NĨ ŨĨ ũndũ wa mbere ũrĩa Nuhu ekire hĩndĩ ĩrĩa we na famĩlĩ yake moimire thabina? Akĩrutĩra Ngai igongona kana kĩheo. Ta wĩyonere ũrĩa areka mbica-inĩ ĩno. Nuhu arutire igongona rĩa nyamũ acokerie Ngai ngatho nĩ ũndũ wa kũhonokia famĩlĩ yake kuuma kũrĩ kĩguũ kĩnene.

Nĩ ũgwĩciria Jehova nĩaakenirio nĩ kĩheo kĩu? Ĩni. Nĩ ũndũ ũcio akĩĩra Nuhu atĩ ndarĩ hingo agacoka kwananga thĩ rĩngĩ na kĩguũ.

Kahinda gathianga thĩ ĩkĩũma, na rĩu Nuhu na famĩlĩ yake makĩambĩrĩria mũtũũrĩre mwerũ nja ya thabina. Ngai agĩkĩmarathima akĩmeera: ‘No mũhaka mũgĩe na ciana nyingĩ. No mũhaka mwongerereke mũingĩhe o nginya andũ matũũre igũrũ rĩa thĩ yothe.’

No thutha, rĩrĩa andũ mangĩaiguire ũhoro wa kĩguũ kĩrĩa kĩnene, nĩ mangĩetigĩrire atĩ kĩguũ o ta kĩu nĩ kĩngĩacokire rĩngĩ. Nĩ ũndũ ũcio Ngai akĩheana kĩndũ kĩrĩa kĩngĩaririkanirie andũ kĩĩranĩro gĩake atĩ ndarĩ hingo agacoka gũtũma kũiyũre kĩguũ thĩ yothe rĩngĩ. Nĩ ũũĩ kĩrĩa aaheanire gĩa kũmaririkania? Waarĩ mũkũnga-mbura.

Kaingĩ mũkũnga-mbura wonekaga matu-inĩ rĩrĩa riũa rĩara thutha wa mbura kuura. Mĩkũnga-mbura yahota gũkorũo na marangi maingĩ mathaka. Ũrĩ wona ũmwe? Nĩ ũrona ũrĩa ũrĩ thĩinĩ wa mbica ĩno?

Ngai oigire ũũ: ‘Nĩ nderanĩra atĩ gũtirĩ hingo ĩngĩ andũ na nyamũ makaanangwo nĩ kĩguũ. Nĩ ndĩrekĩra mũkũnga-mbura wakwa matu-inĩ. Na rĩrĩa mũkũnga-mbura woneka, nĩngawonaga na ndirikane kĩĩranĩro gĩkĩ gĩakwa.’

Nĩ ũndũ ũcio, hĩndĩ ĩrĩa wona mũkũnga-mbura-rĩ, ũkũririkanagia atĩa? Ĩni, Ngai eranĩire atĩ ndarĩ hingo ĩngĩ akaananga thĩ na kĩguũ kĩnene.