwa! Kũngĩakorirũo nĩ ũguo-rĩ, thayũ ũrĩa ũngĩagĩire naguo ũngĩahaanire o ta rũũĩ rũgũtherera, o naguo ũthingu waku ũngĩahaanire o ta ndihũ cia maĩ ma iria.” (Isaia 48:17, 18) Hihi nĩ ũrĩ wakira ũgeciria ũrĩa ciugo icio citũũmagĩrĩria?

⁸ Jehova haha aratũririkania atĩ nĩ ithuĩ tũgunĩkaga rĩrĩa twamwathĩkĩra. Atwĩrĩire irathimo igĩrĩ tweka ũguo. Mbere, thayũ witũ ũgũkorũo ũhaana ta rũũĩ—mũingĩ, ũtarathira, ũhooreire. Kerĩ, ũthingu witũ ũgũkorũo ũhaana ta ndihũ cia maĩ ma iria. Ũngĩrũgama rũteere-inĩ rwa iria wĩrorere ndihũ cia maĩ ũrĩa ĩrũmanagĩrĩra-rĩ, hatarĩ nganja nĩ ũkuona atĩ cigũthiĩ na mbere tene na tene. Nĩ ũĩ atĩ cigũthiĩ na mbere kũhũũra rũteere rwa iria tene na tene. Jehova oigĩte atĩ ũthingu waku—mũtũũrĩre waku wa ũthingu—no ũtũũre tene na tene. Rĩrĩa rĩothe ũgũtũũra ũgeragia gũikara ũrĩ mwĩhokeku harĩ we-rĩ, ndagagũtiganĩria! (Thaburi 55:22) Na githĩ ciĩranĩro ta icio njega ũguo citiĩkĩraga hinya wĩtĩkio waku thĩinĩ wa Jehova na ithimi ciake cia ũthingu?

9, 10. (a) Ũgima nĩ ũndũ mwega harĩ Akristiano nĩkĩ? (b) Gũkorũo na muonere wa kĩĩroho kũrehaga gĩkeno nĩkĩ?

⁹ Kerĩ, tũrabatara gũtuĩka ‘andũ agima.’ (Ahibirania 5:14; 6:1) Ũgima nĩ muoroto mwega mũno wa Mũkristiano. Ngũrani na gũkinyanĩra, kũrĩa tũtangĩhota kwa ihinda rĩrĩ-rĩ, ithuothe no tũtuĩke andũ agima. Ningĩ-rĩ, Akristiano nĩ moonaga gĩkeno kĩnene makĩria magĩtungatĩra Jehova o ũrĩa maragimara. Nĩkĩ?

¹⁰ Mũkristiano mũgima nĩ mũndũ wa kĩĩroho. Onaga maũndũ ta ũrĩa Jehova amonaga. (Johana 4:23) Paulo aandĩkire ũũ: “Andũ arĩa marũmagĩrĩra ũhoro wa mwĩrĩ, nĩ maũndũ ma mwĩrĩ meciragia: no andũ arĩa marũmagĩrĩra ũhoro wa Roho, acio meciragia maũndũ ma Roho.” (Aroma 8:5) Kuona maũndũ na njĩra ya kĩĩmwĩrĩ kũrehaga gĩkeno o kĩnini tu,  tondũ nĩ kwĩyenda, gũtionaga kũraihu, na kuonaga o maũndũ ma kĩĩmwĩrĩ tu. Kuona maũndũ na njĩra ya kĩĩroho nĩ kũrehaga gĩkeno, tondũ gũcũũthagĩrĩria Jehova, Ngai wĩ gĩkeno. Mũndũ wa kĩĩroho nĩ endaga gũkenia Jehova na nĩ akenagĩra o na rĩrĩa arĩ rungu rwa magerio. Nĩkĩ? Magerio nĩ matũheaga mweke wa kuonania atĩ Shaitani nĩ mũheenania na wa gũkũria wĩkindĩru, tũgakenia Ithe witũ wa igũrũ. —Thimo 27:11; Jakubu 1:2, 3.

