Kahinda kanini thutha wa kwaria ũhoro wĩgiĩ kuohanĩra mũciĩ kwa Mũfarisai wĩtagwo Simoni, Jesu akambĩrĩria rũgendo rũngĩ rwa kũhunjia Galili. Ũyũ nĩ mwaka wa kerĩ wa ũtungata wake, na ndarĩ wiki. Arĩ na atũmwo arĩa 12, o hamwe na atumia amwe arĩa “maarutĩtwo ndaimono na makahonio mĩrimũ.” (Luka 8:2) Amwe ao nĩ Mariamu Mũmagidali, Susana, na Joana, mũtumia wa mũrũgamĩrĩri ũmwe wa nyũmba ya Mũthamaki Herode Antipasi.

O ũrĩa andũ mareruta ũhoro wĩgiĩ Jesu, mawoni matiganĩte megiĩ ũtungata wake makongerereka. Ũndũ ũcio ũkoneka wega thutha wa mũndũ ũmwe ũkoretwo na ndaimono na ũtahotaga kuona na kwaria kũrehwo kũrĩ Jesu na akahonio. Rĩu ndarĩ na ndaimono, na nĩ arahota kwaria na kuona. Andũ makagegio nĩ ũndũ ũcio, makoiga: “To gũkorũo ũyũ nĩwe Mũrũ wa Daudi?”​—Mathayo 12:23.

Andũ arĩa marũrũnganĩte gũthiũrũrũka nyũmba ĩrĩa Jesu araikara nĩ aingĩ mũno, ũũ atĩ we na arutwo ake matingĩhota nginya kũrĩa irio. No ti othe marona atĩ Jesu nĩwe “Mũrũ wa Daudi” ũrĩa weranĩirũo. Andĩki-Watho amwe na Afarisai mokĩte rũgendo rũraihu kuuma o Jerusalemu, ti nĩgetha merute kuuma kũrĩ Jesu kana mamũteithie. Mareera andũ ũũ: “Arĩ na Beelizebuli,” na kwoguo arutithanagia wĩra na “mũnene wa ndaimono.” (Mariko 3:22) Andũ a mbarĩ cia Jesu maigua ngucanio icio, magoka kũmũnyita. Nĩkĩ hihi?

Tondũ gũkinyĩria rĩu, ariũ a nyina na Jesu matiĩtĩkĩtie atĩ nĩ Mũrũ wa Ngai. (Johana 7:5) Jesu ũrĩa ũroneka ta ararehe ngucanio harĩ andũ tiwe Jesu ũrĩa moĩ rĩrĩa maareragwo taũni-inĩ ya Nazarethi. Tondũ marona ta arĩ na thĩna wa meciria, makoiga ũũ: “Nĩ agũrũkĩte.”​—Mariko 3:21.

 No hihi ũira ũronania atĩa? Jesu akorũo ahonia mũndũ ũkoretwo na ndaimono na rĩu nĩ arahota kuona na kwaria. Gũtirĩ mũndũ ũngĩkararia ũndũ ũcio. Kwoguo andĩki-Watho na Afarisai makageria gũthũkĩrĩria na njĩra ya kũigĩrĩra Jesu ũndũ wa maheeni. Makoiga atĩrĩ: “Mũndũ ũyũ aingataga ndaimono na hinya wa Beelizebuli, mũnene wa ndaimono.”​—Mathayo 12:24.

Jesu akamenya ũrĩa andĩki-Watho na Afarisai mareciria akoiga: “Ũthamaki o wothe ũngĩgayũkana no gũthira ũthiraga, na noguo itũũra o rĩothe kana nyũmba ĩngĩgayũkana ndĩngĩtũũra. No taguo, angĩkorũo Shaitani nĩ ekũingata Shaitani-rĩ, nĩ agayũkanĩte; ũthamaki wake ũngĩkĩrũgama atĩa?”​—Mathayo 12:​25, 26.

Ũcio nĩ ũhoro wa ma! Afarisai nĩ moĩ atĩ Ayahudi amwe nĩ maingataga ndaimono. (Atũmwo 19:13) Kwoguo Jesu akoria: “Angĩkorũo nyingataga ndaimono na hinya wa Beelizebuli-rĩ, ariũ anyu macingataga na hinya wa ũ?” Jesu nĩ ta arenda kũmeera atĩ ũguo maroiga ekaga, o nao noguo mekaga. Agacoka akameera: “No angĩkorũo nyingataga ndaimono kũgerera roho wa Ngai, Ũthamaki wa Ngai nĩ ũmũhĩtũkĩte mũtekũmenya.”​—Mathayo 12:​27, 28.

Nĩguo onanie atĩ kũingata ndaimono nĩ kuonanagia arĩ na hinya igũrũ rĩa Shaitani, Jesu akoiga: “Mũndũ angĩhota atĩa kũingĩra nyũmba ya mũndũ ũrĩ na hinya na amũtunye indo ciake tiga ambire kũmuoha? Hĩndĩ ĩyo norĩo angĩhota kũiya indo iria irĩ nyũmba yake. Ũrĩa wothe ũtarĩ mwena wakwa nĩ niĩ akararagia, na ũrĩa wothe ũtacokanagĩrĩria hamwe na niĩ nĩ kũhurunja ahurunjaga.” (Mathayo 12:​29, 30) Andĩki-Watho na Afarisai hatarĩ nganja nĩ marokĩrĩra Jesu, kwoguo makonania atĩ marahũthĩrũo nĩ Shaitani. Maratigithũkania andũ na Mũru wa Ngai, ũrĩa ũreka maũndũ agĩtongorio nĩ Jehova.

Jesu akahe akararia acio marahũthĩrũo nĩ Shaitani mũkaana ũyũ: “Andũ nĩ makooherũo mehia mao mothe marĩa mehagia na irumi ciothe iria marumanaga. No rĩrĩ, mũndũ o wothe ũkaaruma roho mũtheru gũtirĩ hĩndĩ akooherũo ĩndĩ mehia make megũtũũra tene na tene.” (Mariko 3:28, 29) Ta wĩcirie ũrĩa gũgathiĩ harĩ acio maroiga atĩ Shaitani nĩwe wĩkithagia maũndũ marĩa maroneka wega atĩ mekĩtwo kũgerera roho wa Ngai!