1, 2. Heana ngerekano cia andũ arĩa Jehova oonaga marĩ arata anene mũno ake.

NĨ MŨNDŨ wa mũthemba ũrĩkũ ũngĩthuura atuĩke mũrata waku? No nginya ũkorũo ũngĩenda thiritũ ya mũndũ ũrĩa wĩna mawoni ta maku, mĩtugo ta yaku, na wendete maũndũ marĩa magũkenagia. Na no ũgucĩrĩrio nĩ mũndũ wĩna ngumo njega ta wĩhokeku na ũtugi.

² Ihinda rĩrĩa rĩothe rĩhĩtũku-rĩ, Ngai nĩ athuurĩte andũ amwe matuĩke arata anene mũno ake. Kwa ngerekano-rĩ, Jehova etire Iburahimu mũrata wake. (Isaia 41:8; Jakubu 2:23) Ngai oigire atĩ Daudi aarĩ “mũndũ ũrĩa ngoro [yake] yendeire o ngoga” tondũ aarĩ mũndũ ũhaana ũrĩa Jehova endaga. (Atũmwo 13:22) Na Jehova oonaga mũnabii Danieli arĩ “mũndũ mwendeku makĩria.”—Danieli 9:23.

3. Jehova athuuraga andũ amwe matuĩke arata ake nĩkĩ?

³ Jehova aathuurire Iburahimu, Daudi, na Danieli matuĩke arata ake nĩkĩ? Jehova eerire Iburahimu ũũ: “Nĩwĩtĩkĩrĩte kũigua mũgambo wakwa.” (Kĩambĩrĩria 22:18) Kwoguo Jehova akuhagĩrĩria arĩa mekaga wendi wake menyihĩtie. Eerire Aisiraeli ũũ: “Iguagai uuge wakwa, na niĩ nĩngũtuĩka Ngai wanyu, na inyuĩ mũtuĩke andũ akwa.” (Jeremia 7:23) Ũngĩathĩkĩra Jehova-rĩ, o nawe no ũtuĩke mũrata wake!

4, 5. Jehova ateithagia andũ ake na njĩra ĩrĩkũ?

⁴ Ta wĩcirie ũrĩa tũngĩteithĩka nĩ gũtuĩka arata a Ngai. Bibilia yugaga atĩ Jehova nĩ ethaga mweke wa “gũteithia andũ arĩa mamũrũmagĩrĩra na ngoro yao yothe.” (2 Maũndũ 16:9) Jehova angĩgũteithia atĩa? Njĩra ĩmwe yonanĩtio thĩinĩ wa Thaburi 32:8, harĩa Jehova oigĩte ũũ: “Nĩngũkũũhĩgia, nguonererie njĩra ĩrĩa ũrĩgeraga; ndĩĩgũtaaraga o ngĩkũbaraga na riitho rĩakwa.”

⁵ Ciugo icio ironania na ma atĩ Jehova nĩatũrũmbũyagia! Nĩegũkũhe ũtaaro ũrĩa ũrabatara na akorũo e hamwe nawe hĩndĩ ĩrĩa ũraũrũmĩrĩra. Ngai nĩarenda gũgũteithia ũtoorie mathĩna na magerio. (Thaburi 55:22) Kwoguo watungatĩra Jehova na ngoro yothe-rĩ, no ũgĩe na ũmĩrĩru ta mwandĩki wa Thaburi ũrĩa woigire ũũ: “Jehova nĩndĩmwĩigĩire mbere yakwa hingo ciothe, na tondũ e guoko-inĩ gwakwa kwa ũrĩo, ndirĩ hĩndĩ ngenyenyeka.” (Thaburi 16:8; 63:8) Jehova no agũteithie ũtũũre na njĩra ĩrĩa ĩmũkenagia. No, o ta ũrĩa ũĩ-rĩ, nĩ kũrĩ thũ ya Ngai ĩrĩa ĩtendaga wee ũtũũre na njĩra ĩrĩa ĩkenagia Ngai.