11, 12. (a) Rĩrĩa Paulo oigire ũhoro wa Mũkristiano “gũkũũrana wega na ũũru-rĩ,” kiugo kĩrĩa gĩtaũrĩtwo “kwĩmenyeria” kiugĩte atĩa? (b) Nĩ kũmenyerio kũrĩkũ mwĩrĩ wagĩrĩire nĩgetha ũgimare na ũhote kũruta wĩra wega?

¹¹ Kũgimara kĩĩroho kuumanaga na kwĩmenyeria. Ta wĩcirie ũhoro wa mũhari ũyũ: “No irio iria nyũmũ nĩ cia andũ arĩa agima, o arĩa mahũthĩire gũkũũrana wega na ũũru, nĩ ũndũ wa ũrĩa monire ihinda rĩa kwĩmenyeria gwĩka ũguo.” (Ahibirania 5:14) Rĩrĩa Paulo oigire “kwĩmenyeria,” aahũthĩrire kiugo gĩa Kĩgiriki kĩrĩa hihi kĩahũthagĩrũo mathako-inĩ thĩinĩ wa Ũyunani ya tene, tondũ no gĩtaũrũo ‘kwĩmenyeria ta mũthaki.’ Rĩu ta wĩcirie ũrĩa kwĩmenyeria ta kũu gũtariĩ.

¹² Rĩrĩa twaciarirũo-rĩ, mwĩrĩ witũ ndwarĩ mũmenyerie. Kwa ngerekano-rĩ, kaana gatihotaga kũmenya harĩa tũgũrũ kana tuoko twako tũrĩ. Nĩkĩo gaikagia moko o ro ũguo, o na gakegũtha ũthiũ, ũndũ ũrĩa ũkarakaragia na ũgakamakia. O kahora kahora, nĩ ũndũ wa kũũhũthĩra-rĩ, mwĩrĩ ũkamenyera. Mwana agakuruma, agatuĩka wa gũthiĩ, na mũthia-inĩ agateng’era. * Ĩ nake mũthaki? Ũngĩona mũthaki akĩĩhiũria na kũrũũga rĩera-inĩ ta arĩ kaũndũ kahũthũ-rĩ, hatirĩ nganja nĩ wonaga atĩ mwĩrĩ wake nĩ ũmenyeretio gwĩka maũndũ macio. Mũthaki ũcio ndaamenyire gwĩka maũndũ macio o  ũguo—nĩ aabatarire mathaa maingĩ ma kwĩmenyeria. Bibilia yugaga atĩ kwĩmenyeria ta kũu nĩ “kwa bata o kahinda.” Na githĩ kwĩmenyeria gũkũũrana wega na ũũru maũndũ-inĩ ma kĩĩroho ti kwa bata o na makĩria?—1 Timotheo 4:8.

13. Tũngĩmenyeria ũhoti witũ wa gũkũũrana wega na ũũru atĩa?

¹³ Thĩinĩ wa ibuku rĩrĩ-rĩ, nĩ twarĩrĩirie maũndũ maingĩ marĩa mangĩgũteithia gũkũũrana wega na ũũru na nĩgetha ũtũũre ũrĩ mwĩhokeku harĩ Jehova na ũrĩ mũndũ wa kĩĩroho. Wĩcirie na kinyi ũhoro wa mawatho ma Ngai rĩrĩa ũratua maũndũ ũtũũro-inĩ waku wa o mũthenya. Itua-inĩ o rĩothe-rĩ, wĩyũrie ũũ: ‘Nĩ mawatho marĩkũ ma Bibilia mahutanĩtie na ũndũ ũyũ? Ingĩmahũthĩra atĩa? Nĩ mũthiĩre ũrĩkũ ũgũkenia Ithe witũ wa igũrũ?’ (Thimo 3:5, 6; Jakubu 1:5) Itua o rĩothe ũrĩtuaga ũkĩhũthĩra watho wa Bibilia nĩ rĩkũmenyeria makĩria ũhoti waku wa gũkũũrana wega na ũũru. Kwĩmenyeria ta kũu nĩ gũgũtũma ũtuĩke mũndũ wa kĩĩroho kũna na ũtũũre ũguo.

