Tondũ Jesu aarĩ mũkinyanĩru, ndaacemanirie na mĩtangĩko mĩingĩ ĩrĩa yatangaga andũ arĩa angĩ. O na kũrĩ ũguo, nĩ aacayagĩra andũ mũno. Aakoragwo ehaarĩirie kwĩima nĩ ũndũ wao, o na ageka maũndũ ataarĩ o mũhaka eke. Aateithagia andũ nĩ ũndũ wa kũmaiguĩra tha. Wĩcirie igũrũ rĩgiĩ ngerekano iria irĩ Gĩcunjĩ-inĩ kĩa 32, 37, 57, 99.

Andũ a mĩthemba yothe​—ethĩ na akũrũ​—nĩ maaiguaga marĩ na wĩyathi wa gũthiĩ harĩ Jesu tondũ ndaamonagia atĩ ndarĩ na mahinda kana atĩ we nĩ wa bata kũmakĩra. Nĩ maaiguaga makenete marĩ hamwe nake tondũ nĩ moonaga atĩ nĩ aramarũmbũiya. Nĩguo wone ũndũ ũcio, rora Gĩcunjĩ kĩa 25, 27, 95.

Jesu nĩ aahoyaga Ithe kaingĩ, arĩ wiki o na arĩ hamwe na athathaiya a ma. Ndaahoyaga o hĩndĩ ya kũrĩa irio tu. Nĩ aahoyaga agĩcokeria Ithe ngatho, akĩmũgooca, o na akĩmũhoya ũtongoria atanatua matua ma bata. Thoma ngerekano thĩinĩ wa Gĩcunjĩ kĩa 24, 34, 91, 122, 123.

Rĩmwe na rĩmwe rĩrĩa Jesu aabataraga kũhurũka, nĩ aagaga gwĩka ũguo nĩguo ateithie andũ. Ndaarĩ na mwerekera wa kwamba kwĩguna we mwene. Nĩ aatũigĩire kĩonereria kĩega tũngĩrũmĩrĩra ũndũ-inĩ ũcio. No wone ũrĩa aatũigĩire kĩonereria kĩu ũngĩthoma Gĩcunjĩ gĩa 19, 41, 52.

Jesu to kũrutana aarutanaga igũrũ rĩgiĩ kuohanĩra, ĩndĩ we mwene nĩ ohagĩra arutwo ake o na andũ arĩa angĩ. Wĩcũranie ngerekano iria irĩ thĩinĩ wa Gĩcunjĩ kĩa 26, 40, 64, 85, 131.

Nĩ kwarathĩtwo atĩ Ayahudi aingĩ nĩ mangĩkaaga gwĩtĩkĩra Mesia na atĩ thũ ciake nĩ ingĩkamũũraga. Kwoguo Jesu nĩ angĩathuurire kwaga kwĩrutanĩria mũno gũteithia andũ. No handũ ha ũguo, aanyitaga mbaru ũthathaiya wa ma arĩ na kĩyo. Nĩ aaigire kĩonereria gĩa gũkorũo na kĩyo harĩ arũmĩrĩri ake othe arĩa mokagĩrĩrũo na magakarario. Rora Gĩcunjĩ gĩa 16, 72, 103.

Jesu aarĩ wa gĩkĩro kĩa igũrũ gũkĩra andũ matarĩ akinyanĩru na njĩra nyingĩ, ta ũhoro-inĩ wĩgiĩ ũũgĩ na ũmenyo ũrĩa aarĩ naguo. Nĩ ũndũ wa gũkorũo arĩ mũkinyanĩru, aarĩ na ũhoti mũnene wa kĩĩmwĩrĩ na wa kĩĩmeciria gũkĩra mũndũ ũngĩ o wothe. O na kũrĩ ũguo, aatungatĩire andũ arĩ na wĩnyihia. No wone ũhoro ũcio thĩinĩ wa Gĩcunjĩ gĩa 10, 62, 66, 94, 116.

Jesu nĩ aakiragĩrĩria atũmwo ake o na andũ angĩ rĩrĩa maga kwĩgerekania nake kana gwĩka ũrĩa aramaruta. Ndaanogaga gũcokera maũndũ marĩa maabataraga kũmenya nĩguo makuhĩrĩrie Jehova makĩria. No wone ngerekano ciĩgiĩ ũkirĩrĩria wa Jesu thĩinĩ wa Gĩcunjĩ kĩa 74, 98, 118, 135.