6. Shaitani aarutire thitango ĩrĩkũ ĩkoniĩ andũ?

⁶ Gĩcunjĩ gĩa 11 kĩa ibuku rĩrĩ nĩgĩtaarĩirie ũrĩa Shaitani ũrĩa Mũcukani aatharĩkĩire ũnene wa Ngai. Shaitani aigĩrĩire Ngai atĩ nĩ mũheenania na akiuga atĩ Jehova nĩ aahinyĩrĩirie Adamu na Hawa nĩ kũmagiria meamũrĩre wega na ũũru. Thutha wa Adamu na Hawa kwĩhia na njiaro ciao ciambĩrĩria kũiyũra thĩ-rĩ, Shaitani nĩekĩrĩire nganja muoroto wa andũ othe wa gũtungatĩra Ngai. Shaitani oigire atĩ andũ matitungatagĩra Ngai nĩũndũ wa kũmwenda, na atĩ angĩheo mweke no ahote gũtũma mũndũ o wothe ahutatĩre Ngai. Ũhoro wa mũthuri wetagwo Ayubu wonanagia atĩ ũguo nĩguo Shaitani eetĩkĩtie. Ayubu aarĩ ũ, na thitango ya Shaitani yamũkoniĩ atĩa?

7, 8. (a) Nĩkĩ gĩatũmire Ayubu atuĩke wa mwanya gatagatĩ-inĩ ka andũ a hĩndĩ yake? (b) Shaitani eekĩrĩire nganja atĩa muoroto wa Ayubu wa gũtungatĩra Ngai?

 ⁷ Ayubu aatũũraga ta mĩaka 3,600 mĩthiru. Aarĩ mũndũ mũthingu tondũ Jehova oigire ũũ: “Kũu thĩ gũtirĩ mũndũ ũngĩ ũhaana take, nĩ gũtuĩka nĩ mũndũ ũtarĩ ũcuke na kũrũngĩrĩra nĩ mũrũngĩrĩru, mũndũ wĩtigĩrĩte Ngai na agathemaga maũndũ marĩa moru.” (Ayubu 1:8) Ayubu nĩaakenagia Ngai.

⁸ Shaitani nĩeekĩrĩire nganja muoroto wa Ayubu wa gũtungatĩra Ngai. Mũcukani eerire Jehova ũũ: “Githĩ ti kũmũirigĩra ũmũirigĩire [Ayubu] mĩena yothe, nyũmba yake, na indo ciothe iria e nacio? Kũrathima nĩũrathimĩte wĩra wa moko make, naguo ũhiũ wake ũgakĩingĩha thĩinĩ wa bũrũri. No rĩrĩ, rĩu ta coka ũtambũrũkie guoko, ũhutie indo ciothe icio e nacio, nake ndarĩ hingo ategũkũruma o ũthiũ-inĩ waku.”—Ayubu 1:10, 11.

9. Jehova eekire atĩa igũrũ rĩgiĩ thitango ĩyo ya Shaitani, na nĩkĩ?

⁹ Kwoguo Shaitani oigaga atĩ Ayubu aatungatagĩra Ngai nĩ ũndũ wa kĩrĩa oonaga kuuma kũrĩ we. Mũcukani ningĩ oigire atĩ korũo Ayubu aagerio-rĩ, no ahutatĩre Ngai. Jehova eekire atĩa igũrũ rĩgiĩ thitango ĩyo ya Shaitani? Jehova nĩetĩkĩririe Shaitani agerie Ayubu, tondũ thitango ĩyo yakoniĩ muoroto wa Ayubu. Na njĩra ĩyo-rĩ, Ayubu nĩ aangĩonanirie wega kana nĩ endete Ngai kana ndamwendete.

10. Nĩ magerio marĩkũ maakorire Ayubu, na eekire atĩa?

¹⁰ Shaitani agĩkĩgeria Ayubu na njĩra nyingĩ. Mbere ndaya, mahiũ mamwe ma Ayubu makĩiywo na mangĩ makĩũragwo. Hakuhĩ ndungata ciake ciothe ikĩũragwo. Ũndũ ũcio ũkĩrehera Ayubu thĩna mũnene. Gĩcanjama kĩngĩ kĩonekire rĩrĩa ciana ikũmi cia Ayubu cioragirũo nĩ kĩhuhũkanio. No, o na akorũo nĩ maũndũ macio mooru-rĩ, “Ayubu ndaigana kũhĩtia, kana akĩona ta Ngai ekĩte ũndũ ũtaagĩrĩire.”—Ayubu 1:22.

11. (a) Nĩ thitango ĩrĩkũ ĩngĩ Shaitani aigĩrĩire Ayubu, na Jehova eekire atĩa? (b) Ayubu eekire atĩa aanyitwo nĩ mũrimũ wĩ na ruo?

