Rĩu nĩ kĩndũ mwaka ũmwe na nuthu kuuma rĩrĩa Johana Mũbatithania aamenyithanirie Jesu nĩwe Gatũrũme ka Ngai. Jesu ambĩrĩria ũtungata wake, arũme maigana ũna nĩ maatuĩkire arutwo ake ta Andrea, Simoni Petero, Johana, na hihi Jakubu (mũrũ wa nyina na Johana), Filipu, na Batholomayo (wĩtagwo na rĩĩtwa rĩngĩ Nathanaeli). Thutha wa ihinda, angĩ aingĩ magĩtuĩka arũmĩrĩri a Kristo.​—Johana 1:​45-47.

Jesu rĩu akiriĩ gũcagũra atũmwo ake. Acio egũcagũra megũtuĩka arutithania wĩra hamwe nake na amamenyerie na njĩra ya mwanya. No mbere ya kũmacagũra, Jesu agathiĩ kĩrĩma-inĩ kĩmwe hihi kĩrĩ hakuhĩ na Iria rĩa Galili, itĩna rĩtarĩ inene kuuma Kaperinaumu. Akahoya ũtukũ wothe, hihi akĩũria Ngai amũhe ũũgĩ na kĩrathimo gĩake. Mũthenya ũyũ ũngĩ ageta arutwo ake moke kũrĩ we na agathuura 12 matuĩke atũmwo ake.

Jesu agathuura arĩa atandatũ mekũgwetetwo hau kabere, o hamwe na Mathayo ũrĩa Jesu eetire kuuma wabici-inĩ ya kũrĩhĩria igooti. Acio angĩ atano nĩ Judasi (wĩtagwo na rĩĩtwa rĩngĩ Thadayo na “mũrũ wa Jakubu”), Simoni ũrĩa Mũkananayo, Toma, Jakubu mũrũ wa Alufayo, na Judasi Mũisikariota.​—Mathayo 10:​2-4; Luka 6:16.

Gũkinyĩria rĩu, acio 12 nĩ makoretwo magĩtwarana na Jesu, na nĩ amoĩ wega. Aigana ũna nĩ metainwo nake. Jakubu na mũrũ wa nyina Johana no kũhoteke nĩ aihwa a Jesu a hakuhĩ. Na angĩkorũo ta ũrĩa andũ amwe meciragĩria Alufayo aarĩ mũrũ wa nyina na Jusufu ũrĩa warerire Jesu, nĩ gũkiuga mũrũ wake Jakubu nĩ mũihwa wa Jesu.

Hatarĩ nganja, Jesu nĩ araririkana marĩĩtwa ma atũmwo ake wega. Wee hihi no ũmaririkane? Ũndũ ũmwe ũngĩgũteithia nĩ kũririkana atĩ harĩ na erĩ metagwo Simoni, erĩ metagwo Jakubu, na erĩ metagwo Judasi. Simoni (Petero) arĩ na mũrũ wa nyina Andrea, nake Jakubu (mũrũ wa Zebedi) arĩ na mũrũ wa nyina Johana. Ũndũ ũcio no ũgũteithie kũririkana marĩĩtwa ma atũmwo anana. Acio angĩ ana harĩ na mwĩtia wa mbia cia igooti (Mathayo), ũmwe wacokire kũgĩa na nganja (Toma), ũmwe wetirũo arĩ rungu rwa mũtĩ (Nathanaeli), na mũrata wa Nathanaeli (Filipu).

Atũmwo ikũmi na ũmwe moimĩte Galili, kũrĩa Jesu o nake oimĩte. Nathanaeli nĩ wa itũũra rĩa Kana. Filipu, Petero, na Andrea kĩhumo kĩao nĩ Bethisaida. Thutha wa ihinda Petero na Andrea magathamĩra Kaperinaumu, kũrĩa hihi Mathayo aaikaraga. Jakubu na Johana o nao maikaraga thĩinĩ kana hakuhĩ na Kaperinaumu, na kwĩ hĩndĩ maarĩ na biacara ya gũtega thamaki kũu. Judasi Mũisikariota ũrĩa wacokire gũkunyanĩra Jesu, kũroneka nowe mũtũmwo kuuma Judea.