14. Nĩ kĩĩ twagĩrĩirũo kũhũũtagĩra nĩgetha tũkũre kĩĩroho, no nĩ ũndũ ũrĩkũ twagĩrĩirũo kwĩmenyerera?

¹⁴ O na gũtuĩka mũndũ no agimare kĩĩroho-rĩ, gũkũra kĩĩroho nĩ ũndũ ũthiaga na mbere hĩndĩ ciothe. Nĩgetha mũndũ akũre-rĩ, no mũhaka arĩe. Paulo kwoguo oigire ũũ: “Irio iria nyũmũ nĩ cia andũ arĩa agima.” Ũndũ wa bata mũno nĩgetha wĩtĩkio waku ũgĩe na hinya nĩ gũthiĩ na mbere kũrĩa irio nyũmũ cia kĩĩroho. Rĩrĩa ũrahũthĩra maũndũ marĩa ũreruta-rĩ, ũcio nĩguo ũũgĩ, na Bibilia yugaga atĩ, “ũndũ wa mbere no ũũgĩ.” Kwoguo-rĩ, nĩ tũrabatara gũkũria ng’aragu  ya irio cia kĩĩroho iria Ithe witũ atũheaga. (Thimo 4:5-7; 1 Petero 2:2) No kũgĩa na ũmenyo na ũũgĩ wa ũngai ti ũndũ wa gũtũma twĩtĩĩe kana tuone ta tũrĩ a bata gũkĩra andũ arĩa angĩ. Nĩ tũrabatara gwĩthuthuria kaingĩ nĩgetha mwĩtĩo kana ũndũ ũngĩ mũũru ndũgakũre thĩinĩ wa ngoro ciitũ. Paulo aandĩkire ũũ: “Wĩgeriei ũhoro wanyu inyuene, mũmenye kana no mũtũire o mwĩtĩkĩtie; ta ĩtuĩriei inyuene.”—2 Akorintho 13:5.

15. Wendo nĩ wa bata nĩkĩ harĩ gũkũra kĩĩroho?

¹⁵ Mũndũ no akorũo arĩ na hinya na atarĩ mũrũaru; no nĩ abataraga kũrĩa na kwĩmenyerera hingo ciothe. Nĩ kĩĩ tũbataraga nĩgetha tũtuĩke andũ agima kĩĩroho na tũikarage tũrĩ na ũkuruhanu mwega na Ngai? O mbere biũ, nĩ wendo. Tũrabatara gũthiĩ na mbere gũkũria wendo harĩ Jehova na arĩa tũthathayagia nao. Tũngĩkorũo tũtirĩ na wendo-rĩ, ũmenyo witũ na mawĩra maitũ mothe no ma tũhũ—ta inegene rĩtarĩ na ũrĩa riugĩte. (1 Akorintho 13:1-3) Tũrĩ na wendo-rĩ, no tũtuĩke andũ agima Gĩkristiano na tũthiĩ na mbere gũkũra kĩĩroho.

16. Nĩ meciria ma mũthemba ũrĩkũ Shaitani arehagĩra andũ, na nĩ kĩĩ Jehova aheanaga nĩguo tũmatoorie?

¹⁶ Gatatũ, tũrabatara kũiga meciria maitũ harĩ kĩĩrĩgĩrĩro kĩrĩa Jehova aheanaga. Nĩgetha twĩke ũguo-rĩ, tũrabatara kũmenyerera meciria maitũ. Shaitani, ũrĩa mũnene wa gũkũ thĩ, ahũthagĩra wara gũtũma andũ mecirie maũndũ ma kũũraga ngoro, merĩgĩrĩre maũndũ moru, makorũo na nganja, na kwĩyagĩra kĩene. (Aefeso 2:2) Meciria ta macio nĩ moru mũno harĩ Mũkristiano. Wega nĩ atĩ Jehova nĩ atũheaga kĩndũ kĩa bata mũno nĩguo tũtoorie—mwĩhoko.