 ¹¹ Shaitani ndaakuire ngoro. No nginya akorũo nĩeciririe atĩ o na gũtuĩka Ayubu nĩ angĩomĩrĩirie kũũrũo nĩ indo ciake, ndungata, na ciana-rĩ, nĩ angĩahutatĩire Ngai angĩarwarire. Jehova agĩĩtĩkĩria Shaitani arehere Ayubu mũrimũ wĩ na magigi na ruo. No ũndũ ũcio o naguo ndwatũmire Ayubu orũo nĩ wĩtĩkio wake harĩ Ngai. Ithenya rĩa ũguo-rĩ, oigire ũũ na kinyi: “Nginya ngakua ndigetĩkĩra gũkaana wĩkindĩru wa ngoro yakwa ũ’thengere!”—Ayubu 27:5.

12. Ayubu aacokirie thitango ya Shaitani atĩa?

¹² Ayubu ndaamenyaga atĩ Shaitani nĩwe warĩ kĩhumo kĩa mĩnyamaro yake. Na nĩ ũndũ wa kwaga kũmenya wega ũrĩa Mũcukani aatharĩkĩire ũnene wa Jehova-rĩ, Ayubu eeciragia atĩ Ngai nĩwe wamũrehagĩra mathĩna macio. (Ayubu 6:4; 16:11-14) No, no aarũmirie wĩkindĩru wake harĩ Jehova. Na wĩhokeku ũcio wa Ayubu ũkĩonania atĩ Shaitani nĩ aarĩtie maheni, rĩrĩa oigire atĩ Ayubu aatungatagĩra Ngai nĩ ũndũ wa indo iria aamũheete!

13. Wĩhokeku wa Ayubu harĩ Ngai warĩ na moimĩrĩro marĩkũ?

¹³ Wĩhokeku wa Ayubu nĩwaheire Jehova macokio mega mũno harĩ thitango njũru ya Shaitani. Ayubu kũna aarĩ mũrata wa Jehova, na Ngai nĩ aamũrathimire nĩ ũndũ wa wĩhokeku wake.—Ayubu 42:12-17.

14, 15. Nĩ kĩĩ kĩngĩtũma tuuge atĩ thitango ya Shaitani ĩgiĩ Ayubu ĩkoniĩ andũ othe?

¹⁴ Thitango ĩo ĩgiĩ wĩkindĩru harĩ Ngai ĩrĩa yoimĩririo nĩ Shaitani ndĩakoniĩ o Ayubu tu. O nawe nĩ ĩgũkoniĩ. Ũndũ ũcio wonanĩtio wega thĩinĩ wa Thimo 27:11, harĩa Jehova oigĩte ũũ: “Mũrũ wakwa, tuĩka mũndũ mũũgĩ, ũgĩkenagie ngoro yakwa, ’hotage gũcokeria o ũrĩa ũngĩ’nyenya.” Ciugo icio, iria ciandĩkirũo mĩaka mĩingĩ thutha wa Ayubu gũkua-rĩ, cionanagia atĩ Shaitani nĩwe mũno  ũrĩa ũnyenyaga Ngai na gũthitanga ndungata Ciake. Rĩrĩa tũgũtũũra na njĩra ĩrakenia Jehova-rĩ, nĩtũteithagia gũcokia thitango ya Shaitani ya maheeni na kwoguo tũgatũma ngoro ya Ngai ĩkene. Ũkuona ũndũ ũcio atĩa? Githĩ ti wega mũno gũteithia gũcokia thitango ya Mũcukani ya maheeni, o na akorũo nĩũkũbatara kũgarũrĩra maũndũ mamwe ũtũũro-inĩ waku?

¹⁵ Rora wone Shaitani oigire atĩ “mũndũ aaruta indo ciothe iria e nacio nĩguo akũũre muoyo wake.” (Ayubu 2:4) Rĩrĩa Shaitani oigire “mũndũ,” oonanirie atĩ to Ayubu tu athitangaga, no nĩ andũ othe. Ũcio nĩ ũndũ wa bata mũno. Shaitani nĩ ekĩrĩire nganja wĩkindĩru waku harĩ Ngai. Mũcukani no ende kuona ũkĩaga gwathĩkĩra Ngai na ũtiganĩrie mũthiĩre wa ũthingu rĩrĩa wona mathĩna. Shaitani angĩgeria kũhingia ũndũ ũcio atĩa?

