Tũtikoragwo na atongoria a kũrĩhwo ithondeka-inĩ ritũ. Handũ ha ũguo, o ta ũrĩa gwekagwo rĩrĩa kĩũngano gĩa Gĩkristiano kĩambĩrĩirie-rĩ, arori arĩa agĩrĩru nĩ mamũragwo ‘nĩguo marĩithagie kĩũngano kĩa Ngai.’ (Atũmwo 20:28) Athuri acio nĩ arũme agima kĩĩroho arĩa matongoragia na makarĩithia kĩũngano, ‘ti tondũ wa kũringĩrĩrio, no nĩ tondũ wa kwĩyendera marĩ mbere ya Ngai; ti tondũ wa kwenda uumithio ũtarĩ wa kĩhooto, ĩndĩ nĩ marĩ na wendi.’ (1 Petero 5:​1-3) Nĩ wĩra ũrĩkũ marutaga nĩ ũndũ witũ?

Nĩ matũrũmbũyagia na magatũrora. Athuri nĩ matongoragia na magateithia kũgitĩra kĩũngano kĩĩroho. Nĩ ũndũ wa kũmenya atĩ nĩ Ngai ũmehokeire wĩra ũcio wa bata, athuri matiathaga andũ ake na gĩthũri, ĩndĩ mamateithagĩrĩria gũikara wega na kũgĩa na gĩkeno. (2 Akorintho 1:24) O ta ũrĩa mũrĩithi arũmbũyagia na kĩyo o ng’ondu rũũru-inĩ rwake, athuri mageragia kũmenya o mũndũ thĩinĩ wa kĩũngano.​—⁠Thimo 27:⁠23.

Nĩ matũrutaga gwĩka wendi wa Ngai. O kiumia athuri nĩ matongoragia thĩinĩ wa mĩcemanio ya kĩũngano nĩguo mekĩre wĩtĩkio witũ hinya. (Atũmwo 15:32) Ningĩ athuri acio marĩ kĩyo nĩ matongoragia wĩra-inĩ wa kũhunjia, makarutithania wĩra na ithuĩ na magatũmenyeria maũndũ-inĩ mothe megiĩ ũtungata.

Nĩ matwĩkĩraga ngoro o mũndũ o mũndũ. Nĩguo athuri a kĩũngano mahote kũrũmbũiya mabataro maitũ ma kĩĩroho, nĩ matũceeragĩra mĩciĩ-inĩ itũ kana makaria na ithuĩ tũrĩ Nyũmba-inĩ ya Ũthamaki nĩguo matũteithie na matũũmĩrĩrie na Maandĩko.​—⁠Jakubu 5:​14, 15.

Makĩria ma wĩra wao wa kĩũngano, athuri aingĩ nĩ makoragwo na mawĩra mao na ma famĩlĩ, marĩa mabataraga mahinda mao na makabatara kũrũmbũiyo. Nĩ twagĩrĩirũo kũhe gĩtĩo ariũ a Ithe witũ acio marĩ kĩyo.​—⁠1 Athesalonike 5:​12, 13.

• Wĩra wa athuri a kĩũngano nĩ ũrĩkũ?

• Athuri monanagia atĩa atĩ nĩ matũrũmbũyagia tũrĩ o mũndũ o mũndũ?