17. Kiugo kĩa Ngai kĩonanagia atĩa bata wa kĩĩrĩgĩrĩro?

¹⁷ Bibilia nĩ yonanagia indo itiganĩte cia matharaita ma  kĩĩroho marĩa tũbataraga nĩguo tũhũrane na Shaitani na thĩ ĩno. Kĩndũ kĩmwe kĩa bata kĩa matharaita macio nĩ ngobia ya kũgitĩra mũtwe, “kĩĩrĩgĩrĩro kĩa ũhonokio.” (1 Athesalonike 5:8) Mũthigarĩ arĩ mbaara-inĩ mahinda ma Bibilia nĩ aamenyaga ndangĩhonoka atarĩ na ngobia ya kũgitĩra mũtwe. Kaingĩ yathondekagwo na cuma na ĩgekĩrũo rũũa kana gĩkuo mwena wa na thĩinĩ, yagiragĩrĩria mũtwe ndũkagũthwo nĩ kĩndũ. O ta ũrĩa ngobia ĩgitagĩra mũtwe-rĩ, kĩĩrĩgĩrĩro no kĩgitĩre meciria maku.

18, 19. Jesu aaigire kĩonereria kĩrĩkũ gĩa gũtũũria kĩĩrĩgĩrĩro, na tũngĩĩgerekania nake atĩa?

¹⁸ Jesu nĩ aatũigĩire kĩonereria kĩrĩa kĩega biũ gĩa gũtũũria kĩĩrĩgĩrĩro. Ta ririkana maũndũ marĩa aakirĩrĩirie ũtukũ wake wa mũthia arĩ gũkũ thĩ. Aakunyanĩirũo nĩ mũrata wake nĩ ũndũ wa mbeca. Ũngĩ nake agĩkaana atĩ o na ndamũũĩ. Acio angĩ nao makĩmũtiganĩria na makĩũra. Ayahudi makĩmũrega, na makiuga aherithio na oragwo nĩ thigari cia Aroma. No tuuge atĩ gũtirĩ o na ũmwe witũ ũngĩcemania na magerio mooru gũkĩra ma Jesu. Nĩ kĩĩ kĩamũteithirie? Ahibirania 12:2 ĩcokagia ũũ: “Nĩ ũndũ wa gĩkeno kĩrĩa aaigĩirũo mbere yake, nĩaakirĩrĩirie ũhoro wa [gũcurio mũtĩ-inĩ], atekũũria gũconorũo, na rĩu nĩaikaire thĩ mwena wa ũrĩo wa gĩtĩ-gĩa ũthamaki kĩrĩa kĩa Ngai.” Jesu aaikaraga hingo ciothe arorete “gĩkeno kĩrĩa aaigĩirũo mbere yake.”

¹⁹ Nĩ gĩkeno kĩrĩkũ kĩaigĩtwo mbere ya Jesu? Nĩ aamenyaga atĩ akirĩrĩria-rĩ, nĩ egũkorũo na itemi harĩ gũtheria rĩĩtwa rĩa Jehova. Nĩ angĩarutire ũira ũrĩa mũnene mũno atĩ Shaitani nĩ mũheenania. Gũtirĩ ũndũ ũngĩ ũngĩaheire Jesu gĩkeno kĩnene gũkĩra kĩu! Ningĩ nĩ aamenyaga atĩ Jehova nĩ ekũrathima mũno mũthiĩre wake wa wĩhokeku—atĩ o ica ikuhĩ nĩ eetereirũo nĩ ũtũũro mwega ta kĩ acoka kũrĩ Ithe. Jesu aaikaraga akĩririkanaga kĩĩrĩgĩrĩro kĩu hingo ciothe ũtũũro-inĩ wake, o na maũndũ maaritũha atĩa. O na ithuĩ tũrabatara gwĩka ũguo. Nĩ tũigĩirũo gĩkeno ta kĩu mbere iitũ. Jehova nĩ  atũheete gĩtĩo gĩa gũteithia gũtheria rĩĩtwa rĩake rĩtũũgĩru. No tuonanie atĩ Shaitani nĩ wa maheeni na njĩra ya gũthuura Jehova akorũo arĩ Mwathani witũ na tũikarage wendo-inĩ wa Ithe witũ o na twacemania na magerio kana mathĩna marĩkũ.