16. (a) Shaitani ageragia na njĩra irĩkũ gũtũma andũ mahutatĩre Ngai? (b) Mũcukani angĩhũthĩra atĩa njĩra icio harĩ wee?

¹⁶ O ta ũrĩa twarĩrĩirie thĩinĩ wa Gĩcunjĩ gĩa 10, Shaitani ahũthagĩra njĩra itiganĩte kũgeria gũtũma andũ mahutatĩre Ngai. Rĩmwe atharĩkagĩra “ta mũrũthi ũkũrarama, agĩcaragia mũndũ wa gũtambũra.” (1 Petero 5:8) Nĩ ũndũ ũcio Shaitani no ahũthĩre arata, andũ anyu, kana andũ angĩ gũkũgiria wĩrute Bibilia na gwĩka ũrĩa ũreruta. * (Johana 15:19, 20) Rĩrĩa rĩngĩ Shaitani “nĩehaananagia na mũraika wa ũtheri.” (2 Akorintho 11:14) Shaitani no ahũthĩre njĩra ciĩhithĩte gũkũhĩtithia na gũkũgucĩrĩria ume njĩra-inĩ ĩrĩa ĩkenagia Ngai. Ningĩ no ahũthĩre maũndũ ma gũkũũraga ngoro, hihi atũme ũigue ta wee ũtangĩhota gũkenia Ngai. (Thimo 24:10) O na angĩkorũo Shaitani aroka ta “mũrũthi ũkũrarama” kana aretua “mũraika wa ũtheri,”  thitango yake no ĩrĩa ĩmwe: Aroiga atĩ rĩrĩa wona mathĩna na magerio-rĩ, nĩ ũgũtiga gũtungatĩra Ngai. Ũngĩcokia thitango ĩyo yake atĩa na wonanie wĩkindĩru waku harĩ Ngai, o ta Ayubu?

17. Gĩtũmi kĩrĩa kĩnene gĩa gwathĩkĩra maathani ma Jehova nĩ kĩrĩkũ?

¹⁷ No ũcokie thitango ya Shaitani ũngĩtũũra na njĩra ĩrĩa ĩkenagia Ngai. Ũngĩka ũguo atĩa? Bibilia ĩcokagia ũũ: “Nawe enda Jehova Ngai waku na ngoro yaku yothe, na muoyo waku wothe, o na hinya waku wothe.” (Gũcokerithia Maathani 6:5) O ũrĩa wendo waku harĩ Ngai ũrakũra-rĩ, noguo ũkwĩrirĩria makĩria gwĩka ũrĩa endaga wĩke. Mũtũmwo Johana aandĩkire ũũ: “Amu kwenda Ngai nĩ atĩrĩ, nĩ tũmenyagĩrĩre maathani make.” Ũngĩenda Jehova na ngoro yaku yothe-rĩ, nĩ ũkuona atĩ “maathani make matirĩ thĩna.”—1 Johana 5:3.

18, 19. (a) Mamwe ma maathani ma Jehova nĩ marĩkũ? (Ona ithandũkũ rĩ karatathi-inĩ ka 122.) (b) Tũmenyaga atĩa atĩ Ngai ndatwĩraga twĩke ũrĩa tũtangĩhota?

¹⁸ Maathani ma Jehova nĩ marĩkũ? Mamwe mamo makoniĩ mĩtugo ĩrĩa twagĩrĩirũo gwĩthema. Kwa ngerekano-rĩ, ta rora  ithandũkũ rĩrĩa rĩroiga “Wĩtheme Maũndũ Marĩa Jehova Athũire” karatathi-inĩ ka 122. Nĩ ũkuona maũndũ maandĩkĩtwo ho marĩa Bibilia ĩkaananĩtie. Mamwe ma maũndũ macio ti mooru makĩoneka. No thutha wa gwĩcũũrania ũhoro wa maandĩko macio monanĩtio-rĩ, nĩ ũkuona ũũgĩ ũrĩa wĩ thĩinĩ wa watho wa Jehova. Kũgarũrĩra mĩthiĩre yaku kwahota gũkorũo nĩkuo ũndũ ũrĩa wĩ hinya mũno ũrĩ wona. No gũtũũra na njĩra ĩrĩa ĩkenagia Ngai nĩ kũheaga mũndũ gĩkeno na kũiganĩra kũnene. (Isaia 48:17, 18) Na ũcio nĩ ũndũ ũngĩhota gwĩka. Tũĩ ũguo atĩa?

¹⁹ Jehova ndatwĩraga twĩke maũndũ tũtangĩhota. (Gũcokerithia Maathani 30:11-14) Nĩ oĩ ũrĩa tũngĩhota na ũrĩa  tũtangĩhota gwĩka gũkĩra ũrĩa twĩyũĩ. (Thaburi 103:14) Ningĩ-rĩ, Jehova no atũhe hinya wa kũmwathĩkĩra. Mũtũmwo Paulo aandĩkire ũũ: “Ngai nĩ mwĩhokeku, na ndangĩĩtĩkĩra mũgerio na magerio makĩrĩte marĩa mũngĩhota gwĩtiiria; no hĩndĩ ĩrĩa mũkũgerio nĩarĩmuonagĩra njĩra ya kũhonokera, nĩ getha mũhote gwĩtiiria magerio macio.” (1 Akorintho 10:13) Nĩguo agũteithie kũũmĩrĩria-rĩ, Jehova o na no akũhe ‘ũhoti mũnene ũkĩrĩrĩirie.’ (2 Akorintho 4:7) Thutha wa kũũmĩrĩria magerio maingĩ-rĩ, Paulo nĩoigire ũũ: “Nĩ’hotaga gwĩka maũndũ mothe na ũndũ wake we ũrĩa ũ’heaga hinya.”—Afilipi 4:13.

20. Nĩ ngumo irĩkũ ikenagia Ngai twagĩrĩirũo gũkũria, na nĩ cia bata nĩkĩ?

²⁰ Ũrĩa kũrĩ nĩ atĩ, gũkenia Jehova nĩ kũbataraga maũndũ maingĩ gũkĩra o gwĩthema tu maũndũ marĩa atendete. Ũrabatara nginya kwenda maũndũ marĩa endete. (Aroma 12:9) Githĩ ndũgucagĩrĩrio nĩ arĩa marĩ na mawoni ta maku, mĩtugo ta yaku, na mendete maũndũ marĩa magũkenagia? O na Jehova noguo. Kwoguo wĩrute kwenda maũndũ marĩa Jehova endete. Mamwe mamo nĩ mataarĩirio thĩinĩ wa Thaburi 15:1-5, harĩa tũthomaga  igũrũ rĩgiĩ arĩa Ngai onaga marĩ arata ake. Arata a Jehova nĩ monanagia kĩrĩa Bibilia ĩtaga “maciaro ma Roho.” Namo nĩ hamwe na ngumo ta “wendani, na gĩkeno, na thayũ, na gũkirĩrĩria, na gũtugana, na gwĩkana wega, na kwĩhokeka, na kũhoorera, na kwĩgirĩrĩria merirĩria ma mwĩrĩ.”—Agalatia 5:22, 23.

21. Nĩ kĩĩ gĩgũgũteithia gũkũria ngumo iria ikenagia Ngai?

²¹ Gũthoma na kwĩruta Bibilia kaingĩ nĩ gũgũgũteithia gũkũria ngumo iria ikenagia Jehova. Na kwĩruta ũrĩa Ngai endaga nĩ gũgũteithia meciria maku mahote gũtwarana na ma Ngai. (Isaia 30:20, 21) O ũrĩa ũkuongerera wendo waku harĩ Jehova-rĩ, noguo ũkwĩrirĩria makĩria gũtũũra na njĩra ĩrĩa ĩmũkenagia.

22. Nĩ ũndũ ũrĩkũ ũkũhingia watũũra na njĩra ĩrĩa ĩkenagia Ngai?

²² Gũtũũra na njĩra ĩrĩa ĩkenagia Jehova nĩgũkũbatara kĩyo. Bibilia ĩringithanagia kũgarũra ũtũũro waku na kwĩyaũra mũndũ ũrĩa wa tene na kwĩhumba ũngĩ mwerũ. (Akolosai 3:9, 10) No ha ũhoro wa maathani ma Jehova-rĩ, mwandĩki wa Thaburi oigire ũũ: “Kũmamenyerera kwĩ na uumithio mũnene.” (Thaburi 19:11) O nawe nĩ ũkuona atĩ gũtũũra na njĩra ĩrĩa ĩkenagia Ngai nĩ kũrĩ uumithio mũno. Weka ũguo-rĩ, nĩ ũkũheana macokio harĩ thitango ya Shaitani na ũtũme Jehova akene!