20. Nĩ kĩĩ kĩngĩgũteithia ũigage meciria maku maũndũ-inĩ marĩa ma gwĩkĩra ngoro?

²⁰ Jehova nĩ endaga na nĩ eriragĩria mũno kũhe ndungata ciake njĩhokeku ngerenwa. (Isaia 30:18; Malaki 3:10) Nĩ akenagĩra kũhe ndungata ciake maũndũ mega marĩa cihoyaga. (Thaburi 37:4) Kwoguo-rĩ, ikaraga ũcũthĩrĩirie kĩĩrĩgĩrĩro kĩrĩa kĩrĩ mbere yaku. Ndũkareke meciria ma kũũraga ngoro na mahong’oku ma thĩ ĩno ya Shaitani magũtoorie. Ũngĩona ta roho wa thĩ ĩno ũratonya kahora o kahora thĩinĩ wa meciria na ngoro yaku-rĩ, thaitha Jehova na njĩra ya mahoya akũhe ‘thayũ wa Ngai, ũikaragie ngoro yaku.’ Thayũ ũcio kuuma kwĩ Ngai nĩ ũkũgitĩra ngoro yaku na meciria maku.—Afilipi 4:6, 7.

21, 22. (a) Nĩ kĩĩrĩgĩrĩro kĩrĩkũ kĩa magegania arĩa a “kĩrĩndĩ kĩingĩ” merĩgagĩrĩra? (b) Nĩ ũndũ ũrĩkũ wa kĩĩrĩgĩrĩro kĩa Akristiano gĩgũkenagia mũno, na ũtuĩte itua rĩrĩkũ?

²¹ Kĩu nĩ kĩĩrĩgĩrĩro kĩega mũno gwĩciria ũhoro wakĩo.  Akorũo wee ũrĩ ũmwe wa “kĩrĩndĩ kĩingĩ,” kĩrĩa gĩkaahonoka “mĩnyamaro-inĩ ĩrĩa mĩnene,” ta wĩcirie ũhoro wa ũtũũro ũrĩa ũgũkorũo naguo ica ikuhĩ. (Kũguũrĩrio 7:9, 14) Shaitani na ndaimono ciake maarĩkia kweherio-rĩ, ũgũkorũo na gĩkeno kĩnene mũno ũtangĩhota gwĩciria ũhoro wa kĩo ũmũthĩ. No anga gũkĩrĩ mũndũ o na ũmwe ũmũthĩ ũrĩ watũũra atekũhatĩkwo nĩ Shaitani na thĩ yake njũru? Hatĩka ĩyo yarĩkia kweherio-rĩ, gĩgakorũo arĩ gĩkeno kĩnene mũno kũruta wĩra wa gũtua thĩ paradiso rungu rwa ũtongoria wa Jesu na arĩa 144,000 magaathana nake. Nĩ tũkenagĩra kwĩrĩgĩrĩra thĩ ĩtarĩ na mĩrimũ, kũnyita ũgeni endwa aitũ arĩa makaariũkio kuuma mbĩrĩra-inĩ, na gũtũũra kũringana na ũrĩa Ngai aatanyĩte. O ũrĩa tũgaathiĩ na mbere tũkinyanĩire-rĩ, noguo kĩheo kĩngĩ kĩega makĩria gĩgakorũo gĩkuhĩrĩirie, kĩĩranĩro kĩrĩa kĩguũrĩtio thĩinĩ wa Aroma 8:21—“riri ũrĩa ũkaheo ciana cia Ngai.”

²² Jehova endaga ũgĩe na wĩyathi mũnene o na gũkĩra ũrĩa wee ũngĩcirĩria. Wĩyathi ũcio wĩĩhocetie harĩ wathĩki. Na githĩ ndwagĩrĩirũo gwĩka o ũrĩa wothe wahota rĩu, wathĩkĩre Jehova mũthenya o mũthenya? Nĩ ũndũ ũcio-rĩ, gĩikare ũgĩĩkĩraga wĩtĩkio waku hinya nĩ getha ũtũũre wendo-inĩ wa Ngai mĩndĩ na mĩndĩ!